Әһлибејт (ә) Хәбәр Аҝентлијинин вердији мәлумата ҝөрә - Һакимијјәтә хәјанәтдә тәгсирләндириләрәк барәсиндә ев дустаглығы сечилән Нардаран сакини Натиг Кәримов вә Азәрбајҹан Ислам Партијасынын сабиг сәдр мүавини Ингилаб Әһәдовун ҹинајәт иши үзрә мәһкәмәнин кечириләҹәји вахт мәлум олуб.
Тренд-ин мәлуматына ҝөрә, ҹинајәт иши үзрә мәһкәмәнин һазырлыг иҹласы јанварын 23-нә тәјин едилиб. Хатырладаг ки, бир мүддәт әввәл ҹинајәт иши Бакы Ағыр Ҹинајәтләр Мәһкәмәсиндә һаким Елдар Исмајыловун иҹраатына верилсә дә, һазырлыг иҹласында һаким өзүнә етираз едәрәк билдирмишди ки, һәмин иш үзрә истинтаг Дөвләт Тәһлүкәсизлик Хидмәтиндә апарылыб вә бу иш үзрә истинтаг групунун үзвү олан Емил Исмајылзадә онун оғлудур. Бундан сонра иш онун иҹраатындан ҝөтүрүлүб. Һазырда ҹинајәт иши бахылмасы үчүн Бакы Ағыр Ҹинајәтләр Мәһкәмәсинин һакими Әһмәд Гулијевин иҹраатына верилиб. Иттиһама ҝөрә, Дөвләт Тәһлүкәсизлији Хидмәтинин (ДТХ) һәјата кечирдији истинтаг-әмәлијјат тәдбирләринин нәтиҹәләринә әсасән, Азәрбајҹан вәтәндашы, Бакы шәһәри, Сабунчу рајонунун Нардаран гәсәбә сакини Кәримов Натиг Әлөвсәт оғлунун хариҹи хүсуси хидмәт органы әмәкдашлары тәрәфиндән мәхфи әмәкдашлыға ҹәлб едиләрәк узун мүддәт һәмин орган тәрәфиндән верилән тапшырыглары јеринә јетирмәси, Азәрбајҹанын дөвләт тәһлүкәсизлији зәрәринә ҹасуслуг едәрәк дөвләтә хәјанәт етмәсинә даир әсаслы шүбһәләр мүәјјән олунуб. Бунунла әлагәдар Н.Кәримов ДТХ-нин Истинтаг Баш Идарәси тәрәфиндән апарылан ҹинајәт иши үзрә шүбһәли шәхс гисминдә тутулараг бу ил јанварын 7-дә Ҹинајәт Мәҹәлләсинин 274-ҹү (дөвләтә хәјанәт) маддәси илә тәгсирләндирилән шәхс гисминдә истинтага ҹәлб едилиб. Сәбаил Рајон Мәһкәмәсинин гәрары илә онун барәсиндә дөрд ај мүддәтинә һәбс гәтимкан тәдбири сечилиб. Јанварын 19-да исә Сәбаил Рајон Мәһкәмәсинин гәрары илә Н.Кәримовун барәсиндә сечилмиш һәбс гәтимкан тәдбири ев дустаглығы илә әвәзләниб.
Гејд едәк ки, И.ӘҺәдов да Ҹинајәт Мәҹәлләсинин 274-ҹү (дөвләтә хәјанәт) маддәси илә тәгсирләндирилир.
Диггәт Хәбәрдән истифадә етдикдә мәнбәјә истинад лазымдыр!
