Депутат Фазил Мустафа нәһаjәт ки, олдуғу кими ҝөрүндү. Сон дөврләрдә Сәфәвиләр Империjасынын гуруҹусу Шаһ Исмаjыла, Азәрбаjҹанда әһалинин бөjүк бир гисминин мәнсуб олдуғу шиәлиjә гаршы һүҹумлары илә сых-сых ҝүндәмә ҝәлән депутат, нәһаjәт, нифрәтини бүрузә вериб. Өзү дә гәдәриндән, дәрәҹәсиндән артыг формада, һәм дә гәзәбли вә һиккәли. О гәдәр һиккәли ки, бүтөв бир инанҹ дашыjыҹыларыны тәһгир едәҹәк гәдәр.
Бирлик-ин вердиjи мәлуматә әсасән, Депутатын дедикләринә диггәт етмәмишдән өнҹә бир мәгамы вурғулаjаг ки, һансы сәбәбдәнсә гәзәбләнән вә кинини пүскүрән тәригәтчи-депутат бу ачыгламасы илә илк нөвбәдә бүтөв бир топлума саваш ачмагла jанашы, өз сиjаси карjерасыны зәрбә алтында гоjмуш олду. Еjни заманда она jөнәлик иттиһамлары да тәсдигләмәклә мүдафиә етдиjи вә jа мәнсуб олдуғуну ҝизләтмәдиjи, өзүнүн дедиjи кими, тәригәти зәрбә алтына гоjур. Ноjабрын 30-да ахар.аз саjтына ачыглама верән Ф.Мустафа Азәрбаjҹанда нурчулары тәнгид едәнләри шәрәфсиз адландырыб. Ситат: “Азәрбаjҹанда бир мәктәб белә ачмаjан шәрәфсизләр һеч олмаса нурчунун мәктәб ачдығыны ҝөрүб утанмалыдыр. Мәсәлән, әҝәр 10 мәктәб ачсам, мәндән хошбәхт инсан ола билмәз. Инди бунлар jүзләрлә мәктәб ачан адамлары тәһгир обjектинә чевирирләр, амма өзләри бир мәктәб дә ачмаjан шәрәфсизләрдир. Елә она ҝөрә дә бу мәсәләләрдә ҝүзәштә ҝетмәк олмаз”.
Хатырладаг ки, нурчуларын тәнгид олунмасына тәһгирлә ҹаваб верән депутат ачыгламасынын давамында һеч бир сәбәб олмадан кечид едәрәк сиғә адландырдығы мутә никаһындан данышыб вә долаjысы илә ону вә нурчулуғу тәнгид едәнләри сиғәдән доғуланлар адландырыб: “Бири вар гануни никаһдан доғуланлар, бири дә вар сиғә jолу илә дүнjаjа ҝөз ачанлар – бунлар чох фәргли шеjләрди. Јәни никаһдан доғуланлар, үмумиjjәтлә, илаһи бир инсан мүнасибәтинин тәнзимләнмәсини һәjата кечирирләр. Амма сиғәдән доғуланлар мүвәггәти никаһдан доғуланлар саjылыр, онларчүн доғулма меjары кими, гиjмәтләндирмә меjары да еjни формада олур…
Мән, үмумиjjәтлә, Исламда тәригәт әлеjһинә диссертасиjа мүдафиә еләмишәм. Исламда да тәригәтлиjи мүсбәт гаршыламырам. Инди бу инсанлар тәкҹә ону демирләр. Онлар мәним Исламын даһа вәһши дин олараг ҝөстәрилмәмәси үчүн атдығым аддымлар мүгабилиндә мәнә нә демәлидирләр? Мәсәлән, кимә исә ички ичдиjинә ҝөрә “алкоголик” деjирләр. Онлар бахыр ки, мән ички ичмирәм вә jа әjjаш һәjат кечирмирәм. Нормал ибадәтими едирәм вә һеч бир тәригәти гәбул еләмирәм. Инди бунлар ҝөрүн нә гәдәр һазырлыглы олмалыдырлар ки, мәним фикирләрими тәкзиб еләсинләр. Амма ону едә билмирләр. Буна ҝөрә дә мәнә иjрәнҹ шәкилдә шәр атырлар. Үмумиjjәтлә, мәним һәр һансы бир тәригәтлә әлагәм ола билмәз, чүнки jанашмам фәрглидир. Инди мәним нурчуларла һансыса фикирләрим үст-үстә дүшүрсә, ону изаһ еләсинләр! Мән деjирәм ки, баш jармаг, зәнҹир вурмаг инсана, Ислама хас хүсусиjjәт деjил. Әлбәттә ки, бунлары деjәндә дә мәнә истәнилән ад гошаҹаглар. Бунлары вахтилә Мирзә Ҹәлил дә, Сабир дә деjәндә, онлары да даш-галаг едибләр. Бу адамлар һәтта нурчулуг сәвиjjәсиндә дә өзләрини инкишаф етдирмиш адамлар деjилләр, амма дуруб инди онлары тәнгид едирләр”.
Анҹаг ачыгламадан ҝөрүндүjү кими Ф.Мустафа һәр нә гәдәр тәригәтчи олмадығыны, нурчуларла узагдан-jахындан әлагәсинин олмадығыны вурғуласа да, ачыг шәкилдә нурчулуғу мүдафиә едир. Икинҹи тәрәфдән, әҝәр дедиjи кими ону иттиһам едәнләр һагсыздыларса вә Ф.Мустафанын нурчулугла әлагәси jох идисә, о заман депутатын бу гәдәр нараһат олмасына ҝәрәк jох иди. Узун илләрин тәҹрүбәли сиjаси хадими, АХҸ-нин лидер командасында jер алан, jүксәк дөвләт вәзифәси тутмуш партиjа лидери кими бу ҹүр тәнгидләрә дә кәскин реаксиjа вермәjә биләрди. Һәр кәсә аjдындыр ки, сиjасәтчиләрә бу ҹүр һүҹумлар ади һалдыр.
Анҹаг ҝөрүндүjү кими, Ф.Мустафа нәинки бир сиjасәтчи кими она jөнәлик тәнгид вә өзүнүн иддиа еләдиjи кими тәһгирләри даһа биабырчы шәкилдә ҹавабландырыр. Үстәлик, тәһгирләрлә jанашы, өзүнү тәмизә чыхармаға, һәтта иттиһам олундуғу ҹәрәjаны да мүдафиә етмәjә чалышыр. Бу исә онун нараһат олмасынын, неҹә деjәрләр иттиһамын һәдәфә дәjмәсинин, нурчу олмаса да, тәригәтчи, мәзһәбчи олмасы вә бу истигамәтдә зәиф нөгтәсинин олдуғуну сүбут едир.
Әлбәттә, нурчулуг вә jа деjилдиjи кими, Фәтуллаһчылыг, о ҹүмләдән башга сүнни мәзһәбләри нормал һалда кимисә нараһат етмир. Сүнни мәзһәбләри Азәрбаjҹанын тарихи ҝерчәклиjидир. Лакин һәр кәсә аjдындыр ки, Фазил Мустафаны нараһат едән мәгам мәһз онун бир сиjасәтчи кими адынын нур ҹамааты илә һалландырылмасыдыр. Тәбии ки, миллиjjәтчи шинелдән чыхмыш бир шәхсин бирдән бирә сәф дәjишәрәк Түркиjә вә дүнjада ҝениш jаjылмыш, шүбһәли фәалиjjәтләри илә танынан нурчуларла һалланмасы онун өзү үчүн хеjли дәрәҹәдә ҹидди зәрбәдир.
Ф.Мустафанын нурчуларын мәктәб ачмасыны мүсбәт һадисә кими гиjмәтләндирмәси вә бу шәкилдә хүсуси уғур кими тәгдим етмәси исә баjағы ҝөрүнүр. Чүнки аjдын мәсәләдир ки, Азәрбаjҹанда нә Ф.Мустафаjа, нә дә башга бирисинә нәинки орта мәктәб (литсеj) шәбәкәси jаратмаға, һәтта бир мәктәб ачмаға белә имкан верилә билмәз. Фәтуллаһ Ҝүлән ҹамааты бу статусу 20 ил әввәлдән әлдә едиб вә мүәjjән сиjаси сәбәбләрлә мәктәбләрини горуjуб сахлаjа билибләр. Бу мәктәбләрин jахшы тәһсил вердиjини кимсә инкар етмир, амма һәм дә ону да инкар едән jохдур ки, бу мәктәбләр Фәтулаһ (нур) ҹамааты үчүн әсас тәблиғат васитәсидир. Бу бахымдан бир сыра өлкәләр, о ҹүмләдән Русиjа артыг бу мәктәбләри гападыб.
Вә нәһаjәт, бу вәзиjjәтин jаранмасынын сәбәбләринә бахмаг лазымдыр. Әлбәттә, истәнилән һалда бир шәхсиjjәтин тәһгир олунмасы jолверилмәздир. Хүсусән дә онун инанҹына ҝөрә. Анҹаг ачыгламасндан белә аjдын олур ки, ҹәнаб Мустафаны гыҹыгландыран мәсәлә она нурчу деjилмәсидир. Бу бахымдан депутатын Азәрбаjҹанда шиәлиjә гаршы ачыг тәблиғаты, еjни заманда Азәрбаjҹан тарихиндә мүһүм jер тутан Сәфәвиләр дөвләтини, онун баниси Шаһ Исмаjыл Хәтаини һәдәфә алан мөвгеjинә ҝөрә, она гаршы нурчу вә jа сәләфи деjилмәсини дә нормал гаршыламалыдыр. Чүнки сон илләрдә Азәрбаjҹанда әһалинин бөjүк әксәриjjәтинин инанҹы олан шиә мәзһәбинә, онун гәбул олунмуш гаjдаларына вә конкрет олараг Сәфәви дөвләтинә гаршы ачыг шәкилдә тәблиғат апаранлар сәләфиләр, нурчулар, еjни заманда атеистләрдир. Ф.Мустафа биринҹи вә үчүнҹүjә уjғун олмадығы үчүн һәр кәсин ағлына мәһз нурчулуг еһтималы ҝәлир. Лакин сон һадисә депутатын бу ҹәрәjана, jумшаг деjилсә, симпатиjасынын олдуғуну ачыг шәкилдә ортаjа гоjду.
Әлбәттә, бу мәсәләни ҝүндәмә ҝәтирән вә ағырлашдыран мәгам онун мәһз дини мөвзу үзәриндә гурулмасыдыр. Тәҹрүбәли сиjасәтчи, депутат биләрәкдән вә jа билмәjәрәкдән Азәрбаjҹанда апарылан мәгсәдли мәзһәбләрарасы ҝәрҝинлик jарадылмасы кампаниjасынын аләти кими чыхыш едир. Сон ики илдә Азәрбаjҹан ҹәмиjjәтиндә вахташыры олараг мәгсәдли шәкилдә мәзһәб тәфригәләри jарадылмасы вә мәзһәбләрарасы мүнасибәтләри ҝәрҝинләшдирмәк истигамәтиндә ҹәһдләр олур. Ҝөрүнән одур ки, бу ҝүн дә олмаса, ҝәләҹәк үчүн Азәрбаjҹанда да мараглы гүввәләр мәзһәб картындан истифадә етмәjә чалышаҹаглар. Азәрбаjҹаны, бу халгын һәгиги мәнафеjини истәjән зиjалы, сиjасәтчи вә диҝәрләри бу оjунларын аләти деjил, ислами вәһдәт вә толерантлығы тәблиғ етмәлидир. Чүнки әкс- һалда ҝәләҹәк тарихдә Азәрбаjҹанда мәзһәб карты һансыса мәкрли гүввәләрин әлиндә ганлы аләт олаҹаг. Һәлә ҝеҹ деjил, дүшүнмәк лазымдыр.
Бирлик Информасиjа Мәркәзинин аналитик шөбәси
геjд едек ки Мәһәррәмликдә мәсум Имама jас сахламағы писләjән вә Имамларын зиjарәтини хүрафат саjан депутат Фазил Мустафа (Гәзәнфәроғлу) Мәммәд Әмин Рәсулзадәнин мәзарыны зиjарәт етмәjин рәсми протокола салмағы тәклиф едиб!
Түркчүлүк тәблигатчысы депутат Низами Ҹәфәровун Мәммәд Әмин Рәсулзадәнин мәзарынын Азәрбаjҹана ҝәтирилмәси илә бағлы тәклифинә мүнасибәт билдирән Фазил Мустафа деjиб : “Һүсеjн Ҹавидин мәзарынын Сибирдән ҝәтирилмәсини алгышладым, амма Рәсулзадә Сибирдә деjил ки, о да бир түрк торпағындадыр. Садәҹә, Мәммәд Әмин Рәсулзадәнин мәзарынын зиjарәтини протокола салмаг лазымдыр. Азәрбаjҹанын дөвләт башчысы Түркиjәjә сәфәр етдиjи заман онун мәзарыны зиjарәт етмәлидир. Бу она бөjүк бир саjғы олар”.
диҝәр тәрәфдән Милләт вәкили Етибар Һүсеjновда Мәһәррәм аjы илә бағлы өз фикрини бөлүшүб. Милләт вәкилинин сосиал шәбәкәдә jаjдығы фикирләрини олдуғу кими тәгдим едирик. Бүтүн ифадәләр Е.Һүсеjновун өзүнә аиддир.
Һафта.аз-ын вердиjи хәбәрә ҝөрә, депутат Ашура ҝүнү зәнҹир вуранлары “тупоj” адландырыб: “Аj ҹамаат… Сиздән сорушурам – Бабам Һүсеjн Кәрбәла дүзүндә шәһид оландан сонра ҹәннәти газаныб, jохса jох??? Әҝәр газаныбса онда сиз тупоjлар 1400 илди ниjә зинҹир вуруб үзүнүзү ҹырырсыныз???”
Диггәт: Хәбәрдән истифадә етдикдә мәнбәjә истинад лазымдыр
