Әһли Бејт -АБНА- хәбәр аҝентлијинин вердији хәбәрә әсасән: Декабрын 12-дә президент Илһам Әлијев Инзибати Хәталар Мәҹәлләсинә дәјишикликләри тәсдигләјиб. Мәҹәлләјә едилмиш дәјишикликлә иҹра һакимијјәти органы илә разылашдырылмадан вәтәндашларын дини тәһсил мүәссисәләриндә тәһсил алмаг үчүн хариҹә ҝөндәрилмәси, дин хадимләринин мүбадиләси, ислам дининә аид ајин вә мәрасимләри Азәрбајҹандан кәнарда дини тәһсил алмыш вәтәндашларын һәјата кечирмәси гадағандыр.
Һәмин ҝүн президент Илһам Әлијев Ҹинајәт Мәҹәлләсинә јениликләри дә имзалајыб. Ҹинајәт Мәҹәлләсинә әлавә едилән јени маддәјә ҝөрә, ганунсуз олараг дини тәјинатлы әдәбијјаты, әшјалары вә дини мәзмунлу башга мәлумат материалларыны истеһсал етмә, идхал етмә, сатма вә ја јајма беш иләдәк мүддәтә азадлыгдан мәһруметмәни нәзәрдә тутур.
Президентин сәрәнҹамларына мүнасибәт билдирән Вүсал Һәтәмов “Медиа форум”а дејиб ки, инанҹлы кәсимә, милли-мәнәви дәјәрләрә, дининә даһа һөрмәтлә јанашан шәхсләрин варлығы бу өлкәјә хејирдир: “Сосиал проблемләрин ағырлығына дөзмәјиб ҹинајәт төрәдән шәхсләрин, демәк олар, һамысы дининә ҹидди јанашмајан инсанлардыр. Өлкә президенти бу аддымы илә дөвләтимиздә виҹдани-идеоложи дамары гапајыр. Мән хариҹдә, әләлхүсус да Иранда, Түркијәдә, Суријада охујан тәләбәләрин бир чохуну мәҹлисләрдә, тәдбирләрдә Низамидән, Нәсимидән, Фүзулидән, Сабирдән, Бәхтијардан, Румидән, Һафиздән, Сәдидән данышан ҝөрмүшәм.
Дүздүр, хариҹдә охујуб башга дөвләтләтләрин сијаси тәсиринә дүшән инсанлар да вар, лакин бу һеч дә она әсас вермир ки, бүтүнлүклә руһани гисим тәгибә мәруз галсын. Јахшы олар ки, һакимијјәт онларын үстүндән хәтт чәкмәкдәнсә нәзарәти ҝүҹләндирсин. Һансылар халгын, дөвләтимизин мәнафејинә хидмәт едир, онлара имкан јаратмаг лазымдыр. Ијирминҹи әсрин әввәлләриндә бир чох руһани алимләримиз тәгибләрин әлиндән мүһаҹирәт етмиш вә бунун нәтиҹәсиндә өлкәдә зијалы касадлығы, мәнәви бошлуг јаранмышды. Јенә дә бу баш вермәлидир? Совет гурулушу дағыланда халг севинирди ки, өз мүгәддәс адәт-әнәнәләрини, дини инанҹларыны сәрбәст, ачыг иҹра едә биләҹәк. Совет дөвләтини дағыдан амилләрдән бири дә онун атеизми тәблиғ етмәси иди. Һәмин дөврә гајытмаг истәјирик?”
Вүсал Һәтәмов ислам дининә аид ајин вә мәрасимләри Азәрбајҹандан кәнарда дини тәһсил алмыш вәтәндашларын һәјата кечирмәсинә гадағанын анлашылмаз олдуғуну вурғулајыб: “Јахшы, бәс ҝөрәсән, дини ајинләри кимләр иҹра едәҹәк? Совет Иттифагы дағыларкән әрәб әлифбасыны чөрәк ағаҹы кими өјрәнән дырнагарасы моллалармы? Һәмин моллалар дини ајинләри тәһриф едир ахы! Савадлы, өлүсүнә һөрмәт едән шәхсләр онсуз да дырнагарасы моллалара мәрасим етибар едән дејил. Бу сәбәбдән дә инсанлар, һесаб едирәм ки, чәтинликләрлә үзләшәҹәк, иҹтимаи зиддијјәләр јаранаҹаг. Дүздүр, өлкәмиздә Ислам Университети мөвҹуддур. Амма һәмин университетин мәзунларынын әксәријјәти илә таныш олдугда ҝөрүрсән ки, бу университетин анҹаг ады вар. Орада јахшы охујан ушагларын һамысы мәсҹидләрдә өз билҝи базаларыны артырмыш тәләбәләрдир”
Диггәт: Хәбәрдән истифадә етдикдә мәнбәјә истинад лазымдыр
