Әһли Бејт -АБНА- хәбәр аҝентлијинин вердији хәбәрә әсасән: Ҝүрҹүстанын Мәдәнијјәт вә Абидәләрин Мүһафизәси Назирлији азәрбајҹанлыларын компакт јашадығы бөлҝәләрдә дини-мәдәни абидәләрә бахыш кечирмәјә башлајыб. Ҝүрҹүстанда фәалијјәт ҝөстәрән Милли Азлыгларын Мониторинг Групунун (МАМГ) үзвү Земфира Әзизбәјова АПА-ја ачыгламасында билдириб ки, дини-мәдәни абидәләрә бахышын биринҹи мәрһәләси октјабрын 12-дән башлајыб.
Апарылан мониторинглә бағлы Ҝүрҹүстан руһаниләриндән “Ҝүрҹүстанын “Әһли-бејт (ә)” мәдәни-маариф ҹәмијјәти”нин сәдри, “Әһли-бејт (ә)” журналынын баш редактору Һаҹы Ризван Исмајылов Дејерлер.орҝ-а мүнасибәтини ачыгламышдыр: “Чох тәәссүф ки, Ҝүрҹүстандакы мәсҹидләримизин һеч бир статусу јохдур. Бу мәсҹидләрдән бәзиләри “Гоҹалар еви”, “Ибадәт еви” вә саир адларла гејдијјатдан кечиб, бир чохларынын исә һеч гејдијјаты јохдур. Бурада азәрбајҹанлылар јашајан бөлҝәләрдә тәгрибән 40-а гәдәр тарихи мәсҹид вар. Бу мәсҹидләрин һеч биринин сәнәди јох иди. Сон заманларда Ҝүрҹүстанын Игтисади Инкишаф Назирлији мәсҹидләрин, хүсусән дә тарихи мәсҹидләрин гејдијјаты просеси давам етдирирди. Ачығы биз бу ҝедишатдан наразыјыг. Бу мөвзу илә бағлы бизим бурадакы руһаниләр шурасынын чох ҹидди наразылығы вардыр. Биз истәјирик ки, бу просес мүсәлманларын, руһаниләрин, дин хадимләринин иштиракы илә апарылсын”.
Мәсәлә илә бағлы бир нечә дәфә рәсми дөвләт мәсуллары илә дә данышыглар апардыгларыны дејән Һаҹы Ризван бу нараһатлыг вә наразылығы рәсмиләрин дә диггәтинә чатыдырылдығыны дејир. Диҝәр тәрәфдән Ҝүрҹүстандакы тарихи мәсҹидләрлә јанашы јени мәсҹидләрин гејдијјаты мәсәләсинә дә тохунан илаһијјатчы бу һагда демишдир: “Јени мәсҹидләрин дә сәнәдләшдирилмәси заманы онлары да ҜМИ-ә тәрәф јөнәлдирләр. Орадан лисензија аландан сонра гејдијјат просеси давам етдирилә биләр. Доғрусу, бу мөвзуда һәм дөвләт гурумлары, һәм дә бу гурумла чох ҹидди проблемләримиз вар. Һазырда данышыглар давам едир. Бу јахынларда да мәсәлә илә бағлы 10 минә гәдәр етираз имзалары топладыг вә бу ҝүнләрдә Ҝүрҹүстан президенти Михаил Саакашвилијә тәгдим олунаҹаг. Тәбии ки, биз дә истәјирик ки, мәсҹидләримизин сәнәди олсун вә онлар дөвләт тәрәфиндән һимајә олунсун. Амма бүтүн бу просесләрин биздән хәбәрсиз апарылдығына ҝөрә бу ҹидди наразылыг доғурур. Бурадакы мүсәлманларла, руһаниләрлә разылашдырмадан бу просесләрин апарылмасы чох јалнышдыр”.
Мониторинг апаранларла бөлҝәдәки руһаниләрин мүнасибәтләриндән сөз ачаркән исә Һ.Ризван гејд еләмишдир ки, бу инсанларын һәр бири дәјәрли инсанлар, гејрәтли вә мәсулијјәтли, ејни заманда јахындан таныдығы инсанлардыр. “Мониторинг групунун рәһбәри Елбрус Мәммәдов гејрәтли бир азәрбајҹанлыдыр. Чох јахшы һүгуг мүдафиәчисидир, бу мәсәләләрә чох гајғылы вә һәссасыдыр. О, бир нечә мүддәт бундан габаг бу нараһатлығын һәлли үчүн бу һагда бејнәлхалг тәшкилатлара да јазмышды. Онлары мәлуматландырмышды ки, Ҝүрҹүстанда дини-тарихи абидәләр бахымсыз шәкилдә галмышдыр, онларын дөвләт гајғысына еһтијаҹ вар. Бүтүн бунлар онларын гејрәт вә мәсулијјәтләриндән ирәли ҝәлән тәдбирләр иди. Әлбәттә, биз дә ејнилә тарихи мәсҹидләримизин горунмасыны вә бу саһәдә дөвләт тәрәфиндән диҝәр тәдбирләрин дә ҝөрүлмәсини истәјирик. Амма чох тәәссүфләр олсун ки, бүтүн бу ишләр бурадакы руһаниләрлә разылашдырылмадан һәјата кечирилир. Бизим нараһатлығымыз бундан ибарәтдир. Јәни бу мәсҹидләрин гејдијјата алыныб јену гурума верилмәси ҝәләҹәкдә бизә ҹидди проблемләр јарадаҹаг. Сөһбәт һәмин мәсҹидләрин бу идарәнин балансына верилмәсиндән ҝедир. Буна биз дә, ҹамаат да там наразыдыр”, - дејә Ҝүрҹүстанда јашајан илаһијјатчы билдирмишдир.
Диггәт: Хәбәрдән истифадә етдикдә мәнбәјә истинад лазымдыр
