Әһли Бејт -АБНА- хәбәр аҝентлијинин вердији хәбәрә әсасән: Ермәнистанын илк президенти, мүхалиф Ермәни Милли Конгресинин сәдри Левон Тер Петросјан Русијанын “Московскије новости” гәзетинә мүсаһибәсиндә Дағлыг Гарабағ проблеминдән данышыб.
“Гарабағ мүнагишәси илә бағлы прогнозунуз нәдир” суалына сабиг президент белә ҹаваб вериб: “Гәрб проблемин һәлли үчүн кифајәт гәдәр сәј ҝөстәрмир, чүнки бу, приоритет дејил. Американын Ираг, Әфганыстан, Иран, Шимали Кореја кими нәһәнҝ проблемләри вар. Бура әлләри чатмыр. АБШ нә гәдәр варлы олса да, еһтијатлары мәһдуддур. Бу бир тәрәфдән мүнагишәнин һәллини тәхирә салыр, диҝәр тәрәфдән Русијаја бу мәсәләдә даһа фәал олмаға имкан јарадыр.
Русија Гарабағ мәсәләсиндә даһа фәал сијасәт апарыр. Бу ҝөз габағындадыр. Президентләрин ҝөрүшү, бәјанатларын имзаланмасы, үчтәрәфли бәјаннамәләр белә бир фикир јарадыр ки, проблемин һәлли тәшәббүсү Русијанын әлинә кечир. Русијанын шансы вар. Мән әминәм ки, мүнагишә тәрәфләри бу јолла ҝетмәјә разылыг версә, Гәрб мәсәләнин һәллинин әлејһинә олмајаҹаг. Һәләлик Русијанын апардығы просесин уғур газанмаг еһтималы вар. Амма бу просес дә тез бир заманда уғур ҝәтирмәсә, мүһарибә гачылмаздыр. Азәрбајҹанын сәбри јохдур. Президент ким олур-олсун, Ермәнистан мүһарибәјә тәшәббүс ҝөстәрмәјәҹәк. Саваш јалныз Азәрбајҹанын тәшәббүсү илә башлаја биләр. Ән тәһлүкәлиси дә одур ки, һеч ким Азәрбајҹанын әлиндән тутуб сахлаја билмәз”.
Диггәт: Хәбәрдән истифадә етдикдә мәнбәјә истинад лазымдыр
