Әһли Бејт -АБНА- хәбәр аҝентлијинин вердији хәбәрә әсасән: Мајын 6-сы Бакыда, Тәһсил Назирлијинин бинасы гаршысында кечирилмиш “Һиҹаба азадлыг” аксијасына ҝөрә тутулмуш Тәрлан Исмајыловун евиндә ахтарыш апарылыб. Вәкил Дилгәм Ағајевин вердији мәлумата ҝөрә, мајын 17-дә ахтарыш апаран һүгуг мүһафизә органларынын әмәкдашлары евдән дини китаблары вә дискләр ҝөтүрүбләр. Вәкил ахтарышда иштирак етмәдијини, мәлуматы аиләдән алдығыны дејиб.
Д.Ағајевин сөзләринә ҝөрә, Бакы Шәһәр Прокурорлуғу, еләҹә дә Бакы Шәһәр Баш Полис Идарәсиндә јарадылан истинтаг групу гаршысында вәсатәтлә чыхыш едәҹәк: “Әлимиздә олан видео ҝөрүнтүләрдән бәлли олур ки, аксија заманы Тәрлан Исмајылов һеч кимә, һеч бир полис әмәкдашына гаршы зор ишләтмәјиб. О, һәрәкәтсиздир. Әксинә, ағ көјнәкли, мүлки ҝејимли шәхс она гаршы зор ишләдир. Вәсатәтимиз һәмин мүлки ҝејимли шәхсин мүәјјән едилмәси вә ҹәзаланмасына аиддир. Һәр ики вәсатәтин мәзмуну ејнидир”.
Вәкил Т.Исмајыловун Бакы Истинтаг Тәҹридханасында сахландығыны, сәһһәти вә јери илә бағлы шикајәтләринин олмадығыны дејиб.
“Һиҹаба азадлыг” аксијасына ҝөрә һәбс олунанларын сајы, еләҹә дә онлар барәсиндә һүгуг мүһафизә органларынын рәсми мәлумат вермәмәси мәсәләсинә ҝәлинҹә, вәкил вурғулајыб ки, галдырылан ҹинајәт иши сијаси характер дашыјыр: “Она ҝөрә дә ҹавабдеһ инстансијалар бу барәдә иҹтимаијјәтә ҝениш ачыглама вермәк истәмирләр. Мәндә олан сон гејри-рәсми мәлумата ҝөрә, тутулараг барәсиндә 2 ајлыг һәбс гәрары чыхарыланларын сајы 12-јә чатыб. Тәәссүф ки, онларын кимлији барәдә мәлумата малик дејиләм. Чүнки јалныз һүгугларыны мүдафиә еләдијим шәхсләрин ишијлә мәшғулам”.
Т.Исмајылов Ҹинајәт Мәҹәлләсинин 221.2.2. (иҹтимаи гајданын горунмасы үзрә вәзифәни јеринә јетирән вә ја иҹтимаи гајданын позулмасынын гаршысыны алан һакимијјәт нүмајәндәсинә вә ја диҝәр шәхсә мүгавимәт ҝөстәрмәклә хулиганлыг) вә 221.3. (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) маддәләри илә шәрләнәрәк иттиһам олунур.
Диггәт: Хәбәрдән истифадә етдикдә мәнбәјә истинад лазымдыр
