Әһли Бејт АБНА хәбәр аҝентлијинин вердији хәбәрә әсасән: Иҹтимаи Палатанын апрелин 2-дә Бакыда кечирдији митингә ҝөрә тутулан ҝөздән әлил Елнур Исрәфилов барәсиндә Сәбаил Рајон Мәһкәмәсинин чыхардығы һәбс гәтимкан тәдбиринә хитам верилмәси үчүн вәсатәт галдырылыб.
Вәкил Јалчын Иманов билдириб ки, вәсатәт мајын 10-да истинтаг групунун рәһбәри Фазил Һәсәнәлијевә тәгдим едилиб.
Елнур Исрәфилов Ҹинајәт Мәҹәлләсинин 233-ҹү (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә) маддәси илә иттиһам олунур. Һәбс гәтимкан тәдбирини Сәбаил Рајон Мәһкәмәси апрелин 27-дә чыхарыб.
Вәкил гејд едиб ки, Елнур Исрафиловун сәһһәти ағырлашыб: “Ҹинајәт просессуал ганунвериҹилик истинтагы апаран мүстәнтигә, јахуд арашдырмаја рәһбәрлик едән прокурора ағыр хәстә шәхс барәсиндә һәбс гәтимкан тәдбирини дәјишдирмәк сәлаһијјәти верир. Елнурун сәһһәти даһа да ағырлашыр, нитгиндә гүсурлар әмәлә ҝәлиб, үрәк ағрылары ҝүҹләниб вә үмуми һалсызлыг мүшаһидә олунур”.
Мајын 2-дә Бакы Апеллјасија Мәһкәмәси Елнур Исрәфилов барәсиндә сечилмиш һәбс гәтимкан тәдбири гәрарындан верилмиш шикајәти тәмин етмәјиб.
Диггәт: Хәбәрдән истифадә етдикдә мәнбәјә истинад лазымдыр
