Әһли Бејт АБНА хәбәр аҝентлијинин вердији хәбәрә әсасән: НАТО Ливијадакы һәрби әмәлијјатларын биринҹи мәрһәләсинин баша чатдығыны вә икинҹи мәрһәләнин башландығыны бәјан едиб. Икинҹи мәрһәләдә мәгсәдин Ливија лидери Мүәммәр Гәззафинин команда мәнтәгәләринин мәһв едилмәси олдуғуну билдирән НАТО тәмсилчиләри Гәззафинин өзүнүн арадан ҝөтүрүлмәси һагда һеч бир сөһбәт ҝетмәдијини вурғулајыблар.
Амма Ливија лидеринин артыг 10 ҝүндүр ҝөрүнмәдији дејилир. Бәзи күтләви информасија васитәләри Гәззафинин јараландығыны вә ја өлдүрүлдүјүнү еһтимал едир.
НАТО-нун бирләшмиш команданлығынын нүмајәндәси, италијалы ҝенерал Клаудио Габеллини Гәззафинин һарада олдуғу вә вәзијјәти һагда мәлумат олмадығыны етираф едиб.
Ливија һакимијјәти исә өлкә башчысынын һәлак олан кичик оғлу Сејфүләрәбә јас сахладығыны хәбәр верир.
Сејфүләрәб мајын 1-нә кечән ҝеҹә НАТО тәјјарәләринин бомбардманында атасынын пајтахт Триполидәки игамәтҝаһында һәлак олуб. Һәмин бомбардманда Гәззафи дә игамәтҝаһында олуб вә о ҝүндән халг ону ҝөрмәјиб.
Ливијада февралын орталарындан халг үсјаны ҝедир. Әсас тәләб 1969-ҹу илдән һакимијјәт башында олан Мүәммәр Гәззафинин истефасыдыр. Тоггушмаларда минләрлә адам һәлак олуб.
Диггәт: Хәбәрдән истифадә етдикдә мәнбәјә истинад лазымдыр
