Әһли Бејт -АБНА- хәбәр аҝентлијинин вердији хәбәрә әсасән: Иҹтимаи Палатанын 2 апрел митингинә ҝөрә тутулараг ҹинајәт мәсулијјәтинә алынан Мүсават Партијасы Мәркәзи Иҹра Апаратынын рәһбәри Ариф Һаҹылынын һәбс гәтимкан тәдбиринин ев дустаглығы илә әвәз едилмәси һагда вәсатәтә бахылыб. “Медиа форум” сајтына данышан вәкил Әсабәли Мустафајев дејиб ки, апрелин 27-дә Сәбаил Рајон Мәһкәмәсинин һакими Фамил Нәсибов Ариф Һаҹылынын һүгугларыны мүдафиә едән вәкилләрин вәсатәтини гәбул етмәјиб: “Ариф Һаҹылы барәсиндә һәбс гәтимкан тәдбиринин сечилмәси һаггында гәрары да һаким Фамил Нәсибов чыхармышды. Бу сәбәбдән биз һакимә етиразымызы билдирдик. Лакин бу вәсатәтә дә тәмин олунмады”.
Ариф Һаҹылы Ҹинајәт Мәҹәлләсинин 233-ҹү маддәси илә (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә) иттиһам олунур. Апрелин 4-дә Сәбаил Рајон Мәһкәмәси онун барәсиндә 2 ај мүддәтинә һәбс гәтимкан тәдбири сечиб.
Вәкил Әсабәли Мустафајевин сөзләринә ҝөрә, бир аја јахындыр 2 апрел митингинә ҝөрә хејли шәхс һәбсә алыныб: “Лакин индијә гәдәр һеч бир истинтаг һәрәкәтләри апарылмыр. Садәҹә, јени шәхсләр сахлајыр, онлара ҹинајәт иши ачырлар”.
Диггәт: Хәбәрдән истифадә етдикдә мәнбәјә истинад лазымдыр
