Әһли Бејт -АБНА- хәбәр аҝентлијинин вердији хәбәрә әсасән:Бу мәсәлә Милли Мәҹлисин Һүгуг сијасәти вә дөвләт гуруҹулуғу Комитәсинин бу ҝүн кечирилән иҹласында мүзакирә олунуб.
Комитәнин иҹласында Азәрбајҹан Республикасынын Ҹинајәт Мәҹәлләсинә вә Ҹәзаларын Иҹрасы Мәҹәлләсиндә дәјишикликләр едилмәси барәдә ганун лајиһәсинә бахылыб. Билдирилиб ки, «азадлығын мәһдудлашдырылмасы» ҹәза нөвү олараг бу ҝүн өзүнү доғрултмур. Бу ҹәза нөвү илә мәһкум олунан инсанлар үзәриндә нәзарәти тәмин етмәк мүмкүн дејил.
Үмумиликдә Ҹинајәт Мәҹәлләсинә 59 дәјишиклик тәклиф олунуб, 3 маддә јени редаксијада верилиб, 3 маддәдә санксијалар дәјишдирилиб. Үмумиликдә дәјишикликләр 101 маддәни әһатә едир.
Дәјишикликләрә әсасән, азадлығын мәһдудлашдырылмасы ҹәзасы азадлыгдан мәһруметмә, ислаһ ишләри вә ја ҹәримә ҹәзалары илә әвәз олунаҹаг.
Дәјишикликләрдә кечид мүддәалар да нәзәрдә тутулуб. Белә ки, азадлығын мәһдудлашдырылмасы ҹәзасынын бу ганун гүввәјә миндији ҝүнәдәк чәкилмәмиш һиссәси 1 илдән артыг олмадыгда - бир ҝүн азадлығын мәһдудлашдырылмасы бир ҝүн ислаһ ишләри һесабланмагла, ислаһ ишләри ҹәзасы илә вә ја 300 манатдан 500 манатадәк ҹәримә ҹәзасы илә әвәзләнәҹәк. Ҹәзанын чәкилмәмиш һиссәси 1 илдән 2 иләдәк олдугда, 1 ҝүн азадлығын мәһдудлашдырылмасы бир ҝүн ислаһ ишләри һесабланмагла, ислаһ ишләри ҹәзасы вә ја 500 манатдан 800 манатадәк, ҹәзанын бу ганун гүввәјә минән ҝүнәдәк чәкилмәмиш һиссәси 2 илдән артыг олдугда, 800 манатдан 1000 манатадәк мигдарда ҹәримә ҹәзасы илә әвәз олунаҹаг.
Депутатларын фикир вә тәклифләри динләнилдикдән сонра ганун лајиһәләри парламентин иҹласына төвсијјә олунуб.
Диггәт: Хәбәрдән истифадә етдикдә мәнбәјә истинад лазымдыр
