Әһли Бејт -АБНА- хәбәр аҝентлијинин вердији хәбәрә әсасән: Гафгаз Мүсәлманлары Идарәсинин (ГМИ) Шимал бөлҝәси үзрә сәлаһијјәтли нүмајәндәси, бөлҝә газысы Һаҹы Наиб Сәттаров вәзифәсиндән азад едилиб. Онун вәзифәдән азад едилмәсинә сәбәб, һәбс едилмиш Азәрбајҹан Ислам Партијасынын (АИП) сәдри Мөвсүм Сәмәдов вә онун гоһумлары Дәјанәт Сәмәдов вә Фирдовси Мәммәдрзајеви мүдафиә етмәси олуб. Белә ки, онларын һүгуг-мүһафизә органлары тәрәфиндән сахланылмасындан сонра Губа рајон Иҹра Һакимијјәтиндә (РИҺ) тәдбир кечирилиб. Тәдбирдә РИҺ рәһбәрлији илә јанашы, диҝәр дөвләт гурумларынын, о ҹүмләдән Дини Гурумларла Иш үзрә Дөвләт Комитәсинин әмәкдашлары, бөлҝә зијалылары иштирак едиб. Тәдбирдә чыхыш едәнләр Д. Сәмәдову вә Ф. Мәммәдрзајевин һәрәкәтләрини писләјибләр. ГМИ-нин шимал бөлҝәси үзрә газысы Һаҹы Наиб Сәттаров исә чыхышында АИП сәдри мөвүсм Сәмәдову, Д. Сәмәдову вә Ф. Мәммәдрзајеви мүдафиә едиб. Һаҹы Наиб һәтта Ф. Мәммәдрзајевә хитабән “о мәним гардашымдыр” дејиб.
Гејд едәк ки, faktxeber.com-ун "ГајнарХәтти"нә зәнҝ едән Губа шәһәринин сакинләри бөлҝә газысы Һаҹы Наиб Сәттаровун чыхышы заманы Ислам Партијасынын сәдри Доктор Мөвсүм Сәмәдов вә онун гоһумлары Д. Сәмәдов вә Ф. Мәммәдрзајеви мүдафиә етмәсини билдирибләр.
Бир һәфтә сонра Һаҹы Наиб ГМИ-јә чағырылыб вә ГМИ-нин Шимал бөлҝәси үзрә сәлаһијјәтли нүмајәндәси, бөлҝә газысы вәзифәсиндән азад едилиб.
ГМИ-нин мәтбуат хидмәтинин рәһбәри Рәһимә Дадашова АПА-ја ачыгламасында Һаҹы Наибин ишдән чыхмасы фактыны тәсдигләјиб. Лакин о билдириб ки, Һаҹы Наиб Сәттаров ишдән чыхарылмајыб, вәзифәдән өз әризәси илә узаглашыб: “Әризәсиндә шәкәр хәстәлијиндән әзијјәт чәкдијинә ҝөрә вәзифәдән чыхмаг истәдијини билдириб”.
Диггәт: Хәбәрдән истифадә етдикдә мәнбәјә истинад лазымдыр
