Әһли Бејт -АБНА- хәбәр аҝентлијинин вердији хәбәрә әсасән: Һүгуг мүдафиәчиси Лејла Јунус Азәрбајҹан Дөвләт Нефт Академијасында (АДНА) 2009-ҹу ил апрелин 30-да төрәдилмиш гырғында тәгсирли билинән шәхсләрин апеллјасија шикајәтинә бахыларкән дедикләринә белә мүнасибәт билдириб: “Инсанлара ишҝәнҹә вериб сахта ифадәјә имза атдырмаг Азәрбајҹанда тәбии һалдыр”.
Тәгсирли билинәрәк өмүрлүк азадлыгдан мәһрум едилмиш Надир Әлијев 2011-ҹи ил јанварын 26-да Бакы Апеллјасија Мәһкәмәсиндә кечирилән просесдә билдириб ки, ибтидаи истинтаг заманы Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәсиндә ишҝәнҹәләрә мәруз галыб: “Мәндән ифадәни ишҝәнҹәләр алтында алыблар. Бу ифадәләрин алынмасы үчүн мәни ҝөјдән асыблар. Үч ҝүн мәни дөјүбләр, Фәрда Гәдировун силаһы һардан алдығыны сорушублар. “Билмирәм” дејәндә мәни дөјүбләр. Ахырда мәҹбур олуб Фәрда Гәдировун силаһы Бакыдан алдығыны демишәм. Үч ҝүн мәни Бакыда олан овчулар мағазаларыны ҝәздирдиләр. Сонрадан сүбут етдиләр ки, Фәрда Гәдиров силаһы Ҝүрҹүстандан алыб.
АДНА-нын јахынлығында олмағым барәдә ифадәни дә мәндән ҝөјдән асылы вәзијјәтдә алыблар. Мәни асмагла, ишҝәнҹә вермәклә үрәкләри сојумады. Ҹинсијјәт органларымы тока вердиләр. Намусума тохунублар, мәни бутулка үстүндә отуздуруб ифадә алыблар. Дөзә билмәдим, онларын мәним адыма јаздығы ифадәјә гол чәкдим. Бунлары да “Бандотдел”дә Тејјуб, Мүзәффәр адлы шәхсләр едиб” (Мәнбә: “Бизим јол” гәзети, 27 јанвар 2011-ҹи ил).
“Медиа форум”а данышан Лејла Јунус тәгсирләндирилән шәхсләрин јеҝанә чыхыш јолунун Авропа Инсан Һүгуглары Мәһкәмәсинә шикајәт вермәк олдуғуну сөјләјиб: “Нечә илләрдир ки, биз мәһкәмәләри изләјирик вә бу ганун позунтулары барәдә иҹтимаијјәтә мәлумат веририк. Һакимләр тәгсирләндирилән шәхсин ишҝәнҹәјә мәруз галмасына, вердикләри ифадәнин јалан олдуғуна даир сөзләринә ҝөз јумурлар. Ишҝәнҹә верәнләр һеч бир мәсулијјәтә ҹәлб олунмур вә һәр дәфә даһа да ҝүҹләнирләр. Әфсуслар олсун ки, Азәрбајҹанда мүстәгил мәһкәмә јохдур вә һакимләр гануну позараг әсл ҹинајәткарлары ҹәзаландырмыр.
Әслиндә, ганунла мәһкәмә тәгсирләндириләнләрин бу сөзләриндән сонра јени иш ачмалы иди. Амма Азәрбајҹан вәтәндашлары Азәрбајҹанда әдаләтли мәһкәмә һүгугундан мәһрумдурлар. Бу шәхсләрин јеҝанә чыхыш јолу Авропа Инсан Һүгуглары Мәһкәмәсинә мүраҹиәт етмәкдир”
2009-ҹу ил апрелин 30-да Ҝүрҹүстан вәтәндашы Фәрда Гәдиров Азәрбајҹан Дөвләт Нефт Академијасына силаһлы басгын едәрәк 12 нәфәри гәтлә јетириб, 15 нәфәри јаралајыб, даһа сонра өзүнү өлдүрүб. Азәрбајҹанда бу ҹинајәтә ҝөрә дөрд нәфәр мәһкум олунуб - Надир Әлијев, Ариз Габулов, Ҹавидан Әмиров вә Нәҹәф Сүлејманов. Бу шәхсләр террору Фәрда Гәдировла бирҝә Ҝүрҹүстан вәтәндашы, Марнеули рајонунун Шулавер кәндиндә јашајан Мардун Гумашјанын сифариши илә һазырламагда тәгсирли билинибләр. Августун 10-да Ағыр Ҹинајәтләр Мәһкәмәси Ҹавидан Амиров, Нәҹәф Сүлејманов вә Надир Әлијевә өмүрлүк, Ариз Габулова исә 11 ил азадлыгдан мәһрум етмә ҹәзасы тәјин едиб. Фәрда Гәдировун өлүмү илә әлагәдар ҹинајәт ишинин онун барәсиндә олан һиссәсинә хитам верилиб.
Мардун Гумашјан һазырда Марнеули рајонунун Шулавер кәндиндә јашајыр. Азәрбајҹан ону Интерпол хәтти илә бејнәлхалг ахтарыша вериб.
Диггәт: Хәбәрдән истифадә етдикдә мәнбәјә истинад лазымдыр
