Әһли Бејт -АБНА- хәбәр аҝентлијинин вердији хәбәрә әсасән: артыг ики аја јахындыр өлкәдә һөкм сүрән һиҹаб гадағасы вә онун ҝүндәмдә тутдуғу мөвге, јерини һеч нәјә вермир. Бу ҝүндәмә гадағадан бир ај сонра диндраларын һәбси әлавә олунса да, мөвзу актуаллығыны сахлајыр. Апарылан диндар "ову"нун елә һиҹаб гадағасынын мәнтиги давамы олдуғу ајдынлашды. Ики аја јахындыр һиҹаблы ханымлар истәр тәһсил алмагдан, истәрсә дә тәдрисдән зорән узаглашдырылыб.
Дүздүр, арада 1-2 ҝүн бу гадаға тәһсил назири Мисир Мәрдановун, "валидејнләр ушагларыны да ҝөтүрүб директорларын јанына ҝетсин вә сөһбәт етсинләр", сөзләри илә јумшалса да, сонрадан Тәһсил Назирлијинин јеткилиси тәрәфиндән бу фикир башга ҹүр јозулду вә о ачыглама верәрәк, назирин сөзләринин дүзҝүн баша дүшүлмәдијини билдирди. О сөјләди ки, бу әслиндә "валидејнләр ҝетсинләр директорларын јанына вә директорлар да онлара баша салсынлар ки, тәһсил ваҹибдир, ушагларынызын башыны ачын, гој дәрсә ҝәлсинләр" кими баша дүшүлмәлидир.
Неҹә дә гәрибә бир дөвләтдә јашајырыг. Елә бир дөвләтдә ки, бизим назирләрин әксәријјәтинин данышығыны баша дүшмәк үчүн ҝәрәк сонрадан бир нәфәр дә чыхыб десин ки, бәс назирин дедијиндән бу гәнаәти јох, филан гәнаәти чыхарын.
Гејд етмәк јеринә дүшәрди ки, назирин мәлум ачыгламасындан сонра бөјүк әксәријјәт мәктәбләрдә һиҹаблы ханымлар тәһсилләринә давам етмәјә башламышдылар. Амма даһа сонра ханымлар јенидән тәһсил мүәссисәләринә бурахылмадылар. Ҝөрүнүр кимләрсә, диндарларын сәбр касасынын дашмасында мараглыдыр вә она ҝөрә дә ҝүндә бир ачыглама илә әсәбләри тарыма чәкмәк истәјирләр.
Бу ҹүр әҹаиб-гәраиб ачыгламалара, тәхрибатчы чыхышлара бирдәфәлик сон гојулмасыны, өвладларынын тәһсилинә иҹазә верилмәсини истәјән диндарлар исә бу ҝүн сәһәрдән "Тәзә Пир" мәсҹидинә топлашараг, Гафгаз Мүсәлманлары Руһани Идарәсинин сәдри Һаҹы Аллаһшүкүр Пашазадә илә ҝөрүшмәк истәјибләр. Идарәнин бинасы гаршысына топлашан диндарлара исә шејхлә ҝөрүшә иҹазә верилмәјиб. Буну ҝөрән диндарлар "Тәзә Пир" мәсҹидинә дахил олараг, орада өз бәјанатларыны охујублар. Бәјанат охудуган сонра, диндарлар мәсҹидини тәрк етмәјә башлајыблар.
Гејд едәк ки, мәсәлә илә әлагәдар Тәзә Пир мәсҹидинин һәјәтиндә чәкилиш апаран операторумуздан биринин камерасы әлиндән алынараг чәкилишләри силиниб.
БӘЈАНАТ
"Илаһи!" Биз Пејғәмбәримизин һәјатда олмамасындан, имамымызын гејбдә олмасындан, дүшмәнләримизин чохлуғундан, сајымызын азлығындан, фитнәләрин шиддәтиндән, зәманәнин бизим әлејһимизә тәзаһүр етмәсиндән сәнә шикајәт едирик. Илаһи, Мәһәммәд вә онун аиләсинә салават ҝөндәр..." (Ифтитаһ дуасындан)
Дини етигад азадлығы һаггында Азәрбајҹан Республикасы ганунунун "Дини етигад азадлығы" илә әлагәдар 1-ҹи маддәсиндә дејилир: "Һәр кәсин һәр һансы динә тәкбашына вә ја башгалары илә бирликдә етигад етмәк, динә мүнасибәти илә бағлы әгидәсини ифадә етмәк вә јајмаг һүгугу вардыр. Валидејнләр вә ја онлары әвәз едән шәхсләр гаршылыглы разылыг әсасында ушагларыны өзләринин дини әгидәсинә вә динә мүнасибәтинә мүвафиг олараг тәрбијә едә биләрләр"
Республикамызда Ислам дининә етигад едән диндарлар Ислам әһкамларындан бири олан баш өртүсү әмрини һәјата кечирәркән вә ону јајаркән мүстәгил республикамызын һеч бир ганунуну позмамышлар. Буна бахмајараг дөвләтимизин бәзи мәмурлары дөвләт илә диндарлар арасында наразылыглар јаратмаға сәј ҝөстәрирләр.
Тәәссүф доғуран башга бир дурум да одур ки, һиҹабла бағлы һәр бир етираз вә јахуд наразылыг ајры-ајры дин адамларынын тутулуб-сахланмасы илә нәтиҹәләнир.
Виҹдан азадлығына һөрмәтлә јанашылан демократик бир өлкәдә дин ганунларына гаршы белә мүнасибәт мүстәгил дөвләтимизә баш уҹалығы ҝәтирмәз.
Биз Азәрбајҹан руһаниләри вә диндарлары һиҹаб гадағасыны, бу мәсәлә илә әлагәдар ҝүлүнҹ бәһанәләрлә иттиһам олунараг һәбс олунмуш шәхсләрин сахланмасыны мәһкум едирик. Һабелә сөзү ҝедән мәсәләләрин тезликлә мүсбәт шәкилдә һәлл олунмасыны, сон заманлар КИВ-дә мүшаһидә олунан, дини тәһсилә малик олмајан инсанлар тәрәфиндән, динә вә диндарлара гаршы гәрәзли чыхышлара сон гојулмасыны тәләб едирик.
Дедикләримизә әлавә олараг гејд етмәк истәјирик ки, өлкә диндарларынын Ислам дининин әһкамларына самими сәдагәтинин ајри-ајры өлкәләрин сифариши кими дәјәрләндирилмәсини диндар тәбәгәјә тәһгир кими гәбул едир, бу фикирләрин диггәти бизим һагглы тәләбләримиздән јајындырмаға јөнәлдијини тәкидлә вурғулајырыг.
Фикиримизсә проблемин һәллинә мане олан амилләри өлкә һүдүдларынадан кәнарда дејил, бәзи мәмурларын нашы аддымларындан ахтармаг лазымдыр.
Инанырыг ки, Азәрбајҹан халгынын дини дәјәрләринә тарихи бағлантысына һөрмәтлә јанашараг проблемин конкрет һәлли јөнүмүндә мүсбәт аддымлат атылаҹаг.
"Сөзләри динләјиб ән јахшысына табе олан бәндәләримә мүждә вер" (Зумәр 17-18)
Диггәт: Хәбәрдән истифадә етдикдә мәнбәјә истинад лазымдыр
