МӘЛ`УН ЛИБЕРМАН МӘММӘДЈАРОВА ГӘЗЗА ПЛАНЫ ТӘГДИМ ЕДИБ

Әһл Бејт – АБНА – хәбәр аҝентлијинә верилән хәбәрә әсасән Газахыстанын Алматы шәһәриндә өтән һәфтә сону баша чатан АТӘТ үзвү олан вә бу тәшкилатла тәрәфдашлыг едән өлкәләрин хариҹи ишләр назирләринин гејри-рәсми топлантысы чәрчивәсиндә Исраил вә Азәрбајҹан хариҹи ишләр назирләри арасында ҝөрүш олуб. “ИзРус” порталы хәбәр верир ки, ҝөрүш Исраил хариҹи ишләр назири тәрәфиндән Гәззаја даир јени планынын тәгдим едилмәси илә әлагәли иди. Билдирилир ки, Исраил хариҹи ишләр назири Авигдор Либерман әввәлҹә Түркмәнистан хариҹи ишләр назири Рәшид Мередовла ҝөрүшүб. Исраил нүмајәндә һејәтиндәки мәнбәләрдән мәлум олуб ки, ҝөрүш кифајәт гәдәр узун олуб вә тәрәфләр Јахын Шәргдәки вәзијјәти, һабелә икитәрәфли мәсәләләри мүзакирә едибләр. Ҝөрүш заманы Либерман Мередова Гәззаја даир јени планы да тәгдим едиб. О дејиб ки, планы тәрәфдаш мүсәлман өлкәләрин һамысы илә мүзакирә етмәк нәзәрдә тутулур. Плана ҝөрә, Исраил Гәззада баш верәнләрә ҝөрә бејнәлхалг һүгуг нөгтеји-нәзәриндән бүтүн мәсулијјәти үзәриндән атмаға һазырлашыр. Белә ки, Исраил БМТ-нин вә Авропа Иттифагынын фәал иштиракы илә Гәззада јашајыш објектләри, инфраструктур вә диҝәр лајиһәләр һәјата кечирмәк истәјир. Бундан әлавә Гәззаја јүк апаран ҝәмиләрин Исраил тәрәфиндән дајандырылмасы вә јохланылмасы практикасы ҝөтүрүләҹәк. Бу миссијаны авропалылара вермәк нәзәрдә тутулур. Лакин Исраил Гәзза сектору илә гуру сәрһәдләрини там бағлајаҹаг вә бу бөлҝәдә баш верәнләрә ҝөрә бүтүн мәсулијјәтин “Һәмас”ын үзәриндә галаҹағыны елан едәҹәк. Бүтүн бунларын әвәзиндә БМТ, АИ вә диҝәр бејнәлхалг гурумлар елан етмәлидир ки, Гәзза секторунун Исраил тәрәфиндән ишғалы баша чатыб вә бу бөлҝәдә баш верәнләр үчүн јәһуди дөвләти мәсулијјәт дашымыр. Мәлумата ҝөрә, Либерман һәмин планы Азәрбајҹан хариҹи ишләр назири Елмар Мәммәдјарова вә Газахыстан хариҹи ишләр назири Канат Саудабајевә тәгдим едиб. Бу һәфтә исә план Исраилә сәфәр едәҹәк авропалы назирләрлә мүзакирә олунмалыдыр. Исраил хариҹи ишләр назири планы Азәрбајҹан, Түркмәнистан вә Газахыстанла мүзакирә етмәсини онунла әсасландырыр ки, бу өлкәләрин әрәб дөвләтләри илә сых мүнасибәтләри вар. Бу сәбәбдән Либерман хаһиш едиб ки, һәмин өлкәләр әрәб дөвләтләри илә тәмаслара кечәрәк Исраилин планыны онлара изаһ етсинләр. Астанада Исраил хариҹи ишләр назиринин бүтүн бу тәмасларынын гејри-формал шәраитдә кечдији билдирилир. Хатырладаг ки, Исраилин Гәззаја јардым апаран ҝәми карванына бејнәлхалг суларда басгын етмәси вә 9 түркү өлдүрмәси ҹидди бејнәлхалг галмагала, јәһуди дөвләтинә гаршы кәскин етиразлара сәбәб олуб. Бу һадисә “Һәмас”ын нәзарәтиндә олан Гәзза секторунун Исраил тәрәфиндән блокадада сахланылмасына диггәти ҹәлб едиб. Исраиллә Түркијә арасында мүнасибәтләр дүшмәнчилик һәддинә чатыб. Азәрбајҹан президенти Илһам Әлијев дә Түркијәјә сәфәри заманы ҝәми басгыны писләјән бәјанат верәрәк Анкараны дәстәкләјиб. Исраил исә блокаданы бир гәдәр јумшалдыб, белә ҝөрүнүр ки, һәм дә Гәзза башағырысындан гуртулмағын јолларыны ахтармаға башлајыб.