АБНА24 Хәбәр Верир , Авропа Иттифагы (АИ) Шурасынын президенти Шарл Мишел Азәрбајҹан президенти Илһам Әлијев вә Ермәнистанын баш назири Никол Пашинјанла икинҹи үчтәрәфли ҝөрүшүндән сонра бәјанат јајыб.
Бәјанатда Шарл Мишел АИ-нин ҝәрҝинлијин арадан галдырылмасында јахындан ишләмәк вә реҝионда јашајан бүтүн инсанларын рифаһы наминә тәһлүкәсиз, сабит, динҹ вә фираван Ҹәнуби Гафгаз реҝионуну тәшвиг етмәк үчүн Ермәнистан вә Азәрбајҹан илә әмәкдашлығы дәринләшдирмәјә садиглијини бир даһа вурғулајыб.
Гејд едилир ки, лидерләр 10 нојабр 2020-ҹи ил тарихли үчтәрәфли бәјанатын мүддәаларына там әмәл олунмасынын зәрурилијини тәкрарлајыблар. Тәрәфләр 2022-ҹи ил мартын 30-да АИ-нин васитәчилији илә Брүсселдә Ермәнистан вә Азәрбајҹанын јүксәк сәвијјәли нүмајәндәләринин ҝөрүшүнү алгышлајыблар вә лидерләр сәвијјәсиндә әлдә олунмуш разылашмаларын тәминаты үчүн бу әлагәнин давам етдирилмәсинин зәрурилији барәдә разылыға ҝәлибләр.
Президент Мишел һәр ики тәрәфин етимад вә динҹ јанашы јашајышы тәшвиг етмәк үчүн һуманитар жестләринин ваҹиблијини вурғулајыб. О, бүтүн һәлл едилмәмиш һуманитар мәсәләләрин һәллинин зәрурилијини вурғулајыб вә Авропа Иттифагынын бу сәјләри дәстәкләмәјә һазыр олдуғуну билдириб.
Шарл Мишел сонра һәм Азәрбајҹан президенти Илһам Әлијевин, һәм дә баш назир Никол Пашинјанын өлкәләри арасында сүлһ сазишинә доғру сүрәтлә ирәлиләмәк арзусуну бәјан етдикләрини гејд едиб. Бу мәгсәдлә хариҹи ишләр назирләринә бүтүн зәрури мәсәләләри һәлл едәҹәк ҝәләҹәк сүлһ мүгавиләсинин һазырланмасы үзәриндә ишләмәјин тапшырылмасы разылашдырылыб.
Гејд едилир ки, икитәрәфли сәрһәдләрин делимитасијасы вә демаркасијасы ваҹиб олаҹаг, бу мәгсәдлә 26 нојабр 2021-ҹи ил тарихли Сочи Бәјанатына ујғун олараг апрелин сонунадәк Бирҝә Сәрһәд Комиссијасынын чағырылмасы да разылашдырылыб.
Лидерләр һәмчинин Ермәнистан вә Азәрбајҹан арасында, хүсусән дә Ҹәнуби Гафгазда коммуникасија/әлагә инфраструктурунун бәрпасыны мүзакирә едибләр. Президент Шарл Мишел дәмир јолу хәтләринин бәрпасы истигамәтиндә атылан аддымлары алгышлајыб, ејни заманда Ермәнистан вә Азәрбајҹаны јол әлагәләринин бәрпасы үчүн еффектив һәлл јоллары тапмағы тәшвиг едиб.
342/
8 aprel 2022 - 10:49
Xəbər kodu: 1245922
Азәрбајҹан вә Ермәнистан сүлһ мүгавиләсинин һазырланмасы барәдә разылыға ҝәлибләр.
