Илһам Әлијев: Иранла достлуг вә тәрәфдашлыг әлагәләримиз вар

АБНА24 Хәбәр Верир, дөвләт башчысы дејиб: “Иран вә Ҝүрҹүстанла даим тәмаслар әснасында, фикир мүбадиләси әснасында достлуг вә тәрәфдашлыг әлагәләри даһа да инкишаф етмишдир. Артыг реҝионда чохтәрәфли әмәкдашлыг платформу формалашыр вә әлбәттә ки, бу, бизим марагларымыза ҹаваб верир.”

Ермәнистанла әлагәләрин нормаллашмасына ҝәлинҹә президент билдириб ки, нә вахтса Ермәнистанла да гоншулуг әлагәләри гурулаҹаг. “Һәр һалда нојабр вә декабр ајларында Сочи вә Брүссел шәһәрләриндә кечирилмиш ҝөрүшләр үмидвериҹидир вә үмид едирәм ки, бу ҝөрүшләрдә әлдә едилмиш разылашмалар 2022-ҹи илдә реал һәјатда өз әксини тапаҹагдыр.”

Илһам Әлијев сонра Русија илә әлагәләрин инкишаф темпиндән разылыг ифадә едиб. “Русија илә әлагәләримиз уғурла инкишаф едир. Әминәм ки, нөвбәти дөврдә Русија илә дә бизим әлагәләримиз даһа јүксәк сәвијјәјә рәсмән галдырылаҹагдыр”-, дејә Азәрбајҹан дөвләт башчысы вурғулајыб.

Президент мүраҹиәтинин давамында бејнәлхалг тәшкилатлар арасында Ислам Әмәкдашлыг Тәшкилатынын Азәрбајҹана даһа чох дәстәк вердијини хатырладыб вә дејиб: “Ислам Әмәкдашлыг Тәшкилаты әнәнәви олараг Азәрбајҹанын һаглы мөвгејини дәстәкләјән бејнәлхалг тәшкилатдыр. Бу ил дә бу дәстәји биз һисс етмишик, мүһарибәдән сонра мүһарибәнин нәтиҹәләринин гәбул етдирилмәси үчүн Ислам Әмәкдашлыг Тәшкилатынын фәалијјәтини мән јүксәк гијмәтләндирирәм.”

Илһам Әлијев даһа сонра игтисади ҝөстәриҹиләрә тохунараг дејиб: “Азәрбајҹан игтисадијјаты кечән илин 11 ајында 5,3 фаиз, гејри-нефт игтисадијјаты исә 6,4 фаиз артыб. Сәнаје истеһсалы 5,5 фаиз, гејри-нефт секторунда сәнаје 20,7 фаиз артыб. Һәмчинин өлкәнин валјута еһтијатлары 2,2 милјард доллар артыб вә тиҹарәт әлагәләринин мүсбәт салдосу 9,4 милјард доллардыр.

Азәрбајҹан Республикасынын президенти сонда 2022-ҹи или "Шуша или" елан едиб. “Биз 2022-ҹи илдә Шуша шәһәринин 270 иллијини гејд едәҹәјик. Пәнаһәли хан 1752-ҹи илдә Шушанын тәмәлини гојуб вә биз јени илдә бу јубилеји бөјүк тәнтәнә илә гејд едәҹәјик. Бу шанлы тарихи нәзәрә алараг вә Шушанын бәрпасыны сүрәтләндирмәк мәгсәдилә мән јени или “Шуша Или” елан едирәм”-, дејә Әлијев гејд едиб.

342/