Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, 15 Хордад (4 Ијун) Ислам Ингилабынын Баниси Имам Хомејни һәзрәтләринин фани дүнја илә видалашыб Әбәдијјәтә говушан ҝүнүдүр.
Имам Хомејни һәзрәтләринин һәјатына гыса бахыш:
Руһуллаһ Мустафави Мусәви Хомејни 1902-ҹи илдә сентјабр ајынын 24-дә Иранын Хомејн шәһәриндә анадан олмушдур. 5 ајлығында икән атасы Сејјид Мустафаны, 15 јашында исә анасыны итирмишдир.
Ушаг јашларындан башлајараг дини мәдрәсәләрдә әрәб дили вә әдәбијјаты, мәнтиг, фигһ, үсул вә башга елмләри өјрәнмишдир.
1919-ҹу илдә Әрак Елмијјә Мәдрәсәсинә гәбул олунан Хомејни бурада бир мүддәт тәһсил алдыгдан сонра Гум шәһәриндә Елмијјә Мәдрәсәсинә дахил олмушдур. Фигһ вә үсул дәрсләриндә мүвәффәгијјәт газанараг гыса заманда иҹтиһад (мүҹтәһидлик) дәрәҹәсини әлдә етмишди.
Ајәтуллаһ Хомејни фәлсәфә, тәһзиби нәфс вә әхлаг кими фәнләрдән дәрс демәјә башламыш вә танынмыш Гум алимләри арасында јер алмыш, сонралар исә фигһ вә үсул дәрсләринин мәшһур мүәллимләриндән бири олмушдур. Хомејни о дөврдә һөкумәт әлејһинә олан шәхсләрлә әмәкдашлыг едәрәк Рза шаһа вә Пәһләви сүлаләсинә гаршы мүбаризә апарырды.
О, 1958-ҹи илдә әјаләт вә вилајәт ҹәмијјәтләринин гурулмасы вә шаһын гәбул етдији алты маддәлик ганунун гүввәјә минмәси илә шаһ режими әлејһинә ҹидди шәкилдә мүбаризәјә башлады.
1961-ҹи ил 5 ијунда баш верән ганлы һадисәдән сонра режим әлејһинә сөјләдији бир нитгинә ҝөрә һәбс едиләрәк Теһрандакы Ишретабад һәрби һәбсханасында сахланылыр.
1965-ҹи илин 4 нојабрында Түркијәјә сүрҝүн едилди. Имам Хомејни бир мүддәт орада галдыгдан сонра Иранын бу өлкәјә тәзјигиндән сонра Ирага кечди вә Нәҹәф шәһәринә јерләшди. Бурада 13 ил сүрҝүн һәјаты кечирир.
Иранын Ирага тәзјигиндән сонра Хомејни бу өлкәдән 1357-ҹи ил, 14 Меһр ајында (1978-ҹи ил, 6 Октјабр) Франсаја көчмүш вә Парисдән 35 км гырағда јерләшән Нофл-ле-Шато шәһәрҹијиндә ҹәми 116 ҝүн (4 аја јахын) јашамышдыр. Өлкәсиндән чох узагда олмасына бахмајараг Хомејнинин сәс јазылары һәр һәфтә Ирана ҝәтириләрәк мүхтәлиф мәканларда динләнилирди.
1357-ҹи ил, Бәһмән ајынын әввәләриндә (1979-ҹу илин Јанвар ајынын сонларында) шаһын Теһраны тәрк етмәсиндән сонра 1357-ҹи илин Бәһмән ајынын 12-дә (1979-ҹу илин 1 Февралында) Ајәтуллаһ Хомејни Ирана гајытмыш вә фактики олараг өлкәнин лидеринә чеврилмишдир. Бунунла белә, Теһранда јашамаг истәмәјәрәк, өмрүнүн сонунадәк дөвләти Гумдакы кичик мәнзилиндән идарә етмишдир.
Һәјаты боју Америка Бирләшмиш штатлары вә Исраилә дүшмән мүнасибәтләри сәрҝиләмиш, Исраил зүлмүнә гаршы Фәләстинә вә Ливана мадди вә һәрби дәстәк вермишдир.
1989-ҹу илдә 4 ијун тарихиндә Теһран шәһәриндә вәфат етмишдир.
Диггәт: Хәбәрдән Истифадә Етдикдә Мәнбәјә Истинад Лазымдыр!
