"Нардаран иши": Вәкилләри ҝиров сахламысыныз

Әһлибејт (ә) Хәбәр аҝентлијинин вердији мәлумата ҝөрә-Һаким Әлөвсәт Аббасовун сәдрлик етдији иҹласда тәгсирләндирилән шәхсләр иштирак етмәјибләр. Буна етираз едән онларын јахынлары исә залы тәрк едибләр. Һаким сәнәдләрин тәдигиг мәрһәләсинә башладыгларыны дејиб. Бу исә вәкилләр тәрәфиндән наразылыгла гаршыланыб. Вәкил Немәт Кәримли өтән иҹласдан сонра тәгсирләндирилән шәхсләрлә ҝөрүшмәдикләрини дејиб. О, ҝөрүшүб мәсләһәтләшмәк истәдикләрини билдириб. Һаким исә онлара тәҹридханада ҝөрүшмәји мәсләһәт билиб. Һаким ҹинајәт ишиндә олан бир нечә сәнәди елан едиб. Мадди сүбутларын ҝөтүрүлмәси һаггында сәнәд елан олунан заман вәкил Јалчын Иманов просесин бу шәкилдә апарылмасына етираз едиб. О билдириб ки, сәнәдләрин тәдгиги дејилдикдә јалныз онларын елан едилмәси нәзәрдә тутулмур. Вәкил һәр сәнәдлә бағлы вәсатәт вермәк, фикир билдирмәк һүгугларынын олдуғуну дејиб вә буну ганун позунтусу кими гијмәтләндириб:
"Белә тәдгиг олмаз ахы. Бу, Ҹинајәт Просессуал Мәҹәлләјә ујғун олмалыды. Тәрәфләр мүнасибәт билдирмәлидир. Сиз бизим бүтүн вәсатәтләри рәдд етдиниз, әҹәб еләдиниз. Һеч олмаса бу мәрһәләдә гануну позмајаг. Бу иш Авропа Мәһкәмәсинә ҝедәҹәк".
Һаким исә вәсатәтләри һамысынын рәдд едилмәси фикри илә разылашмајыб. Билдириб ки, вәсатәтләрдән бәзиләри тәмин едилиб, бәзиләри тәмин едилмәјиб:
"Сиз сонда вәсатәт верәрсиниз. Авропа Мәһкәмәсинә шикајәт исә өз ишиниздир".
Бундан сонра вәкилләр иҹласа сәдрлик едән һаким Әлөвсәт Аббасова етираз вермәк истәдикләрини вә онун јазылмасы үчүн вахт верилмәсини истәјибләр. Буна ҝөрә иҹласда фасилә елан едилиб.
"Биз онлары неҹә мүдафиә едәк?"
Фасиләдән сонра вәкил Јалчын Иманов билдириб ки, тәгсирләндирилән шәхсләр онлардан имтина едибләр. Мәһкәмә имтинаны гәбул етмәјиб.
Вәкил Јалчын Иманов исә дејиб ки, мәһкәмә гәрарыны дәрк етмәк истәјир:
"Тәгсирләндирилән шәхсләр имтина едибләр, сиз дејирсиниз ки, отур, мүдафиә елә. Биз неҹә отураг?"
Тәгсирләндирилән шәхсләрдән Рамин Јарыјевин вәкили Ҝүлшән Салманова исә дејиб ки, мәһкәмә онлары пис вәзијјәтдә гојур:
"Онлар биздән имтина едибсә, биз онлары неҹә мүдафиә едәк?"
Һаким исә билдириб ки, тәгсирләндирилән шәхсләр мәһкәмәјә һөрмәтсизлик едибләр, вәкилләр исә просеси узатмаг истәјирләр:
"Диварлара јаздыглары, әл һәрәкәтләри нәдир? Һамысы актлашдырылыб. Дејирик, һеч бири ҝәлиб мәһкәмәдә иштирак етмир. Тәләб едирләр Талеһ Бағырзадә дә иштирак етсин. Мәһкәмәјә һөрмәтсизлији һеч ким гәбул етмәз".
Бундан сонра вәкилләр һаким Әлөвсәт Аббасова етиразла бағлы әризәни мәһкәмәјә тәгдим едибләр.
Билдирибләр ки, һаким гәрәзлидир. Лакин мәһкәмә вәсатәтит бахылмамыш сахлајыб.
"Ән јахшысы, сиз һөкмү елан един"
Вәкил Немәт Кәримли дејиб ки, вәкилләрдән тәгсирләндирилән шәхсләр имтина едибләр вә бу, гәбул едилмир:
"Бу, ҝөрүнмыјән бир шејдир. Вәкилләри ҝиров сахламысыныз. Биз мәҹбур галмышыг өзүмүзү мүдафиә едәк. Ҝүлүнҹ вәзијјәтә дүшмүшүк". Бундан сонра вәкилләр бүтүн мәһкәмә тәркибинә етираз едибләр. Лакин һәмин вәсатәт дә тәмин едилмәјиб. Вәкилләр исә белә олан һалда Вәкилләр Коллеҝијасы илә мәсләһәтләшмәјә еһтијаҹ јарандығыны дејибләр вә мәсләһәтләшмәк үчүн вахт истәјибләр. Иҹласда фасилә елан едилиб. Фасиләдән сонра вәкил Јалчын Иманов билдириб ки, Вәкилләр Коллеҝијасына ҝедибләр, лакин онлардан иҹласда иштирак етмәк тәләб едилиб:
"Бизә дедиләр ки, ҝәләҹәјинизи билирдик вә "Һејваҝүлү". Јәни ојнамаг лазымдыр. Бу ҝүлмәлидир. Ән јахшысы, сиз һөкмү елан един". Бундан сонра иҹлас давам едиб. Һаким сәнәдләри елан едиб.
Просес декабрын 19-да давам едәҹәк.
Диггәт! Хәбәрдән истифадә етдикдә мәнәбјә истинад лазымдыр!