Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Сентјабрын 22-дә Бакы Ағыр Ҹинајәтләр Мәһкәмәсиндә “Мүсәлман Бирлији” Һәрәкатынын һәбсдә олан сәдри Тале Бағырзадә, АХҸП сәдринин мүавини Фуад Гәһрәманлы вә диҝәрләринин мәһкәмә просеси давам етдирилиб.
“Даш парчасы әлимә дәјди”
Һаким Әлөвсәт Аббасовун сәдрлији илә кечирилән иҹласда Сабунчу рајон Полис Идарәсинин Пост-Патрул Хидмәт Бөлүјүнүн әмәкдашы Хәјјам Ҹамалов шаһид вә зәрәрчәкмиш шәхс гисминдә ифадә вериб. Онун сөзләринә ҝөрә, 2015-ҹи илин 5 нојабрында онлара ефир вә телефон васитәси илә хәбәр верилиб ки, бир груп шәхс Сабунчу рајон Полис Идарәсинин гаршысында јығышараг шүарлар сәсләндирир: “Биз дә ораја ҝетдик. Онлар сәс-күј салараг асајиши позуб, “Мүсәлман Бирлији” Һәрәкатынын сәдр мүавини Елчин Гасымовун азадлыға бурахылмасыны тәләб едирдиләр. Аксија иштиракчылары даш вә дәмир парчаларындан истифадә едәрәк, полис әмәкдашларына хәсарәт јетирибләр. Һадисә вахты бир полис әмәкдашы алнындан хәсарәт алыб. Даш парчасынын бири дә мәним әлимә дәјди. Аксија иштиракчылары 150 нәфәрә гәдәр оларды” .
Вәкил Јалчын Иманов исә ондан 26 нојабрда Нардаранда баш вермиш һадисәләрлә әлагәсинин олуб-олмамасыны сорушуб. Шаһид һәмин мәсәләдән хәбәринин олмадығыны дејиб. О, ифадә верән заман прокурор Илкин Гафаров шаһидә истигамәт верәрәк көмәк едиб. Бу да тәгсирләндирилән шәхсләрин наразылығына сәбәб олуб. Фуад Гәһрәманлы һакимә ирадыны билдирәрәк дејиб ки, јалныз тәгсирләндирилән шәхсләрә ирад билдирирләр, лакин прокурорун шаһидә көмәк етмәсинә ҝөз јумурлар: “Әкс һалда прокурорунун дәјишдирилмәсини тәләб едәҹәјик”. Һаким прокурора хәбәрдарлыг едиб.
Јалчын Иманов онун зәрәрчәкмиш шәхс кими статусуна хитам верилмәси барәдә вәсатәт вериб. Лакин мәһкәмә вәсатәти тәмин етмәјиб.
Шаһид суала ҹаваб верә билмәди
Вәкил Јалчын Иманов вәсатәт верәрәк 5 нојабр һадисәләри илә бағлы мәһкәмә һөкмүнүн алынмасыны истәјиб. Билдириб ки, әҝәр бу адамлар орада да зәрәрчәкмиш кими таныныбса, адлары һөкмдә олаҹаг. Һаким билдириб ки, вәкилләр өзләри дә сорғу вериб мәһкәмәдән һөкмү ала биләрләр.
Тале Бағырзадә исә ефир дејәндә нәји нәзәрдә тутдуғуну шаһиддән сорушуб. Шаһид суала ҹаваб верә билмәјиб. Тале Бағырзадә билдириб ки, Елчин Гасымовла бағлы да телеканалларда тәблиғат апарылыб вә террорчу олдуғу билдирилиб: “Лакин шаһид ифадәсиндә дејир ки, ораја јығышанлары баша салыб ҝөндәрибләр. Дүнјанын һеч јериндә террорчуну баша салыб ҝөндәрмирләр. Ора јығышанларда силаһ да олмајыб вә онлар террорчу дејилләр”.
Аббас Һүсејнов ондан ораја јығышанларын һансы шүарлары сәсләндирдикләрини сорушуб. Шаһид суала ҹаваб верә билмәјиб. А. Һүсејнов шаһидә төһмәт верилмәсини истәјиб. Һаким белә сәлаһијјәтинин олмадығыны дејиб.
Даһа сонра иҹласда Сабунчу рајон Полис кичик инспектору Елнур Шәрифов ифадә вериб. О да охшар ифадә вериб. Фуад Гәһрәманлы исә дејиб ки, “Аминстј Интернатионал” тәшкилаты онлары сијаси мәһбус кими таныјыб: “Бу, һөкумәтә месаждыр ки, инсанлары шәрләмәсинләр”.
Аббас Һүсејнов шаһидин үзүнә түпүрүб
Тәгсирләндирилән Закир Мустафајев дејиб ки, ону бир ҝүн Сабунчу рајон Полис идарәсиндә сахлајыб ишҝәнҹә верибләр. Һәмин вахт Елнур Шәрифов да орада олуб: “О, мәни тәһгир едәрәк деди: “Нардаранда нә ҝәзирдин? Башын бағлајыб мин һоггадан чыхан гадынлара ҝөрә ҝетмишдин? Мәним үзәримә Иранын бајрағыны атыб дејирдиләр, мән Ирана ишләјирәм”.
Бу да тәгсирләндирилән шәхсләр вә онларын јахынлары тәрәфиндән наразылыгла гаршыланыб.
Тәгсирләндирилән шәхсләрдән Аббас Һүсејнов онун үзүнә түпүрүб.
Просесдә фасилә елан едилиб. Фасиләдән сонра һаким билдириб ки, А.Һүсејнова дәфәләрлә хәбәрдарлыг едилсә дә, о, шаһиди тәһгир едиб. Һаким буна ҝөрә дә онун иҹласдан чыхарылмасына гәрар верилдијини сөјләјиб. А.Һүсејнов исә гајдалары гаршы тәрәфин поздуғуну дејиб: “Сиз шаһидә јол ҝөстәрирсиниз. Прокурор вәзифәсиндән суи-истифадә едиб шаһидә көмәк едир. Буну сиз дә ҝөрүрсүнз вә һеч нә етмирсиниз. Мән түпүрмүшәм. Бир инсанын гејрәтинә сөз дејилирсә, о адам сусмамалыдыр. Бүтүн һиҹаблы гадынлар мәним анам-баҹымдыр. О, белә алчаг һәрәкәтә лајигдир”.
Талеһ Бағырзадә дә прокурорун шаһидләрә көмәк етдијини дејиб: “Биз бош јерә јох, зүлмә гаршы чыхдығымыздан бурдајыг. Гејрәт бизим үчүн өлүм баһасынадыр. Өләрик, ону вермәрик. Нә едәк, биз дә онун анасыны, баҹысыны сөјәк? Аббас түпүрүб, елә билин, һамымыз түпүрмүшүк. Адамлар гејрәтә ҝөрә гәтл төрәдир. Әҝәр Аббасы чыхартсаныз, һамымыз ҝедәҹәјик. Вәкилләрдән имтина едәҹәјик. Әҝәр бизә ашағыда бир чыртма вурулса, мәсулијјәти сизиндир”.
Һаким исә мәһкәмәдә һеч кимә ишҝәнҹә верилмәдијини дејиб.
Дөзүбҝөзләјириксә, бу, бизимҝүзәштимиздир
Фуад Гәһрәманлы исә ишин сијаси мәһкәмә олдуғуну дејиб: “Бу адамлар сијаси мәсәләјә ҝөрә бурададырлар. Һүгугла бу адамлар бурада олмамалыдыр. Тәклиф едирәм, аты дашлыға сүрмәјәк. Әкси бизә даһа чох сәрф едир. Һакимијјәт дә истәјир ки, бу тамаша уғурла баша чатсын. Биз дә билирик ки, бу, мәһкәмә дејил. Дөзүб ҝөзләјириксә, бу, бизим ҝүзәштимиздир”.
Һаким исә бунун Ф. Гәһрәманлын шәхси фикирләри олдуғуну билдириб вә А. Һүсејнов залдан чыхарылыб.
Фуад Гәһрәманлы буна ҝөрә иҹласда иштиракдан вә вәкилләрдән имтина етдикләрини дејиб. Һаким исә мәһкәмә гаршысында шәрт гојмаға иҹазә верилмәдијини диггәтә чатдырыб: “Һәр шеј ганунла олмалыдыр”.
Вәкиләр исә иҹласын тәхирә салынмасыны истәјибләр. Билдирбләр ки, шаһидләрин әксәријјәти Аббас һүсејновла бағлы ифадә вердикләри үчүн о, да иҹласда иштирак етмәлидир. Һаким иҹласын сентјабрын 23-нә тәхирә салындығыны, һәмин ҝүн онун иштиракы мәсәләсинин мүзакирә едиләҹәјини дејиб.
Диггәт: Хәбәрдән истифадә етдикдә мәнбәјә истинад лазымдыр
