Контр-адмирал Сәjjари: Дәниз Гошунлары Әдән көрфәзиндә игтидарла иштирак едир

Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Дәниз гулдурларынын Әдән көрфәзиндә Иранын нефт танкеринә һүҹумда уғурсуз галмалары ардынҹа, Иран ордусу Дәниз Гошунларынын команданы бу гошунларын бөлҝәдәки игтидарлы иштиракындан хәбәр вериб.
Сәһәр Беjнәлхалг Телевизиjасынын Тәсним Информасиjа Аҝентлиjинә истинадла вердиjи мәлумата ҝөрә, Иран ордусу Дәниз Гошунлары команданы контр-адмирал Һәбибуллаһ Сәjjари деjиб: Иранын ҹәнубунда jерләшән Бәндәр Аббасла Әдән көрфәзи арасындакы мәсафә тәхминән 2500 километрдир вә Дәниз Гошунлары бу бөлҝәдә стратежи гүввәләр олараг игтидарлы шәкилдә иштирак едир.
Өтән үч ҝүн әрзиндә Иранын Дәниз Гошунларынын Әдән көрфәзиндә дәниз гулдурлары илә мүбаризәсинә тохунан адмирал Сәjjаринин сөзләринә ҝөрә, өтән илләр әрзиндә дәниз гулдурлары Әдән көрфәзинин суларында jүк дашыjан ҝәмиләр вә нефт танкерләринин ҝедиш-ҝәлишини де-стабил етмишдиләр. Лакин Иран онларла мүбаризә вә бу мәнтәгәдә етибарлы ҝедиш-ҝәлишә зәмин jаратмаг үчүн чалышыр.
Иран ордусу Дәниз Гошунлары команданы терроризмлә мүбаризә чәрчивәсиндә Иранын Фарс көрфәзи вә Һинд океанынын шималында ҹидди шәкилдә иштирак етдиjини билдирәрәк әлавә едиб: 2008-ҹи илдән индиjә гәдәр Дәниз Гошунлары тәхминән 2600 ҝәминин бу бөлҝәдә тәһлүкәсиз формада һәрәкәт етмәсинә шәраит jарада билмишдир.
Өтән ҹүмә ҝүнү Әдән көрфәзиндә дәниз гулдурлары Иранын нефт танкерини әлә кечирмәк мәгсәдилә бир нечә дәфә бу ҝәмиjә һүҹум едибләр. Лакин онларын һүҹуму уғурсуз галыб. Бу гаршыдурма өтән бир ил әрзиндә Иран ордусу Дәниз Гошунларынын тиҹарәт ҝәмиләрини мүһафизә едән груплари илә Әдән көрфәзи дәниз гулдурлары арасында ән ағыр тоггушма һесаб олунур. Бир нечә саат давам едән бу гаршыдурмада да гулдурлар гачмаға мәҹбур олублар.
Диггәт: Хәбәрдән истифадә етдикдә мәнбәjә истинад лазымдыр