Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Мәркәзи Сечки Комиссиjаси (МСК) октjабрын 9-да кечирилән президент сечкисинин нәтиҹәләрини тәсдигләдикдән 2 ҝүн сонра, jәни дүнән Конститусиjа Мәһкәмәси Илһам Әлиjеви президент елан етди. Нә МСК, нә дә Конститусиjа Мәһкәмәси сахтакарлыг фактларыны арашдырмаға һәвәс ҝөстәрмәди. Һәр ики гурум тәләсик гәрар верди.
Һалбуки ганунвериҹилиjә ҝөрә Конститусиjа Мәһкәмәси мәсәләjә 14 ҝүн мүддәтиндә баха биләрди. Конститусиjа Мәһкәмәси һәтта Демократик Гүввәләрин Милли Шурасынын ваһид намизәди Ҹәмил Һәсәнлинин исрарлы тәләбләринә бахмаjараг она чыхыш имканы jаратмады. Мәһкәмәнин чыхардығы гәрарын мүрәккәби гурумамыш, Илһам Әлиjевин Милли Мәҹлисдә андичмә мәрасиминин кечирилдиjи бәлли олду. Мәрасимин гәфил, сөнүк, һеч бир хариҹи өлкәнин сәфир вә дипломатларынын иштиракы олмадан кечирилмәси диггәт чәкмәjә билмәз. Јери ҝәлмишкән, һеч Милли Мәҹлисин үзвләри бу барәдә мәлуматлы олмаjыб. Онлар jалныз парламентдә Илһам Әлиjеви ҝөрдүкдән сонра мәсәләнин нә jердә олдуғуну анлаjыблар. Президент Администрасиjасынын мәтбуат хидмәтинин рәһбәри Азәр Гасымов андичмә мәрасиминин тәнтәнәли кечирилмәмәсини Илһам Әлиjевин тәвазөкарлығы илә изаһ едиб. Лакин бу ҹидди аргумент саjыла билмәз. Ән азы она ҝөрә ки, Илһам Әлиjев бундан әввәл ики дәфә президент олуб. Һәр ики андичмә мәрасими тәнтәнәли кечирилиб. Белә чыхыр ки, Илһам Әлиjев 2003 вә 2008-ҹи илләрдә тәвазөкар деjилди. Амма 2013-ҹү илдә бирдән-бирә дәjишәрәк тәвазөкар олду. Әслиндә Илһам Әлиjевә инди тәмтәраглы андичмә мәрасими лазым иди. О, чох истәjәрди ки, андичмә мәрасиминдә хариҹи өлкәләрин дөвләт башчылары, икинҹи шәхсләри, сәфирләр иштирак етсин. Лакин Илһам Әлиjев jахшы баша дүшүр ки, бу баш тутмаjаҹаг. Чүнки дүнjа тотал шәкилдә сахталашдырылан сечкинин нәтиҹәләрини танымыр. Бу бахымдан һакимиjjәт пәрт вәзиjjәтдәдир.
Еjни ҝүндә Конститусиjа Мәһкәмәсинин Илһам Әлиjеви президент елан етмәси вә онун андичмә мәрасиминин кечирилмәси сечки илә бағлы мүбаһисәләрин дәринләшмәсинин гаршысыны алмаг мәгсәди дашыjыр. Јәни, һакимиjjәт инди иддиа едәҹәк ки, артыг сечки архада галыб, Конститусиjа Мәһкәмәси гәрар вериб, Илһам Әлиjев дә президент кими анд ичиб.
Јери ҝәлмишкән, елә дүнән Президент Администрасиjасынын шөбә мүдири Новруз Мәммәдовун дилилә Авропа Иттифагына интеграсиjадан имтинаjа ишарә вурулуб. Бу да һакимиjjәтин нөвбәти шантажыдыр. Игтидар бунунла Гәрбә месаж верир ки, әҝәр Илһам Әлиjевин президентлиjи гәбул едилмәзсә, о заман Азәрбаjҹан Авропаjа интеграсиjа курсундан имтина jолуну тутаҹаг. Лакин експертләр һесаб едир ки, бүтүн бунларла һакимиjjәт өзүнү даһа да пис вәзиjjәтә салыр. Тәһлилчиләрин фикринҹә, нәтиҹәләрин шикаjәтләр нәзәрә алынмадан сүрәтлә рәсмиләшдирилмәси вә Илһам Әлиjевин тәләсик андичмә мәрасими кечирмәси һакимиjjәтин мәнимсәнилмәсинин етирафыдыр. Һакимиjjәт бунунла өзүнү даһа да чәтин вәзиjjәтә салды.
Диггәт: Хәбәрдән истифадә етдикдә мәнбәjә истинад лазымдыр
