Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Иран Ислам Республикасынын Президенти Һөҹҹәтүл Ислам вәл Мүслимин Һәсән Руһани һәмкары Абдуллаһ Ҝүллә сентjабрын 25-дә БМТ Баш Ассамблеjасынын 68-ҹи сессиjасы чәрчивәсиндә бир араjа ҝәлиб.
Ҝөрүшдә икитәрәфли әлагәләр, Суриjа бөһраны вә диҝәр реҝионал вә глобал мәсәләләр әсас мүзакирә мөвзусу олуб. Ҹәнаб Һәсән Руһани Иран Ислам Республикасы вә Түркиjә арасындакы әлагәләрин сәвиjjәсинин jахшы олдуғуну билдириб: “Түркиjә Иран үчүн бир дост, гардаш вә гоншу өлкәдир. Ики өлкә чох гәдим вә тарихи бир кечмишә саһиб олмагла хеjли ортаг чыхарлара маликдир. Бу кечмиш әлагәләрә сөjкәнәрәк ики өлкә арасындакы мүнасибәтләрин даһа да инкишаф етдирилмәси лазымдыр”.
Онун сөзләринә ҝөрә, Иран Ислам Республикасы вә Түркиjә арасында игтисади вә тиҹарәт саһәсиндә ҝениш әмәкдашлыг вар. Ики өлкә арасында 2015-ҹи иләдәк ортаг тиҹарәт вә игтисади әмәкдашлыг һаггында бир рәгәм мүәjjәнләшдирилиб. Бу рәгәмин ҝерчәкләшмәси үчүн һәр ики тәрәфин дә сәj ҝөстәрмәси лазымдыр”. Президент Һ.Руһани ҹәнаблары деjиб ки, бөлҝә проблемләринин һәлл едилмәси үчүн реҝион өлкәләри, хүсусилә дә Түркиjә вә Иран Ислам Республикасынын ортаг сәjләрини давам етдирмәси чох ваҹибдир: “Бунунла бағлы ики өлкә тәрәфиндән атылмасы лазым олан илк ортаг аддым Суриjа бөһранынын даһа да кәскинләшмәсинә манеә төрәтмәк вә бу өлкәдәки проблемин ән гыса заманда һәллини тәмин етмәкдир”. Иран Ислам Республикасынын Президенти терроризмин бүтүн бөлҝә үчүн тәһлүкәли олдуғуну хатырладараг, бүтүн тәрәфләрин террорчу дәстәләрин Суриjадан чыхарылмасы вә бу террор тәшкилатлары арасында бирлиjин тәмин едилмәсинә мане олмасынын зәрурилиjини вурғулаjыб. Һөҹҹәтүл Ислам вәл Мүслимин Һәсән Руһани билдириб ки, бөлҝә өлкәләри арасында әмәкдашлығын тәмин едилмәси бүтүн халгларын фаjдасына олаҹаг: “Суриjада һеч бир өлкәнин мәнафеjи она гоншу өлкәләринки гәдәр ола билмәз. Она ҝөрә дә Суриjа бөһранынын һәлли мәсәләсиндә ортаг бир jол тапмағымыз лазымдыр”.
А.Ҝүл дә өз нөвбәсиндә Һ.Руһанини Иран Ислам Республикасы президенти сечилмәси мүнасибәтилә бир даһа тәбрик едиб: “Ирандакы президент сечкиләринин нәтиҹәләри jалныз бу өлкә үчүн деjил, бүтүн бөлҝә өлкәләри үчүн бөjүк әһәмиjjәтә малик иди. Һ. Руһанинин сечилмәси илә Иранда jени бир дөвр башлады. Мүсбәт месажлар беjнәлхалг саһәдә конструктив jанашманын ортаjа чыхмасы үчүн дә әһәмиjjәтлидир. Онун сөзләринә ҝөрә, ики өлкә арасында әлагәләр даһа да инкишаф етдирилмәлидир: “Бөлҝәнин ики ваҹиб актjору олараг Түркиjә вә Иран арасында jахын вә конструктив әмәкдашлыг шәртдир”. А.Ҝүл Иран Ислам Республикасынын бөлҝә проблемләринин һәлл едилмәси истигамәтиндәки сәjләринин әһәмиjjәтли олдуғуну деjәрәк, Суриjа бөһранынын низамланмасы үчүн ики өлкә арасындакы әмәкдашлығын зәрури олдуғуну билдириб.
Геjд едәк ки, ҝөрүшдә ики өлкәнин хариҹи ишләр назирләринин бир араjа ҝәлмәси барәдә гәрар гәбул олунуб.
Бундан башга, Һ.Руһани Ливан президенти Мишел Сүлеjман, Тунис президенти Мүнсиф Мәрзуки, Алманиjанын хариҹи ишләр назири Ҝидо Вестервелле вә Беjнәлхалг Валjута Фондунун президенти ханым Кристин Лагардла да ҝөрүшүб.
Диггәт: Хәбәрдән истифадә етдикдә мәнбәjә истинад лазымдыр
