Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Демократик Гүввәләрин Милли Шурасынын үзвү Рөвшән Әһмәдли Ислам Партијасынын һәбсдә олан лидери Мөвсүм Сәмәдовун 24 ијул бәјанатыны шәрһ едиб.
Рөвшән Әһмәдли дејиб ки, һәбсдә олан исламчыларын гәрарларына анлајышла јанашмаг лазымдыр: “Биз дә онларын гәбул етдикләри гәрарлара һөрмәтлә јанашырыг. Мөвсүм Сәмәдов ганунсуз олараг 12 ил һәбс ҹәзасы алыб. Бу ҝүн һәбсханада да репрессијаја мәруз галыр, һәддән артыг ҹидди режимдә сахланыр. Демәк олар ки, өлкәдәки просесләрдән тамамилә тәҹрид олунмуш вәзијјәтдәдир.
Мәһбус исламчылар Милли Шуранын јаранмасында иштирак едә билмәјибләр, инди дә онун гәрарларынын гәбул олунмасында һәр һансы роллары јохдур, рәј билдирмәк имканындан мәһрумдурлар. Адларынын Милли Шуранын тәсис сијаһысына салынмасы онлара мәнәви-психоложи дәстәјин ифадәси иди. Ислам Партијасынын Мөвсүм Сәмәдовун президентлијә намизәдлијини ирәли сүрмәси дә ганунсуз һәбсә етираздыр”.
Рөвшән Әһмәдли гејд едиб ки, исламчы мәһбуслар адларынын Милли Шура үзвләринин сијаһысына салынмасына индијәдәк һәр һансы етираз билдирмәмишдиләр: “Абҝүл Сүлејманов бәјан етмишди ки, биз һеч бир партијанын үзвү дејилик, садәҹә, мүхалифәтин тәләбләрини һаглы сајдығымыза ҝөрә бу тәләбләри мүдафиә етмәји сијасәтимизә ујғун һесаб едирик. Амма бу ҝүн һәбсдә оланлар реал вәзијјәти изләјиб вахтында гәрар гәбул етмәк вә Милли Шуранын ишинә тәсир ҝөстәрмәк имканында олмадыглары үчүн бу мәсулијјәти бөлүшмәји мәгсәдәујғун сајмырлар. Мән буну нормал гаршылајырам”.
Рөвшән Әһмәдли дејиб ки, исламчыларын һеч бир бәјанаты Милли Шуранын әлејһинә дејил: “Әксинә, бу, Милли Шураја дәстәк бәјанаты сајыла биләр. Инанырыг ки, Милли Шура халгын етимадыны, үмидләрини доғрулдаҹаг, руһани гардашларымыз да һәр кәси бу гурумла бирҝә мүбаризәјә дәвәт едәҹәк”.
Диггәт: Хәбәрдән истифадә етдикдә мәнбәјә истинад лазымдыр
