Әһли Бејт (әлејһимус сәлам) -АБНА- Хәбәр Аҝентлији- О Һәзрәтин ады Муса, ләгәби Казим, анасы Һәмидә адлы чох фәзиләтли бир гадын, атасы исә алтынҹы Имам Һәзрәт Садиг (әлејһис сәлам) олмушдур. Имам Казим (әлејһис сәлам) һиҹрәтин јүз ијирми сәккизинҹи илиндә (Мәдинәнин јахын кәндләриндән бири олан) Әбва адлы бир јердә дүнјаја ҝәлмиш, һиҹрәтин јүз сәксән үчүнҹү (башга бир версијаја ҝөрә исә јүз сәксән алтынҹы) илиндә Аббаси Хәлифәси Һарун әр-Рәшидин (әлејһи ләнә) әли илә шәһид олмушдур.Мүгәддәс гәбри Ирагын Казимејн шәһәриндәдир.
Имамын һәјаты ики мәрһәләјә бөлүнүр :
1. Имамлыгдан габагкы дөвр, һиҹри 128-дән 148-ә гәдәр (20 ил)
2. Имамлыг дөврү, һиҹри 148-ҹи илдән 183-ҹү илә кими (35 ил).
О һәзрәтин Имамлыг дөврү Аббаси хәлифәләри Мәнсур Дәванаги, Меһди Аббаси вә Һарун әр-Рәшидин (әлејһимул ләнә) һакимијјәтинә тәсадүф етмишдир. Онун Имамлыг дөврүнүн чоху исә (23 ил, 2 ај, 17 ҝүн) Һарунун (әлејһи ләнә) хилафәти дөврүнә тәсадүф едиб.
Һарун билирди ки, Имам Казим (ә) вә онун шиәләри ону хилафәт күрсүсүнү гәсб етмиш вә мүсәлманларын мүгәддәратыны зор ҝүҹү илә әлә кечирмиш бир шәхс кими таныјырлар. Әҝәр онлар Һаруна гаршы мүбаризә етмәк шәраити әлдә етсәләр, бир ан да ослун белә, ону һакимијјәтдән салмагда јубанмазлар. Имам Казим (ә) илә Һарун әр-Рәшид арасында ҝетмиш вә ашағыда гејд етдијимиз сөһбәт о Һәзрәтин Ислам һөкумәти тәшкил вермәк саһәсиндә олан али мәгсәдләриндән, һәм дә Һарунун чиркин мәгсәдләриндән хәбәр верир:
"Бир ҝүн Һарун (бәлкә дә, Имам Казимин (ә) арзу вә мәгсәдләриндән хәбәр тутмаг мәгсәдилә) Фәдәји о Һәзрәтә гајтармаг истәдијини билдирир. Имам Казим (ә) бујурур: "Бир шәртлә Фәдәји гәбул едәрәм ки, онун бүтүн әразисини (бүтүн сәрһәдләри илә бирликдә) ҝери гајтарасан." Һарун сорушду: "Онун (әһатә етдији) саһә вә сәрһәдләри нә гәдәрдир?" Имам Казим (ә) бујурду: "Әҝәр онун әһатә етдији саһә вә сәрһәдләрини десәм, әсла ону гајтармазсан." Һарун тәкид едиб анд ичди ки, мүтләг ону гајтараҹаг. Имам Казим (ә) Фәдәјин әһатә етдији саһә вә сәрһәдләрини бу ҹүр тәјин етди: "Онун саһәси Әдәндән тутмуш Сәмәргәндә гәдәр, диҝәр тәрәфдән дә, Африкадан тутмуш Әрмәнијјә вә Хәзәр дәнизинә кими узаныр." Бу саһәләрин бир-бир адыны ешитдикҹә рәнҝ вериб рәнҝ алан вә һәддән артыг гәзәбләнән Һарун бу дөрд ҹәһәти ешидәндә, өзүнү сахлаја билмәјиб гәзәблә деди: "Белә олан һалда бизә бир шеј галмыр ки!" Имам Казим (ә) бујурду: "Билирдим ки, гәбул етмәјәҹәксән вә елә буна ҝөрә дә, демәк истәмирдим." Имам Казим (ә) бу ҹавабы илә Һаруна билдирмәк истәјирди ки, Фәдәк Ислам дөвләтинин бүтүн саһәсини әһатә едән символик бир ифадәдир. Сәгифә әһли (Әбу Бәкр, Өмәр вә с.) Фәдәји Пејғәмбәр (сәлләллаһу әлејһи вә алиһи вә сәлләм) гызынын вә күрәкәнинин әлиндән алмагла һәгигәтдә һакимијјәти Әһли-бејтдән (әлејһимуссәлам) алдылар. Инди әҝәр бизим һаггымызы гајтармалы олсан, онда бүтүн хилафәт әразисини бизим ихтијарымыза вермәлисән
Бу сөһбәт Имам Казимин (ә) али мәгсәдләриндән хәбәр верир.
Имамын ҹисми ҹәһәтдән арыг олмасына бахмајараг, руһи бахымдан олдугҹа ҝүҹлү иди. Палтарынын алтындан көһнә көјнәк ҝејәр, даим пијада ҝедәр, һәмишә халга салама верәр, аиләҹанлы вә һөрмәтҹил иди. Һәзрәт һәмишә јохсулларын фикрини чәкәр, белә ки, ҝеҹәләр ҝизлиҹә әрзағы јохсул аиләләрин евинә апарар вә онлардан бәзисинә ајлыг мааш верәрди
Имам Мусеји Казим әлејһиссалам әлиачыглыг вә сәхавәт бахымындан халг арасында мәшһур иди. Белә ки, бир дәфәјә мин нәфәр гулу азад етдирмиш вә дар ҝүндә онлара әл тутараг онларын борҹуну өдәјирди. Ибни Шәһрашуб белә нәгл едир: Бир ҝүн Мәнсур Имам Мусеји Казим әлејһиссаламы сараја чағыртдырыб әмр етди ки, Новруз ҝүнү орада отуруб ҝәтирилән һәдијјәләри тәһвил алсын. Имам бу ишә һәвәси олмаса да чарәсиз галыб гәбул етди. Рәсми салам мәрасиминдә иштирак едән бөјүкләр вә задәҝанлар Мәнсурун әмри илә һәдијјәләри о һәзрәтә тәһвил верирдиләр.
Бир нәфәр дә Мәнсурун тәрәфиндән орада дуруб ҝәтирилән һәдијјәләри сијаһыја алырды. Ахырда бир гоҹа киши ҝәлиб деди: Еј Пејғәмбәр өвлады! Мәним дүнја малындан һәдијјә етмәк үчүн һеч бир шејим јохдур. Амма бабан Һүсејн әлејһиссаламын мүсибәтинә даир бир шер јазыб сәнә һәдијјә ҝәтирмишәм. Гоҹа киши јаздығы шери охуду, онун бу шери Имама чох тәсир етди. Һәзрәт (ә) Мәнсурун мәмуруна әмр етди ки, ҝет Мәнсурдан соруш ҝөр бу һәдијјәләрлә нә едәҹәк? Мәмур ҝедиб гајытдыгда Имама деди: Әмир дејир ки, һәдијјәләрин һамысыны сизә бағышладым, истәдијиниз адама верә биләрсиниз. Һәзрәт (ә) јохсул гоҹа кишијә тәрәф дөнүб бујурду: «Бабам Һүсејнин мүсибәтләринә даир јаздығын шерә ҝөрә бу һәдијјәләрин һамысыны сәнә бағышлајырам ки, јохсуллугдан гуртарасан».
Уҹа Аллаһ һамымызы о Һәзрәтин һәгиги давамчыларындан гәрар версин .Амин!
Диггәт: Хәбәрдән истифадә етдикдә мәнбәјә истинад лазымдыр
