Мајын 8-дә һәбсханада инфаркт кечирән кечирмиш Ислам Партијасынын Астара тәшкилатынын сәдри Руфулла Ахундзадәнин дуруму ағыр олараг галыр. Өтән һәфтә хәстә мәһкумун дуруму илә бағлы Әдлијјә Назирлијинин Пенитенсиар Хидмәтинә мүраҹиәт едән Р.Ахундзадәнин вәкили Анар Гасымлы һәлә дә мүраҹиәтә рәсми ҹаваб ала билмәдијини дејиб.
Вәкилин сөзләринә ҝөрә, һазырда онун сәһһәти ағыр олараг галыр вә һәбсдән бурахылмалыдыр. О, Пенитенсиар Хидмәтдән рәсми ҹаваб - рәј алдыгдан сонра мүвәккилинин азадлыға бурахылмасы үчүн мәһкәмәјә мүраҹиәт едәҹәјини сөјләјиб.
Руфулла Ахундзадәнин оғлу Мәһәммәдәли Ахундзадә азадхебер.нет интернет гәзетинә билдириб ки, атасына мүтәмади олараг дәрманлар ҝөндәрирләр. Анҹаг хәстәнин дуруму хејли дәрәҹәдә ағырдыр вә гапалы мүәссисә онун там шәкилдә мүалиҹә алмасы үчүн јетәрли имканлара саһиб дејил: “Дәрманлары алыб ҝөндәририк. Амма сахланма шәраити ”зон"дакы шәраитдән дә писдир. Мүалиҹәси ҝетсә дә зондан хәстәханаја чатдырмагда едилән сәһләнкарлыг өзүнү бүрузә вермәкдәдир. Белә ки, атамы инфаркт кечирдикдән сонра машында ики саат сахладыгдан сонра хәстәханаја ҝәтирибләр. Инфаркта зәмин јарадан сәбәбләрин ән башлыҹасы сәһләнкарлыгдыр. Чүнки атам һәбсханаја дүшмәмишдән габаг да дәрманларла кечиниб вә үрәјиндә проблеми әсҝәрлик вахтындандыр. 4 ај әсҝәрлик едиб, сонра үрәјинә ҝөрә һәрби хидмәтдән тәрхис олунуб. Һәбсханаја дүшдүкдән сонра да мүалиҹәсини апарыб. Сон вахтлар она гаршы мәнәви тәзјигләр олуб вә зонун тиб мәнтәгәсинә дәфәләрлә мүраҹиәт етсә дә, бәһанә едәрәк ону нә мүајинә, нә дә мүалиҹә едибләр".
Гејд едәк ки, Һүгуг вә Азадлыгларын Мүдафиәси Институту (ҺАМИ) бәјанат јајараг һакимијјәти Р.Ахундзадәни азад етмәјә чағырыб. Ситат: “Азәрбајҹан һакимијјәтинин мәһбуслара гәсдән етинасыз јанашмагла онларын өлүмүнә шәраит јаратмасыны гәтијјәтлә писләјирик. Мүалиҹә Мүәссисәсиндә мүалиҹәси мүмкүн олмајан Руфулла Ахундзадәнин дәрһал азадлыға бурахылмасыны тәләб едирик!”
Руфулла Ахундзадә 2011-ҹи илин јанварында Ислам Партијасынын рәһбәри Мөвсүм Сәмәдов вә бир груп фәал илә бирликдә һәбс олунуб. О, 11,5 ил азадлыгдан мәһрум едилиб.
Бу групда олан мәһкумлардан бири, Ислам Партијасы сәдринин мүавини Вагиф Абдуллајев 2012-ҹи илин јајында һәбсханада ағыр хәстәликдән вәфат едиб. Һүгуг мүдафиәчиләринин чағырышларына бахмајараг, онун сон ҝүнләрини доғмалары илә кечирмәсинә имкан верилмәјиб.
