Бисмиллаһир рәһманир рәһим
Имам Әлинин (ә)мәктәби инсанлар үчүн тәрбијә мәктәбидир.тәкамүл вә камал истедады олан кәс Әмирәлмөмининин (ә) уҹа шәхсијјәти нурунда ҹана ҝәлир, дирилирди. Бу инсан мәнәви ҹәһәтдән чичәкләнир вә инсанијјәт мераҹына уҹалырды.
Сөһбәтимиз Мејсәм Тәммар һагындадыр. Мәнәви дәјәр, доғру јол, ҹиһад, сәбр вә јәгин ахтарышинда оланлар бу илаһи инсаны јахшы таныјырлар. Мејсәм Һәзрәт Әлијә (ә) онун әдаләтинә, дининә, фәзиләтләринә ҝөрә ашиг иди. Мејсәмин Әлини (ә) севмәси әслиндә һаггы севмәсидир. Куфәнин ади зәһмәт адамларындан олан Мејсәм уҹа иман, әзәмәтли руһа малик иди. Бу иман вә руһ , мисилсиз фәдәкарлыг вә дөзүм она әбәдилик верди, ону мүсәлманлар үчүн нүмунәјә чевирди.
Мејсәм ибн Јәһја Ираг вә Иранын арасында јерләшмиш Нәһрәван мәнтәгәсиндән иди. Она Әбу-Салим дә дејәрдиләр.
Мејсәм әввәлҹә бәни-Әсәддән олан бир гадынын гулу иди. Һәзрәт Әли (ә) ону алыб, азад етди. Мејсәм Һәзрәт Пејғәмбәрин (с) сәһабәләриндән сајылыр. О, куфәдә хурма сатдығы үчүн она тәммар јәни хурмасатан ләгәби верилмишди. Мејсәмин өзүнүн фәдакар вә пак мүсәлман олмасы илә јанашы,онун аиләси дә шиә бөјүкләриндән сајылырды. Онун алты оғлу варды. Оғланлары вә чохсајлы нәвәләри дә өз ата-бабалары кими Әһли-бејт (ә)јолуна сәдагәтли идиләр. Бир чох равиләрин һәдисләриндә ады чәкилән бу инсанлар имамларын (ә) вилајәт вә рәһбәрлијинә етигадлы идиләр. Шиә имамлары да Мејсәмә, онун өвладларына өз мәһәббәтини изһар етмишләр. Мејсәмин оғланларынын ады Имран, Шүејб, Салеһ, Муһәммәд, Һәмзә вә Әли иди.
Мејсәм әввәлдән Әһли-бејт (ә) ашиги иди. Амма Һәзрәт Әлинин (ә) онунла илк ҝөрүшү о һәзрәтин хилафәти дөврүндә баш вермишдир. Елә һәмин ҝөрүшдән сонра да Әли (ә) Мејсәми азад етмәк гәрарина ҝәлмишдир. Һәзрәт Әли (ә) Мејсәмин руһи истедадыны, аҝаһлығыны ҝөрүб, ону бир чох сирләрлә таныш етди. Мејсәм Һәзрәт Әлидән (ә) гуран тәфсирини өјрәнди. О, Әмирәлмөмининдән өјрәндији мәлуматлар Әсасында бир китаб тәртиб етди. Һәзрәт Әли (ә) ону өз сирләри, ҝәләҹәкдә баш верәҹәк һадисәләрлә таныш етмишди. Мејсәм бу мәлуматлардан бир гисмини халга билдирмишди. Онун биликләри о гәдәр фөвгәладә иди ки, һәтта бәзи наданлар ону јаланчы да һесаб едирдиләр.
Бир ҝүн Әбу-Бәсир Имам Садиг (ә) әрз едир; Нә үчүн мәнә ел өјрәтмәк истәмирсиниз? Имам (ә) бујурур; һансы елми? Әбу-бәсир дејир; Әмирәлмөмининин (ә) Мејсәмә өјрәтдији елми. Имам (ә) бујурур; Сән ки Мејсәм дејилсән. Мәндән ешитдијин бир мәтләби кимсәјә демәдијин һал олубму? Әбу-Бәсир әрз етди; Хејр еј Пејғәмбәр (с) өвлады! Имам (ә) бујурду; Демәк һәмин елмләри сирр олараг сахлаја билмәзсән!
Имамларын (ә) Мејсәмә мунасибәти
Һәзрәт Әли (ә) вә Мејсәм арасындакы сәмими мүнасибәт онларын бағлылығынын мөһкәмлијиндән данышир.
Һәзрәт (ә) һәтта Мејсәмин хурма дүканына ҝедәр, бу дүканда онунла сөһбәт едәр вә она дини маариф өјрәдәрди.
Һәтта бир дәфә Һәзрәт Әли (ә) Мејсеми иш далынҹа ҝөндәриб өзү дүканда онун јериндә отурур.Бир мүштәри хурма алмаг истәјир. Һәзрәт (ә) бујурур; Пулуну вер хурманы апар. Бир гәдәр сонра Мејсәм гајыдыр вә Һәзрәт Әлијә (ә) хурма мүгабилиндә верилмиш пулларын сахта олдуғуну ҝөрүр. Һәзрәт (ә) бујурур, Хурма да онларын ағзында аҹы дадаҹаг. Чох кечмәмиш һәмин мүштәри әлиндә хурма гајыдыр вә дејир; Бу хурмалар аҹыдыр .
Мејсәм нәгл едир; Бир ҝеҹә мөвлам Әли (ә) мәни өзү илә Куфәдән кәнардакы сәһраја апарды. Нәһајәт Ҹөфә мәсҹидинә чатдыг. Һәзрәт үзүнү гибләјә тутуб дөрд рәкәт намаз гылды. Намаз вә тәсбиһдән сонра әлләрини галдириб белә дуа етди; Пәрвәрдиҝара сәни неҹә чағырым? Сәнә итаәтсизлик етдијим һалда неҹә дә чағырмајым? Сәни танымамышам вә гәлбим сәнин мәһәббәт евиндир. Ҝүнаһ долу әл,үмид долу ҝөзлә сәнә доғру ҝәлмишәм ... сонра Имам (ә) сәҹдәјә ҝетди вә үзүнү торпаға гојуб јүз дәфә әл-әфв деди...
Мејсәм Әлинин (ә) сирләринә мәһрәм иди. О һәзрәтин (ә) хәлвәти дуаларынын, илаһи руһунун тәҹәлласынын шаһиди иди. Она һәм Әли (ә) һәм дә имам Һәсәнлә имам Һүсејн (ә) еһтирамла јанашар, еләҹә дә сонракы имамлар онун илаһи шәхсијјәтини хатырлајардылар.
Бир дәфә Мејсәм Мәдинәдә Һәзрәт Пејғәмбәрин (с) һәјат јолдашы Үммү Сәләмә илә растлашыр. Үммү Сәләмә она дејир; Еј Мејсәм! Һүсејн (ә) даим сәнин һаггында данышыр. Башга бир һәдисдә имам Багир (ә) бујурур; Мән Мејсәми чох севирәм. Имам Садиг (ә) Мејсәмә салам ҝөндәрәрәк онун уҹа мәгамы һаггында хош сөзләр дејир.
Шәһадәт хәбәри
Өлүмү бу дүнјадан даһа ҝениш бир аләмә кечид билән, иманы һагг вә әмәли салеһ олан инсан үчүн өлүм бөјүк бир сәадәтдир.
Белә инсанлар өмүрләрини шәһадәтлә баша вурмагдан бөјүк бир зөвг алырлар.Бәли дүнја һәјатыны шәһадәтлә баша вуранлар салеһләрин, пејғәнбәрләрин, Аллаһ разылығынын ҹиварында әбәди һәјат тапырлар.
Мејсәм өз шәһадәт хәбәрини мөвласы Әлидән(ә) ешитмишди. Имам (ә) Мејсәмә деди; Бир ҝүн бәни үмәјјәнин чиркин оғлу Убејдуллаһ ибн зијад мәнә ләнәт сөјләмәјини тәләб едәндә нә едәҹәксән?
Мејсәм деди; Хејр анд олсун Аллаһа һеч вахт белә етмәрәм. Имам (ә)бујурду; Бу һалда сәни дардан асыб өлдүрәҹәкләр.
Мејсәм әрз етди; Сәбр едәҹәјәм. Аллаһ јолунда белә бир әзијјәт чәтин дејил.
Һәзрәт Әли(ә) бу барәдә Мејсәм Тәммара бир нечә дәфә хәбәр вермишди. Мејсәм дә өз нөбәсиндә вәд олунмуш гырмызы милада һазырлашырды. Мејсәм өз шәһадәтинин хырдалыглары һаггында да билмәси онун руһунун әзәмәтиндән, бөјүк тутумундан, дәрин иманиндан данышыр.
Мејсәм белә бир уҹа руһ вә шәһадәт севҝиси илә һагг вә вилајәт һәрәмини мүафиә еидирди. Һәзрәт Әлинин (ә) шәһадәтиндән сонра арабир онун зијарәтинә ҝәлирди. Куфә вә Мәдинә әһли Мејсәмин сөһбәтләрини һәвәслә динләјәрдиләр. Һарада Мејсәм Һәзрәт Әлинин (ә) фәзиләтләриндән данышсајды, һәмин јердә дүшмәнин һәзрәтә (ә) гаршы тәблиғатлары нәтиҹәсиз галарды. Һәзрәт Әлинин (ә) фәзилә тләриндән данышмаг ҝүнаһ һесаб едилдији бир дөврдә Мејсәм һәзрәтин (ә) мәгамындан данышар, онун бујурдугларыны халга чатдырарды. Мејсәм јахшы билирди ки, мөвласынын шәһадәтиндән сонра ону хурма ағаҹындан асаҹаглар. Һәзрәт (ә) она бу ағаҹы да ҝөстәрмишди. Бәзән бу ағаҹын јанындан кечәркән һәзрәт (ә) она бујурарды; Еј Мејсәм! Сәнин сонралар бу ағаҹла маҹәран олаҹаг.Бу хурма ағаҹыны дөрд јерә бөлүб дөрдүнҹү һиссәсиндән сәни асаҹаглар. Мејсәм тез-тез бу ағаҹын јанына ҝәлиб онун кәнарында намаз гыларды вә дејәрди; Мүбарәк олсун еј хурма! Мәни сәнин үчүн јарадыблар, сән мәним үчүн ҝөјәрмисән.Мејсәм даим бу ағаҹа тамаша едәрди.
Ибн зијад Куфәјә дахил оланда әлиндәки бајраг һәмин ағаҹа илишди вә сынды.Ибн зијад ҝөстәриш верди ки, о ағаҹы кәссинләр. Ону бир дүлҝәр алыб дөрд јерә бөлдү. Мејсәм оғлу Салеһә деди; Мәним вә атамын адыны бу ағаҹа һәкк ет! Салеһ дејирди; ибн зијад атамы дардан асандан бир нечә ҝүн сонра ҝөрдүм ки, бу атамын адыны јаздығым һәмин ағаҹдыр.
Арды вар...
Диггәт: Хәбәрдән истифадә етдикдә мәнбәјә истинад лазымдыр
