Әһли Бејт -АБНА- хәбәр аҝентлијинин вердији хәбәрә әсасән Исмајыллы һадисәләринә ҝөрә илк һәбсләр јанварын 23-дән 24-нә ҝеҹә апарылыб. Ајын 24-дә кечирилән нөвбәти аксија заманы вә сонракы ҝүнләрдә дә хејли шәхс һәбс олунуб, амма онларын дәгиг сајы, һарада сахланмалары вә нәдә иттиһам олунмаларына даир рәсми мәлумат верилмир.
Дахили Ишләр Назирлији мәтбуат хидмәтинин шөбә мүдири Орхан Мансурзадә јанварын 28-дә “Медиа форум” сајтына билдириб ки, Исмајыллы һадисәләринин истинтагыны Республика Прокурорлуғунун Ағыр Ҹинајәтләрә Даир Ишләр үзрә Истинтаг Идарәси апарыр: “Биз илк ачыгламамызда гејд етмишик ки, Ҹинајәт Мәҹәлләсинин мүвафиг маддәләри илә ҹинајәт иши ачылыб. Һазырда истинтагы Республика Прокурорлуғу апарыр. Бүтүн мәсәләләр прокурорлуғун сәлаһијјәтиндәдир. Нечә нәфәрин һәбс едилдији, һансы маддәләрлә иттиһам олундуғу вә һарада сахландығына даир суаллара истинтагы апаран орган ҹаваб верәҹәк”.
“Медиа форум” сајты “Исмајыллы һадисәләри заманы нечә нәфәр һәбс олунуб, нечә нәфәр инзибати гајдада ҹәзаландырылыб, ҹинајәт иши һансы маддәләрлә ачылыб” суаллары илә Республика Прокурорлуғу мәтбуат хидмәтинин рәһбәри Елдар Султанова мүраҹиәт едиб. Елдар Султанов дејиб ки, мәсәлә һагда рәсми ачыглама олаҹаг вә бүтүн суаллара орада ајдынлыг ҝәтириләҹәк. Амма иш ҝүнүнүн сонунадәк белә бир ачыглама олмајыб.
Азәрбајҹан Халг Ҹәбһәси Партијасы Исмајыллы рајон шөбәсинин сәдри Садиг Умудлу “Медиа форум”а дејиб ки, һадисәләрә ҝөрә һәбс олунанларын сајы јүз нәфәрдән артыг олуб, амма онларын бир һиссәсини азад едибләр: “Ҝөјчај полисиндә он нәфәр галмышды. Дејиләнә ҝөрә, сәккиз нәфәр Бакыја апарылыб, Дахили Ишләр Назирлијинин Баш Мүтәшәккил Ҹинајәткарлыгла Мүбаризә Идарәсиндә сахланылыр. Отуз нәфәрин һәбсдә олдуғу билдирилир. Амма рәсми гурумлар һәбс олунанлар һагда һеч бир мәлумат вермир. Инсанлар өвладларынын һарада сахландығыны өјрәнә билмир”.
Садиг Умудлу һәбс олунанлардан бәзиләринин адларыны ачыглајыб: “Әмирәлијев Елвин Низами оғлу, Камилов Хәјал Мүбариз оғлу, Шарамов Хәјал Серҝеј оғлу. Хәјал Камилов, Хәјал Шарамов АХҸП үзвләридир. Онларын һарада сахландығыны өјрәнә билмирик”.
Садиг Умудлунун сөзләринә ҝөрә, һәбс олунуб сонрадан бурахылан Елшән Сәмәдова вә Руслана ағыр ишҝәнҹә верилиб, һазырда вәзијјәтләри ағырдыр.
Елвин Әмирәлијевин атасы Низами Әмирәлијев “Медиа форум” сајтына дејиб ки, 22 јашлы оғлу дөрд ҝүндүр Исмајыллы Рајон Полис Шөбәсиндә сахланылыр вә әлавә һеч бир мәлумат ала билмир: “Отел јанан заман оғлум да орада олуб. Оғлум дејиб ки, ҝедиб ҝөрдүм отел јаныр, бир дәнә јанан картону ҝөтүрүб атдым кәнара. Елвини сәһәр ҝәлиб евдән апардылар. Онлара галса, бүтүн оланлары, дағынтылары мәним оғлумун бојнуна гојарлар. Амма әлләриндә факт јохдур”.
Низами Әмирәлијевин сөзләринә ҝөрә, дөрд ҝүндүр Исмајыллы Рајон Прокурорлуғуна вә полис шөбәсинә ҝедир, амма һеч бир мәлумат ала билмир: “Һәр дәфә дејирләр ки, јахшы олаҹаг. Әлавә һеч нә демирләр. Оғлуму мәһкәмәјә чыхармајыблар, мәһкәмә гәрары олмадан сахлајырлар. Һәбс олунанлардан бәзиләрини заминә бурахыблар. Һазырда Исмајыллы Рајон Полис Шөбәсиндә 20 нәфәрдән артыг шәхс сахланылыр. Елә адамлар вар ки, өвладлары һагда һеч бир мәлумат ала билмир. Бәзи шәхсләри Шамахы, Гәбәлә вә Ҝөјчај рајон полис идарәләриндә сахлајырлар. Бу ҝүн оғлума исти палтар, јемәк апардым. Амма јемәји гајтардылар”.
Диггәт: Хәбәрдән истифадә етдикдә мәнбәјә истинад лазымдыр
