“Бисмиллаһир-Рәһманир-Рәһим!”.
Әслиндә, мән елә бу кәлмәләрлә башламаг истәјирдим, амма горхдум. Чүнки сон заманлар белә сөзләри дилә ҝәтирән нечә-нечә ҝүнаһсыз инсаны шәр-шәбәдәләјиб дамлајыблар. Сонра фикирләшдим ки, јахшысы будур: “Вар олсун демократија, мәһв олсун автократија!” шүары илә башлајам. Өзлүјүмдә чох чәк-чевир еләдим, ҝөрдүм јоох, бундан да ваз кечмәлијәм. О сәбәбдән ки, бизим өлкәдә бу кәлмәләри демәк бирбаша “срок” алмаг демәкдир. Сајыны-һесабыны итирдијимиз, әзишдирилиб-тутулан мүхалифәтчиләр мәһз елә бу сөзләрин ҝүдазына ҝетмәјибләрми?.. Нә ишимә, ағрымајан башыма нијә јајлыг бағлајым?.. Амма инанын, горхмасајдым, јәни хофланыб-чәкинмәсәјдим, онда елә мәтләбләрдән данышардым ки!... Дејәрдим ки, ај филан-филан шүдәләр, сиз нејнирсиз, башыныза ат тәпиб нәдир; ҝүл кими мәмләкәти сүрүјә-сүрүјә нијә бу ҝүнә гојурсуз? Мәҝәр анламырсыз ки, гуршандығыныз бу зәһримар коррупсија илан сүмүјү олуб, кечиб милләтин боғазына вә артыг милли тәһлүкәсизлјимизин өзүнү тәһлүкәјә салыб?.. Бу нә бәлады мүбтәла еләмисиз бизи?!. Рүшвәтхорлуг диҝәр “хорлуг”лардан, тајфабазлыг диҝәр “базлыг”лардан “ход” ҝедир. Елә һәмин о “ходҝедән” тәпәҝөз иштаһалы мәмурларымызын һесабынадыр ки, дәјјуслар дәстәси ајдан ары, судан дуру инсанлара гејрәт дәрси кечирләр. Һарамзадалар һалал адамларын башында турп әкмәк експерименти апарыр, надүрүст сәлаһијјәт саһибләри исә, “бабам мәнә кор дејиб...” дәрәбәјлији нүмајиш етдирирләр. Рәгси тәлим еләјән ахсаглар, һөкумәти идарә еләјәнләр исә, һәмин ахсагларын һәмгафијәси! Дејәсән, һәгигәтән ҝәлиб сонун башланҹығына чатмышыг... Аллаһ ахырындан горусун! Һамы кими, мән дә бу горхулу дуруму вә шүбһәли мәгамлары ҝөрүрәм, ешидирәм, үстәлик, билирәм дә. Ынтәһасы, ағзымы ачыб дилләнә билмирәм. Нејним, горхурам. Горхурам, гардаш!... Әввәла, әрз еләјим биләсиз: мән о гәдәр садәлөвһ дејиләм ки, бүтүн бунлары ҝөрүб анламајам. Амма о гәдәр сәфеһ дә дејиләм ки, белә шејләри ачыб-ағардам вә һарда ҝәлди зәвзәјәм. Бир дә ҝөрдүн, вуруб башымы партлатдылар. Ја ҹибләримә беш-он кило тирјәкдән-заддан басыб “һоп-стоп” еләдиләр. Нејнәјәҹәм? Јахуд, јазы масамын долабындан “Ҹ-300" ракет комплекси тапдылар. Бунлара нә вар ки, аҹындан гәпијә ҝүллә атанлары ганунсуз силаһ сахламаг маддәси илә ҝүнаһландырыб тутмурлар бәјәм? Ыгор Киоду, Һоперфилдди, ја өзҝә ҝөзбағлајыҹылар, бунларын јанында сүдәмәр көрпәдиләр. Ди ҝәл ки, нә хејри, сән һа де, һа өзүнү өлдүр-дедикләрин топ кими, таппадан дивара дәјиб дүбарә гајыдыр.
Кора ҝүзҝү версән “сағ ол” демәз!
Бир дә, Азәрбајҹана јухарыдан ашағы бахан вә ону, дузу-истиоту јербәјериндә вурулуб јахшыҹа гызардылмыш табака кими ҝөрәнләрә нә дејәсән? Вәтәнә јаландан “АНА” дејиб, ондан ајағысүрүшкән гадын кими истифадә етмәк истәјән вәләдүзналара нәји сүбут едәсән?! Јахуд, өз ҹаһ-ҹәлаллы шәхси бағыны Гарабағдан даһа чох истәјән вә боғазданјухары һамыдан бәрк “Гарабағ, Гарабағ!” бағыран худпәсәндләрә нә баша саласан?.. Һәрдән дирсәјими дишләјә-дишләјә галырам, өз-өзүмә: “Сәбир елә, даргурсаг олма, дөз, дөз...- дејирәм-, бычаг сүмүјә дирәнәндә гышгырыб-бағырарсан. Гышгырарсан ки, еј дади-бидад, ај башыбатмыш, виҹаданы итмиш ҹәнабы шәрифләр, ај атасындан даһа чох гоншусуна охшајан дүшүк мәмурлар! Ај инсафыны хәрҹләјиб пулу - әстәғфуруллаһ - Аллаһ сајан мүштәбеһ олигархлар! Ај рүшвәт вә сифаришлә ишләјән әли-гәлби әјри мәһкәмә һакимләри! Ај милләтиндән бихәбәр сахта милләт вәкилләри! Ај мүхалифәти хорттан либасында ҝөрән гушбејин дәјәнәк саһибләри! Ај ”хозејин" олмаг үчүн өзүнү нөкәр кими апаран вәзифә-мәнсәб өлүләри! Сиз бу ХАЛГЫ севмәлисиниз! Бу ХАЛГЫ севмәк сизин борҹунуз, вәзифәниз, өһдәчилијиниздир!! Јахшы, севмирсиз-севмирсиз (тутаг ки, севҝијә зор јохдур), онда һеч олмаса, нифрәт еләмәјин бу бинәва милләтә. Гојун һарада өлүрсә, орада өлсүн. Мүтрүфләр тәки нә вахтаҹан домбалаг аша-аша јаландан “демократија” һоггабазлығы чыхарыб еррозијалы үрәјиниздә аҹы НЫФРӘТ ҝәздирәҹәксиниз?! Нә вахтаҹан зәли кими, - даһа доғрусу, ҝәнә кими, чүнки зәли нәһајәтдә дојуб өз хошујла дүшүр, ҝәнәни исә ҝүҹлә гопартмаға, чох вәдә елә дәријлә, әтлә бирҝә гопартмаға мәҹбурсан, - јапышыб гопмајаҹагсыныз?!. Бу ҝүн һаким партијанын сүртүлмүш ашыға бәнзәјән вә саһибләри үчүн һәмишә “тојхан” дуран сөзчүләринин ҹанына, ганына вә һеч шүбһәсиз ки, һәм дә затына һопмуш ЈАЛАНы ҝөрмәјәнми вар? Вә бу ЈАЛАНын, әслиндә, һакимијјәтин руһуна чөкмүш өлүм рәнҝини бәзәјиб ҝизләтмәјә хидмәт етдији дә артыг һеч кәсә сирр дејил. Шәр демәсән хејир ҝәлмәз, сүрреализмин дәдәси, “Әријән саатлар”ын мүәллифи даһи Салвадор Дали азыб тәсадүфән Азәрбајҹана ҝәлсәјди, валлаһи, үчҹә ҝүнүн ичиндәҹә дәли оларды. Ҝәлиб ҝөрәҹәјди ки, сән демә, онун әријиб донмуш, дашлашмыш ЗАМАНы бизим өлкәдә баш верәнләрин мүгабилиндә тоја ҝетмәлијмиш. Ҝөрәҹәјди ки, бурада заман елә донуб-дашлашыб вә елә бир һејкәлә, даһа доғрусу, һејкәлләрә, - өзү дә бир нәфәрин һејкәлинә, - чеврилиб ки, бу, нәинки јухуларын реаллығына, һәтта реаллығын јухуларына да “фора” верир. Аналогу олмајан анормал мәмләкәт бах, буна дејәрләр!
Јәни, утанмасан ојнамаға нә вар ки.... Тәсәввүр еләјәк ки, мән јекә бир сәһв бурахыб, дуруб да дедим ки, бәс, бу һејкәлләрин башларыны мүтләг “резбавој” дүзәлтмәк лазымды. О мәнада ки, бәраји-еһтијат, олмады елә, олду белә, - гәфилдән бу һакимијјәт дәјишди, та әзијјәтә, хәрҹә-зада дүшмәјәк, ҝөтүрүб һәмин о башлары кәмали-әдәблә фырладыб ачаг, јеринә мәсләһәт билинән өзҝә бирисинин башыны бағлајаг, вәссәлам!
Һәә, инди әјри отураг, дүз данышаг. Туталым, мән горхуб-һүркмәдән, белә, јахуд, буна бәнзәр диҝәр бир тәклифлә чыхыш едирәм. Үстәлик, һарада вә кимә ҝәлди, ҝилејләнирәм ки, бәс, гојмајын, бунлар жуликдиләр, халгын ҹибинә ҝирирләр, бәс, бунлар доғма Азәрбајҹанымызын гырх сәккиз милјард һалал пулуну чырпышдырыб һарам офшор банкларда ҝизләдибләр, јүз милјонларла дәјәриндә виллалар, маликанәләр тикдирир, әҹнәби өлкәләрдә өз шәхси бизнесләринә 9-10 рәгәмли фантастик сәрмајәләр јатырыр, ҹаным сәнә десин, јахталар, тәјјарәләр, адалар алырлар, банк, ҝөмрүк вә с. вә и. а. махинасијалары еләјирләр!.. Демәли, бу һакимијјәт сөзүн һәм мәҹази һәм дә әсил мәнасында мүтәшәккил ҹинајәткарлыгла мәшғулдур!.. Бунлары десәм, билирсиниз ноолар? Елә һәнҝамә, елә мәрәкә гопар ки, фаҹиәдән даһа чох сијаси триллери хатырладан “Ҝүләр вә Елшад” дастаны ади мускомедија тамашасына чевриләр. Ышыг ҝәлән јерә памбыг тыхајан реҹим јијәләри вә бу “јијәләр” үчүн сино ҝедән сахтабаш ММ-ҹиләр, гујругбулајан игтидар камикадзеләри, әләлхүсус газан диби јалајан пешәкар гарајаханлар чаггал сүрүсү тәк үстүмә дүшүб сөјүш, һәдә, тәһгир, аҹыг вә һиккә атәшинә тутарлар мәни. Бах, елә бу сәбәбдән дә дилими динҹ гојуб киримишҹә отурмушам. Дејирләр, сусмагла чох шеј газанмаг олар, лал олмагла һәр шеји итирмәк олар. Одур ки, галмышам ики даш арасында - ја сусуб хымыр-хымыр варланмалыјам, ја да лал олуб бала-бала олан-галанымы итирмәлијәм... Амма бирҹә шеји дәгиг билирәм: нәји дә олса, ҝәрәк башымы итирмәјим! Башымы итирсәм, онда мәнимлә бу һакимијјәтин нә фәрги олаҹаг?... Мүхтәсәри, “Десәм өлдүрәлләр, демәсәм өлләм!”.
Әслиндә, мән дедикләримдән даһа гәлиз мәсәләләрдән аҝаһам. Мәсәлән, билирәм ки, мәним, сәнин, онун, јәни һамымызын “оптовој” горхусу халгын мүдири ролуну ојнајанларын “заправка”сыдыр. Машын јанаҹагла ишләдији кими, бунлар да бизләрин горхусујла “заправка” еләјиб ҝүҹләнирләр. Ҝүҹләндикҹә дә, илһама ҝәлиб гызышыр, јумругламаг, ҹырмагламаг вә шыллагламаг севдасына дүшүрләр. Риҹа едирәм, гынамајын мәни, бүтүн бунлары дәрк еләјә-еләјә, јенә дә горхурам. Һәрчәнд, һәр ҝүн бу сајаг һисли-паслы мәсәләләри ҝөрүб-ешидәндә үрәјим ағрыјыр, ијрәнирәм, утанырам, хәҹаләт чәкирәм... Амма бунунла бирҝә, гајыдыб ҹынгырымы да чыхартмаға - үзр истәјирәм - “духум” чатмыр. Горхурам. Үрәк еләмирәм. Мәсәл вар, дејәрләр, Аллаһ-Тәала дөвшаны ҹәзаландырмаг истәјәндә она бир азҹа артыг ҹәсарәт әта еләјир... Ынди мән башыбәлалы да, јүз фаиз әминәм ки, ағзымы ачыб һагдан, әдаләтдән-филандан данышан кими, дәримә саман тәпмәјә башлајаҹаглар. Сонра да, јахамдан јапышыб елә силкәләјәҹәкләр ки, дәјмишимдән әввәл калым төкүләҹәк. Башга вахт олсајды, јәни доғру сөзә, азад фикирә, әгидә вә виҹдан азадлығына ҝөрә мүбаризәјә галханлары вуруб, түркүн мәсәли, “хосунбај” еләмәсәјдиләр, онда нә варды ки, данышардым да, мүбаһисә дә, ифша да еләјәрдим, лап белә, гышгырыб фәрјад да гопарардым. Бир дә ахы, нијә мән тәкбашына данышмалыјам? Јалгузаг ҹанаварам, ағ гарғајам, ја Дон Кихотам, нәјәм? Һеч ким дилләнмир, һеч ким етираз еләмир, - мүгәвва кими, мат-мәәттәл дајаныб да дурублар. Дәнизимизи ҝөз ҝөрә-ҝөрә оғурлајырлар, мешәләримизи чәпәрләјиб ағаҹ-ағаҹ гамарлајырлар, нөјүтүмүзү јағмалајыб дәдә малы кими, баррел-баррел сатырлар... Һамы горхудан сусур! Һејсијјатымызы, гүрурумузу, динимизи, дилимизи тәһгир едир, мәдәнијјәтимизи, мәнәвијјатымызы мәнҝәнәләрә салыб әзир, әхлагымыза гаршы ТВ вә Медиа пиратлары бурахырлар... Јенә дә, һамы ағзыны килидләјиб сусур! Тәһсилимизи, сәһијјәмизи, ҝүн-ҝүзәранымызы ит ҝүнүнә гојур, милләти (оху: рәијјәти) чөрәклә имтаһана чәкирләр... Кимсә горхудан һеч “
