Әһли Бејт -АБНА- хәбәр аҝентлијинин вердији хәбәрә әсасән Азәрбајҹанын хариҹи ишләр назири Елмар Мәммәдјаров бир груп информасија аҝентлијинә вердији мүсаһибәдә дејиб: “Дәфәләрлә бәјан етмишик ки, Азәрбајҹан өз әразисиндән Ирана гаршы истифадә едилмәсинә имкан вермәјәҹәк”.
Гәрб мәтбуатында тез-тез јер алан “Ирана гаршы һәрби кампанијада Азәрбајҹан әразисиндән истифадә олуна биләр” кими иддиалары дәјәрләндирән ХИН башчысы гејд едиб ки, бу кими фикирләр әсассыздыр:"Бир сыра хариҹи күтләви информасија васитәләриндә мүтәмади олараг бу мәсәлә илә бағлы әсассыз, һәгигәтә ујғун олмајан мәлуматлар дәрҹ олунур. Бу ҹүр тәһриф олунмуш мәлуматлар Хариҹи Ишләр Назирлији сәвијјәсиндә вә мүхтәлиф сәвијјәләрдә тәкзиб едилиб. Биз дәфәләрлә бәјан етмишик ки, Азәрбајҹан өз әразисиндән Ирана гаршы истифадә едилмәсинә имкан вермәјәҹәк. Азәрбајҹан мүстәгил, өз марагларыны тәмин едән сүлһсевәр хариҹи сијасәт һәјата кечирир вә бу сијасәт Ермәнистан истисна олмагла бүтүн гоншу өлкәләрлә мүнасибәтләрин гаршылыглы етимада вә һөрмәтә әсасланмасыны шәртләндирир. Биз реҝионда һәр һансы јени мүнагишә оҹагларынын јаранмасыны истәмирик вә бүтүн мөвҹуд анлашмазлыгларын сүлһ вә данышыглар јолу илә һәллинин тәрәфдарыјыг".
Диггәт: Хәбәрдән истифадә етдикдә мәнбәјә истинад лазымдыр
