Әһли Бејт -АБНА- хәбәр аҝентлијинин вердији хәбәрә әсасән Пајтахт Афинада хејли сајда инсан бир араја ҝәләрәк, јени сәрт ислаһатлара гаршы етираз едиб. Етиразчылар маашларын азалмасы вә иш јерләринин ихтисары илә нәтиҹәләнән сәрт өлчүләрә гаршы шүарлар сәсләндирибләр. Нүмајшчиләр Инзибати Ислаһатлар Назирлијинин бинасыны јумурта-помидор атәшинә тутуб.
Аврозона Хилас Фондунун әсас “спонсору” олан Алманија парламенти Јунаныстана сајҹа 3-ҹү олан 43.7 милјард авролуг малијјә јардымы пакетинин ајрылмасына даир гәрар гәбул едиб.
Словенијанын пајтахты Лјублијанада кечирилән күтләви аксијада да иғтишашлар төрәдилиб. Азғынлашмыш етиразчылар парламент бинасына сохулмаға чалышанда полислә мүхалиф фәаллар арасында гаршыдурма јараныб. Етиразчылар полис үзәриндә даш, шүшә габлар вә алышган маддәләр атыб.
Асајиш кешикчиләри күтләни дағыдан заман бир нечә етиразчыны сахлајыб.
Гејд едәк ки, иғтишаш баш вермәздән әввәл, минләрлә инсанын иштиракы илә Словенија президенти вә онун Назирләр Кабинетинә гаршы күтләви динҹ јүрүш кечирилиб. Лјублијана күчәләриндән кечән етираз аксијасында һөкүмәтин дәрһал истефа вермәси тәләб едилиб.
Авропанын ваһид валјута зонасында да нөвбәти дәфә рекорд ишсизлик сәвијјјәси гејдә алыныб. Статистикаја ҝөрә, октјабр ајында Аврозонанын јарандығы 1999-ҹу илдән бәри ишсизлик ән јүксәк сәвијјәјә - 11.7 %-ә чатыб. Испанија вә Јунаныстан ишсизләрин ән чох олдуғу аврозона өлкәләридир. Һәр ики өлкәдә ишсизлик сәвијјәси 25%-дән чохдур, ҝәнҹләр арасында ишсизлик сәвијјәси исә 60%-и кечиб. Експертләр бу рәгәмин ҝәләҹәкдә сијаси вә игтисади фәсадлара јол ача биләҹәјини һесаб едир.
Диггәт: Хәбәрдән истифадә етдикдә мәнбәјә истинад лазымдыр
