Әһли Бејт -АБНА- хәбәр аҝентлијинин вердији хәбәрә әсасән Илаһијјатчы Талеһ Бағыров Ашуранын Азәрбајҹанда гејри-иш ҝүнү кими гејд олунмасыны тәклиф едир: “Өлкә ганунвериҹилијинә ҝөрә, дини бајрамлар Гурбан вә Рамазан гејри-иш ҝүнү кими гејд олунур. Дини матәм – Ашура да тәгвимә гејри-иш ҝүнү кими салынмалыдыр”.
Талеһ Бағыров вердији ачыгламасында Ашура ҝүнү инанҹлыларын, диндарларын раһат шәкилдә әзадарлыг етмәси үчүн белә бир тәклиф галдырдығыны дејир: “Бу, Азәрбајҹанда әксәр диндарларын, инанҹлыларын истәјидир. Ашура үмумиликдә зүлмә етираздыр. Бурада сөһбәт тәкҹә ҝөз јашындан ҝетмир. Имам Һүсејн инсанларын азад јашамасы, өз динләрини горумасы үчүн ҹаныны гурбан вериб. Ола биләр бу тәклиф өлкәдә бирмәналы гаршыланмасын. Имам Һүсејн Ашурасы һиҹаб гадағасы тәтбиг едәнләрин, инанҹлы шәхсләри мүхтәлиф бәһанәләрлә зиндана атанларын ҹанына, әлбәттә, горху салаҹаг. Инсанлар ачыг шәкилдә етираз сәсини галдырмаса белә, Ашуранын өзү залым һөкумәти нараһат едәҹәк. Чүнки Мәһәррәм ајында дини горумаға, азадлыға, виҹданла јашамаға чағырыш шүарлары сәсләнир”.
Илаһијјатчы вахтилә сабиг баш назир, Азәрбајҹан Халг Партијасынын сәдри Пәнаһ Һүсејнин белә бир тәклифлә чыхыш етдијини хатырладыб: “Ашура һәм дә бүтүн азәрбајҹанлыларын һүзн ҝүнүдүр. Һөкумәт идарәчилији халгын милли-мәнәви дәјәрләринә ујғун һәјата кечирилирсә, Ашура гејри-иш ҝүнү елан олунмалыдыр. Инсанлар раһатлыгла мәсҹидә ҝәлмәли, пејғәмбәрә мәһәббәтини билдирмәлидир”.
Милли Мәҹлисин сосиал сијасәт комитәсинин сәдри Һады Рәҹәбли “Медиа форум” сајтына ачыгламасында дејиб ки, бу тәклифин реаллашмасы мүмкүн дејил: “Азәрбајҹан ганунвериҹилији буна имкан вермир. Биз дүнјәви дөвләтдә јашајырыг. Ашура дини мәрасимдир, она ҝөрә дә буну гејри-иш ҝүнү кими тәгвимә салмаг олмаз”.
Диггәт: Хәбәрдән истифадә етдикдә мәнбәјә истинад лазымдыр
