Әһли Бејт -АБНА- хәбәр аҝентлији- Бу, елә бир һадисәдир ки, индијә гәдәр дә сәс-сәдасы әзадарлыг мәрасимләринин әмәлә ҝәлмәсинә сәбәб олур. Бурада мараглысы будур ки, тәһрикедиҹи бир гүввә јохдур, анҹаг пак дини вә инсани севҝидән гајнагланыр. Бу бөјүк мәрасимләрин сәбәби бу һадисәни әзиз тутмагдыр. Һеч бир тәблиғата еһтијаҹы јохдур.
Бәзән биз бу һәгигәти билирик. Анҹаг чохлары үчүн һәлә ајдын олмајан бир мәсәлә вардыр ки, бу һадисәјә нијә бу гәдәр әһмијјәт верилир?
Бу һадисә һәгигәтдә ики мәктәб олан фәрди вә әгидә мәктәбинин мүбаризәсидир. Бу һадисәнин алову һәлә дә сөнмәмишдир. Бу мүбаризә бүтүн пејғәмбәрләрин (ә) вә салеһ бәндәләрин мүбаризәсинин давамыдыр.
Ислам Пејғәмбәри (с) дөврүнүн бүтпәрәстлијинә вә хүрафатына гаршы чыхмыш вә мүбаризә апармышдыр. Мәзлумлары вә зүлм ҝөрмүшләри әтрафында топлајыб, бүтпәрәстләрә гаршы гијам етмишди. Онларын башында Әбу Сүфјан дурурду. Нәтиҹәдә Ислам дининин әзәмәти гаршында әјилиб, тәслим олдулар.
Әлбәттә онларын тәслим олмағы мәһв олмаг демәк дејилди. Онлар фәалијјәтләрини пәрдә архасына салыб, тәдриҹән һәрәкәт етмәјә башладылар.
Бәни-Умәјјә Һәзрәт Пејғәмбәрин (с) вәфатындан сонра инсанлары Исламдан әввәлки вәзијјәтә гајтармаға чалышырды вә мүсәлманлар һәр нә гәдәр Исламдан узаглашырдыса, онлар үчүн даһа фүрсәтли бир заман јаранырды.
Онлар ҹаһилијјәт дөврүнүн чох сајда сүннәтләрини ҹанландырдылар. Ҹаһилијјәт дөврүнүн гијамы үчүн һазырлашдылар.
Мәҝәр Имам Һүсејн (ә) өзүнүн пик нөгтәсинә чатан бу әгидәләри гәбул едә биләрдими? Мәҝәр онун сүкутуну Аллаһ вә Пејғәмбәр (с) бәјәнәрдими?
О, ја ҝәрәк сусуб бу ҹаһилијјәт дөврүнүн әгидәләрини гәбул едәрди, ја да өз пак ганы илә тарихә јаддан чыхмајан бу һадисәни јазарды. Бәли, Имам (ә) икинҹи јолу сечди. О, ән бөјүк рисаләтини јеринә јетирди. Ислам тарихинин јолуну дәјишдирди. О, Әмәвиләрин залым сәјләрини пуч етди вә онлара бөјүк бир зәрбә вурду. Бәли, бу Имам Һүсејн (ә) гијамынын һәгиги симасы иди. Бурадан баша дүшмәк олар ки, бу гијам нијә тарих боју јаддан чыхмыр. О, бир әср вә бир замана аид бир мәсәлә дејилди. Һәдәфи ҹавидандыр.
Әзиз Имам (ә) - Аллаһ вә Ислам јолунда, һагг вә әдаләт јолунда, инсанлара ниҹат вермәк јолунда, бәшәри дәјәрләрин дирчәлдилмәси јолунда шәһид олду.
Белә бир суал верирләр ки, әҝәр Имам Һүсејн (ә) гәләбә чалыбдырса, нијә матәм кечиририк? Бу ҝөз јашы о ҹүр бөјүк һадисәјә лајигдир. Бу суалы верәнләр әзадарлығын фәлсәфәсини билмирләр.
Инсанын ағламасы дөрд ҹүр олур:
1. Шөвгә ҝәлиб, ағламаг. Өвладыны нечә ил бундан габаг итирмиш вә јени тапмыш ананын ҝөз јашларыдыр. Ја шәрләниб тутулмуш, сонрадан һәбсдән бурахылмыш һәјат јолдашыны ҝөрән арвадын ағламасыдыр. Әсҝәрликдән сағ-саламат гајыдан оғлуну гаршылајан атасынын көврәлмәсидир. Кәрбәла һадисәнин бир чох һиссәләри мәһз шөвгдән гајнагланан ҝөз јашларыдыр. Бу ҝөз јашы мәғлуб олмаға дәлаләт едә биләрми?
2. Севҝи ҝөз јашлары. Инсанын синәсиндә јерләшән үзв гәлбдир. Бу гәлб бир чох севҝи бағларыны тәҹәссүм едир. Инсан сојуг гыш ҝүнүндә анасынын гуҹағында ҹан верән јетими ҝөрән заман неҹә ҝөз јашларыны сахласын?! Бу гәлбдир, даш дејил. Бир көрпәнин ата гуҹағында ҹан верәрәк, әл-ајаг атмасыны мүшаһидә етмәк неҹә ҝөз јашларына мане ола биләр ки? Бу зәифлик әламәти дејилдир, бу гәлбин дири олмасына дәлаләт едир.
3. Һәдәфә чатмаг ҝөз јашлары. Бәзән ҝөз јашлары һәдәфә чатмағын әламәтидир. Бәзән инсанлар шүар верир вә бу һадисә һаггында шеирләр гошурлар. Анҹаг ҝөзләриндән бир дамҹы белә јаш ҝәлмир. Бу, сахта бир севҝидир. О кәс ки, Имам Һүсејн (ә) һадисәсинә һәгигәтән үрәкдән јанырса, бу һадисәнин һаггында шеир вә ја шүар ешидән заман ҝөз јашлары ахмаға башлајар. Чүнки бу ҝөз јашлары гәлбин ајнасыдыр. Онун садиг олдуғуну ҝөстәрир. Бу ҝөз јашлары Имамын (ә) һәдәфинә вәфардар олдуғуну елан едән ҝөз јашларыдыр.
4. Зилләт вә мәғлубијјәт ҝөз јашлары. О кәсләр ки, өз һәдәфләринә чатмамышдыр, ирәли ҝетмәк үчүн шүҹаәтләри јохдур, бу ҹүр ҝөз јашлары төкүрләр. Онлар зәиф инсанлардыр. Һеч бир заман Имам (ә) үчүн белә ҝөз јашы төкмә, чүнки Имам бу ҹүр ҝөз јашына нифрәт едир.
Имам (ә) үчүн әзадарлыг кечирмәклә јанашы Имам Һүсејн (ә) мәктәби вә тәрәфдашлары илә таныш олсаг јахшы олар. О Һәзрәт (ә) кими пак јашамаға вә пак дүшүнмәјә вә дүзҝүн әмәлләр етмәјә чалышаг.
Һазырлады: Мәшһәди Ханым
Диггәт: Хәбәрдән истифадә етдикдә мәнбәјә истинад лазымдыр
