Әһли Бејт -АБНА- хәбәр аҝентлијинин вердији хәбәрә әсасән һәкимләрин мүшаһидәләринә әсасән, һамиләлик дөврүндә гадынларын 1/3 һиссәсиндә гәбизлик гејд едилир. Һамилә гадынларын организминдә баш верән һормонал дәјишикликләр, о ҹүмләдән проҝестеронун сәвијјәсинин артмасы бағырсагларын перисталтикасынын (бағырсагларын јығылмасы просесидир ки, бунун да нәтиҹәсиндә нәҹис күтләләри хариҹ едилмәк үчүн анал дәлијә доғру һәрәкәт етдирилир) азалмасына сәбәб олур.
Бундан башга өлчүләри бөјүмүш олан ушаглыг да бағырсаглара тәзјиг едәрәк онун нормал фәалијјәтинә манечилик төрәдир. Һамиләлик дөврүндә гәбизлијин баш вермәсинә сәбәб олан диҝәр факторлар: әксәр һалларда гадынларда гејд едилән анемијаја ҝөрә онлара тәјин олунан дәмир препаратлары; гејри-дүзҝүн гидаланма; һамилә гадынларын аз һәрәкәтли һәјат тәрзи. Гәбизлик һамиләлијин ҝедишинә тәһлүкә јарада биләр. Белә ки, дефекасија заманы гадын ҝүҹәнмәјә мәҹбур олур вә бу заман ушаглығын тонусуну да артыр. Нәтиҹәдә бу һамиләлијин позулмасына тәһлүкә јарада биләр. Бундан башга һамиләлик дөврүндә гәбизлијин баш вермәси, гадынларда бабасил вә дүз бағырсагда чатларын әмәлә ҝәлмәсинә дә сәбәб ола биләр. Бу патоложи просесләрин һәр бири дефекасија актынын даһа да чәтинләшмәси илә нәтиҹәләнир. Һамиләлик дөврүндә олан гәбизликләрин профилактикасы вә онларын мүалиҹәси үчүн јағлы, гызардылмыш гидалар, ағ чөрәк вә ағ ундан һазырланан мәһсуллардан, түнд чај вә кофе, шоколад, дүјү, манна јармасы, нар, һејва кими мәһсулларын гәбул едилмәсиндән имтина етмәк лазымдыр.
Гәбизликләрин профилактикасы үчүн һәр сәһәр јатағыныздан дурдугдан сонра, отаг температурунда олмагла бир стәкан су ичмәк (јахшы олар ки, тәмиз вә гајнадылмамыш) мәсләһәт ҝөрүлүр. Һамиләлик дөврүндә гәбизликләрин гаршысыны алмаг үчүн гида расионуна ашағыдакы гидаларын дахил едилмәси дә ваҹиб һесаб олунур: - бағырсагларын һәрәкәт функсијасыны стимуллашдыран гида маддәләри – гара ҝавалы вә әнҹир гурусу, чуғундур, битки јағлары (салатлара әлавә един, јемәкләри биширин), тәзә һазырланмыш мејвә-тәрәвәз ширәләри; - нәҹис күтләсини артыран мәһсуллар - буғда кәпәји (ону истәнилән јемәкләрә, салатлара әлавә етмәк олар), чиј вә биширилмиш тәрәвәзләр; - тәркибиндә бифидобактериләр олан мәһсуллар – биојогуртлар, биокефирләр. Гида расионундакы бу ваҹиб мәсәләләрдән савајы, бағырсагларын јахшы ишләмәси үчүн һамилә гадынлар һәмчинин ҝүн әрзиндә кифајәт гәдәр маје ичмәли, мүмкүн гәдәр чох һәрәкәт етмәлидирләр (тәмиз һавада ҝәзмәк, бәдән тәрбијәси һәрәкәтләри илә мәшғул олмаг вә с.). Һамиләлијин 1-ҹи јарысында (20-ҹи һәфтәсинәдәк) гадынлар ҝүн әрзиндә 2-2,5 литр маје гәбул етмәлидирләр.
Һамиләлијин 20-ҹи һәфтәсиндән сонра гадынларда ган дөвранынын сүрәти 40% артдығы үчүн ҝүн әрзиндә гәбул едилән мајенин мигдары 1,5 литрәдәк мәһдудлашдырылмалыдыр (сулу гидалар, тәрәвәзләр вә мејвәләр дә нәзәрә алынмагла). Һамиләләлик дөврүндә, мүалиҹә һәкими илә мәсләһәтләшмәдән, һеч бир һалда ишләдиҹи дәрманлар вә һәтта от дәмләмәләри гәбул етмәк, һәмҹинин ималә етмәк дә олмаз! Бунлар чох тәһлүкәли олуб, сон нәтиҹәдә ушагсалмаја сәбәб ола биләр!
Диггәт: Хәбәрдән истифадә етдикдә мәнбәјә истинад лазымдыр
