Әһли Бејт -АБНА- хәбәр аҝентлији- Сијаси партија нәдир? Дүнја мигјасында гәбул олунмуш үмуми тәриф беләдир: Сијаси партија хүсуси иҹтимаи тәшкилат, бирликдир. Онун гаршысында дуран вәзифә дөвләтдә сијаси һакимијјәтә саһиб олмаг вә ја дөвләт һакимијәти органларында, јерли өзүнүидарәчиликдә нүмајәндәләр сәвијјәсиндә иштиракла бу һакимијјәтдә тәмсил олунмагдыр. Партијанын програмы олур, програмда идеоложи бахыш, мәгсәдләр, мәгсәдә чатмаг јоллары өз әксини тапыр.
Партијалар елита партијасы, халг партијасы, етник партија, һәрәкат партијасы ола биләр. Сечки бирликләри әсасында јарадылан партијалар даһа чох рәсмиләшиб. Мәсәлән, АБШ вә Гәрбдә һакимијјәтдә олан вә ја һакимијјәтә ҝәлмәк үчүн мүбаризә апаран әксәр партијалар бу типдәндир.
Бүтүн бунлар кағыз үзәриндәдир. Әслиндә партијалар дини вә индивидуал олмагла ики група бөлүнүр. Бу бөлҝүнү партијаларын програмларында ачыг мүшаһидә етмәк олур. Програм ким тәрәфиндән һазырланыр, онун базасы нәдир? Бу ја мүгәддәс китабдыр, ја да шәхс вә ја групун дүшүнҹә мәһсулу. Халг, милләт, етник груп мәнафеләрини тәмсил едән партијаларын да програмы тәзадлы дүшүнҹә мәһсулудур.
Латын мәншәли “партија” сөзү әрәбҹәјә “һизб” кими тәрҹүмә олунур. Гуранда бу сөздән бизим нәзәрдә тутдуғумуз мәнада истифадә едилибми? Маидә сурәсинин 56-ҹы ајәсиндә бујурулур: “Һәр кәс Аллаһы, Онун Пејғәмбәрләрини вә иман ҝәтирәнләри өзүнә рәһбәр тутарса, галибдир. Шүбһәсиз, гәләбә Аллаһ фиргәсининдир (партијасынындыр).”
وَمَنْ يَتَوَلَّ اللَّهَ وَرَسُولَهُ وَالَّذِينَ آمَنُوا فَإِنَّ حِزْبَ اللَّهِ هُمُ الْغَالِبُونَ
Демәк, Гурани-Кәрим партијалашманы гәрб партијалашмасындан (19 әср) ән азы 12 әср габаг ҝүндәмә ҝәтирмишдир. Партија мүбаризә васитәси олдуғундан ана хәтти мүбаризә олан Исламда бу вәситәнин гејри-мәгбул сајылмасы ән азы наданлыгдан гајнагланыр. Мүасир сијаси полигонда “дин сијасәтдән ајрыдыр” вәсвәсәси исә Ислам дүшмәнләринин тәхрибатындан башга бир шеј дејил.
Мүсәлманларын нәһәнҝ топлум олараг мәнафеләрини ким тәмсил вә мүдафиә етмәлидир? Тәбии ки, дини јөнлү партијалар. Бу партијаларын тәсис групу, програмы, низамнамәси, ады шәхси рәј әссында сечилмир вә дини мејарлар ортаја ҝәлир.
Азәрбајҹан Ислам Партијасы бир сыра уғурсузлуглара бахмајараг Ислам мејарларына сәдагәтли олмушдур. Бу партијанын тәсис групунун әсасән диндар Нарадаран гәсәбәсиндән олмасы ортада шејтан әлинин олмамасына ҹидди сүбутдур. Партијанын тәшәббүскары, али шурасынын илк сәдри, сонрадан ағсаггалы мәрһум Һаҹы Әликрам Әлијевин сәдагәтинә шүбһә едән өзү шүбһәлидир дејә биләрик. Сонда партијанын рәһбәрлијинә һазырда һәбсдә олан Һаҹы Мөвсүм Сәмәдовун ҝәлиши бир даһа тәсдигләди ки, Азәрбајҹан Ислам Партијасы принсипләрә садигдир. Фәалијјәтләрдәки нөгсанлар исә партија јеткилиләри тәрәфиндән һеч заман инкар олунмајыб.
Азәрбајҹан Республикасында Ислама гаршы репрессијаларын түғјан етдији, дини кәсимә гаршы МОССАД-ын лајиһәләри үзрә иш апарылдығы заман Азәрбајҹан Ислам Партијасына гаршы да тәхрибат планларынын мөвҹудлуғу ҝерчәкдир.
Һансы планлар ҹызыла биләр? Бу барәдә һәлә ки сусмағы үстүн тутуруг. Шүбһә доғурмајан будур ки, партијада принсипләрә сәдагәт һәдәфдәдир. Азәрбајҹан ҹәмијјәтиндә мадди мәнафе, вәзифә, дөвләт һимајәси умаҹаглары бүтүн мүхалиф партијаларда сүзҝәҹ системини зәрури едиб. Сүзҝәҹ технолоҝијасындан јарарланмајан партијаларда идеоложи принсипләр шәхси мәнафеләрә гурбан верилир.
Азәрбајҹан Ислам Пертијасы илә бағлы тәхрибатлара гаршы габаглајыҹы тәдбирләр ҝөрмәк зәруридир. Бундан өтрү партијанын база принсипләринин вә адынын дәјишмәмәси зәрури ҝөрүнүр. Азәрбајҹанда ганун ишләмир вә вәд олунмуш (инандырыҹы олмајан) гејдијјат мәсәләсинә ҝөрә принсипләрдән вә принсипләр гәдәр мүһүм олан аддан имтина етмәк ојун ола биләр. “Ојундур” мүнасибәтини нөвбәти јазыја сахлајырыг.
Бабәк Тәбризли
Диггәт: Хәбәрдән истифадә етдикдә мәнбәјә истинад лазымдыр
