Әһли Бејт -АБНА- хәбәр аҝентлијинин вердији хәбәрә әсасән бу ҝүн Губада баш верән 1 Март олајларынын там олараг 3-ҹү ајы тамам олур. Амма буна рәғмән һәлә дә мәлум һадисәләрин там тәфәррүаты иҹтимаијјәтдән ҝизли тутулур. Һәтта һадисәләрлә бағлы апарылан истинтаг арашдырмалары илә бағлы да ҹәмијјәтә доғру-дүрүст мәлуматлар верилмир ки, бу да өз нөвбәсиндә мүхтәлиф шаијәләрин јаранмасы илә нәтиҹәләнир.
Ејни заманда, һәмин һадисәләр заманы онларла һәмјерлиләринин һәбс олунмасы сәбәбиндән Губа сакинләри арасында ҝәрҝинлик һәлә дә галмагдадыр. Рајондакы гајнагларын вердији мәлуматлардан белә мәлум олур ки, губалылар јенидән үсјана галха биләрләр.
Хатырладаг ки, 1 Март олајлары заманы деврилмиш иҹра башчысы Рауф Һәбибовун еви јандырылды вә ејни заманда наразы сакинләр иҹра һакимијјәтинин бинасына да зәрәр вурдулар. Вә һазырда бу һадисәләр һүгуг-мүһафизә органлары тәрәфиндән арашдырылыр. Һәмин әрәфәдә исә наразы сакинләри сакитләшдирмәк үчүн Бакыдан хүсуси миссијалы елчиләр ҝөндәрилмишди вә елчиләрин арасында нәглијјат назири Зија Мәммәдов, Президент Администрасијасынын шөбә мүдири Зејнал Нағдәлијев вә һәмчинин губалы депутат Ваһид Әһмәдов да вар иди.
Елә бу ҝүн губалыларын гәзәб һәдәфи дә Ваһид Әһмәдовун өзүдүр. Мәлуматы верән мәнбә билдирир ки, һадисәләрин ҝәрҝин анларында Ваһид Әһмәдов ҹамаатын гаршысына чыхараг һеч бир һәбсин олмајаҹағыны вә буна башы илә ҹавабдеһ олдуғуну билдириб: «Инди исә губалылар депутаты сөзүнүн үстүндә дурмаға, һәбс олунанлары азадлыға бурахмаға чағырырлар. Әкс һалда рајонда јенидән күтләви аксијалар баш галдыра биләр».(диа)
Ону да гејд едәк ки, сакинләрин депутата бир һәфтәлик вахт вердикләри дә сөјләнилир.
Диггәт: Хәбәрдән истифадә етдикдә мәнбәјә истинад лазымдыр
