Әһли Бејт -АБНА- хәбәр аҝентлији- Инди, Илһам Әлијевин тимсалында Исраилин өз “Нәсруллаһ”ы вар вә мәнҹә (ҝүләрәк) бизимки дүнјаја даһа ачыгдыр вә сивилдир.
Јәһуди әсилли италјан журналист Дарио Ферри ахыр заманлар јазыларында Азәрбајҹан, Иран вә Исраил мөвзусуна тез тез мүраҹиәт едир (www.giornalettismo.com/archives/245252/la-citta-delle-spie-2/).
Азәрбајҹана тез тез сәфәр едән бу журналист тәкҹә азәрбајҹанлыларын гонагпәрвәрлијиндән јох һәм дә зәнҝин президентә малик олмаларындан данышыр вә елә һесаб едир ки, президент Илһам Әлијев реҝион үчүн сөз саһиби олан сијасәтчидир, онун фикринҹә Илаһм Әлијев һәм Ҹәунби Гафгазда (ред. : мадам Ҹәнуби Гафгазда президент Әлијев сөз саһибидир, о заман нә үчүн Гарабағ һәлә дә ермәни дығаларынын ишғалы алтындадыр ?
Бу суалы имканым олса Ферридән сорушаҹағам), һәм орта асијада, һәм Русијада һәм, һәм Түркијәдә, һәм дә Иранда сөз саһибидир. Ону да дејим ки, бәзи хариҹи, хүсусилә дә алман вә исвеч журналистләринә нисбәтән бу Дарио Ферријә гаршы Азәрбајҹан һакимијјәти хүсуси бир симпатија илә гајғы ҝөстәрирләр. Мајын 11-дә О, да Бакыда иди, дејиләнә ҝөрә дә Еуровисион тәдбирләринә ҝөрә ҝәлиб.
Мајын 11-дә даһа бир мөтәбәр шәхс, Ферри илә әлагәси олмајан бир шәхс дә Бакыда иди, О, Ефраим Һәләвидир. Ефраим Һәләви Гүдсдә Јәһуди Университетинин стратежи арашдырмалар мәркәзинин рәһбәридир, дејиләнә ҝөрә әввәлләр исә Моссадын рәһбәри вәзифәсиндә чалышыб.
Ефраим Һәләви Исраилдә һөкумәт вә дөвләт рәсмиләрини кәскин тәнгид етсәдә нәјәсә ҝөрә сионист һөкумәти аддығы аддымлар заманы даима онун рәјини алыр вә һесаблашыр, доғрудур бу гәбилдә Һәләви тәк дејил, анҹаг аз сајда експертләрдән биридир. Һә, Һәләви һәм дә Мәркәзи Кәшфијјат Идарәси вә МИ6-нын експертидир.
Наһаг јерә мөтәбәр гонаг јазмырам ки. Апрелин сонунҹу декадасында Исраилин хариҹи ишләр назири Либерман Бакыја сәфәри заманы Һәләви дә ҝәлмәли иди амма ҝәлмәди. Үстүндә бир нечә һәфтә кечдикдән сонра мәлум олду ки, сән демә Һәләвинин ән чох вә сәрт тәнгид етдији сионист рәсмиләриндән бири елә Либерман өзүдүр, анҹаг бу да ола биләр ки, бурда башга мәгсәд олуб. Һәләви һәм дә Исраилдә диндар јәһудиләрә гаршы сәрт чыхышлары илә фәргләнән стратегләрдәндир.
Өтән ил Һәләви бәјан етмишди ки, Исраил үчүн јәһуди диндарлар Иран бомбасындан даһа тәһлүкәлидир. Исраилдә јәһуди ортодоксларынын мөвгејинин мөһкәмләнмәсини билдирән Һәләви, һесаб едир ки, сионист дөвләтинин дүнјәвилији үчүн нә Һәмас нә дә Һизбуллаһ диндар јәһудиләр гәдәр тәһлүкәли дејил.
Сонракы ачыгламаларында Һәләви бир гәдәр дә габаға ҝедәрәк демишди ки, Иранын бомба јаратмаг иддиасы Исраили горхудаҹаг гәдәр тәһлүкәли дејил. Бу фикри үчүн әсас кими, јары зарафат јары ҝерчәк чох мараглы бир аргумент ҝәтирмишди. Анҹаг бу барәдә бир гәдәр сонра....
Мајын 10-да, јәни Һ.Әлијевин ад ҝүнүндә вә Бакыда тәшкил олунмуш Ҝүл бајрамында Бакыја сәфәр едән Һәләви бир нечә гапалы ҝөрүш кечирмишди. Белә чыхыр ки, онун Либерманла бирликдә Азәрбајҹана сәфәр етмәмәсинин архасында нәләрсә вар, анҹаг бизә ону ҝөстәрибләр ки, бу адам Либерманын кәскин тәнгидчисидир дејә бирҝә сәфәрә чыхмајыб.
Кечирдији ҝөрүшләрдә Азәрбајҹан рәсмиләриндән даһа чох хариҹи дипломатлара јер ајыран Һәләви мәһдуд бир топланты да кечирмишди. Бу ҝөрүшдә Милли Мәҹлисин ЈАП-дан олан бир нечә депутаты - Мүбариз Гурбанлы, Әли Әһмәдов, Сијавуш Новрузов, Президент Администрасијасынын Сијаси тәһлил вә информасија тәминаты шөбәсинин мүдири Елнур Асланов, Президент јанында Стратежи Арашдырмалар Мәркәзинин әмәкдашлары Һејдәр Мирзә иштирак едибләр.
Азәрбајҹан рәсмиләри илә Һәләвинин нәдән данышдығы мәлум дејил, анҹаг хариҹи сәфирләрлә ҝөрүшләрдә үмуми проблемләрдән, јахын шәрг мөвзусундан вә Азәрбајҹанын Авропа Бирлијинә интеграсијасындан данышыб.
Индии дә ҝәләк Һәләвинин аргументинә. Алманијанын Азәрбајҹандакы сәфири Һерберт Гуелленин Һәләвијә “Сиз Азәрбајҹана бу гәдәр диггәт ајырмагла Иранла мүнасибәтләриниздә нәјә наил олаҹағыныза үмид едирсинниз вә бу Иранын сизә гаршы олан тәһдидләрини артырмазмы ?”
суалына јәһуди експертин ҹавабы мараглы олуб. О, дејиб : “Исраилин Иранла мүнасибәти јохдур принсип етибары илә проблеми дә јохдур, анҹаг тәһлүкләр вар. Иранын 1979-ҹу илдән бәри Исраили тәһдид етмәк кими бир пис вәрдиши вар, анҹаг бизим ишимиз башгаларынын вәрдишләриндән әл чәкмәјә чағырмаг дејил.
Иранын дәстәкләдији Һизбуллаһ вә Һәмас Исраилә гаршы террор планларындан әл чәкмир. Биз дә онлары ҹавабсыз гојмуруг. Анҹаг инди, Илһам Әлијевин тимсалында Исраилин өз “Нәсруллаһ”ы вар вә мәнҹә (ҝүләрәк) бизимки дүнјаја даһа ачыгдыр вә сивилдир.
Әмин ола биләрсиниз ки, Иран һеч бир заман нә Исраилә нә дә Азәрбајҹана һүҹум етмәјәҹәк.” Бу да Һәләвинин архајынлығы.
Вә бир ҝүн сонра мајын 11-дә Бакыда Иран сәфирлији гаршысында митинг кечирилир ки, бу барәдә артыг һамыныз мәлуматлысыныз (www.youtube.com/watch).
Бу аксијаны Азәрбајҹан һакимијјәтинин тәшкил етдији дәрһал билинсә дә елә сырадан бир пикет дә дејилди. Хејли сајда адамын иштирак етдији бир пикет иди. Даһа бир мараглы мәгам ондан ибарәт иди ки, һәмин пикетдә иштирак едән ҝәнҹләрин бир һиссәси Авиасија Академијасынын тәләбәләри иди.
Бу академијанын ректору Илаһм Әлијевин гајнатасы олмагла јанашы, дејиләнә ҝөрә һәм дә сејјид нәслиндәдир. Араларында тәһгирамиз ифадәләр олан шүарлар да вар иди. Ән әсасы бу пикети ҹанлы шәкилдә изләјән Һәләви ејни заманда 4-5 камера илә бу тәдбирин чәкилишини апарыб касетләри өзү илә ҝөтүрүб вәтәнинә јолланды.
Бурдан белә чыхыр ки, Бакыда Иран сәфирлијинин гаршысында кечирилән пикетдә мүәмма јохдур һәр шеј ҝөз габағындадыр. Анҹаг мәҹһул галан одур ки, әҝәр һакимијјәт бу пикети мајын 8-дә Тәбриздә Азәрбајҹан консуллуғу гаршысында кечирилән митингә ҹаваб кими тәгдим едирсә, онда белә чыхыр ки, Тәбриздә дә Һәләви үчүн ишләјән кимләрсә вар?
Јохса бунлар планлашдырылмыш дејил үст үстә дүшән тәсадүфи һадисәләрдир? Чүнки Бакыдакы пикетин кечирилмәси әввәлҹәдән планлашдырылмышды. Даһа мараглысы будур ки, Һәләви һеч дә Ирана гаршы кәскин чыхышлары илә фәргләнән сионист дејил, әксинә бәзи һалларда О, Ираны Исраил үчүн тәһлүкә һесаб етмир.
Диггәт: Хәбәрдән истифадә етдикдә мәнбәјә истинад лазымдыр
