Әһли Бејт -АБНА- хәбәр аҝентлији- Инҝилтәрәнин нүфузлу “Тһе Индепендент” гәзетиндә Азәрбајҹанла бағлы мәгалә дәрҹ едилиб. Мәгаләни охуҹуларын диггәтинә чатдырырыг:
Азәрбајҹанда охумаг, анҹаг демократија үчүн јох
Азәрбајҹанын “Еуровисион”нун тәшкилатчысы олдуғуну гејд етмәјә еһтијаҹ јохдур. Бакы аерпорту, бәзи биналарла јанашы демәк олар ки, бүтүн такси вә автобуслар јарышманын реклам символлары илә бәзәниб. Јарышма үчүн нәзәрдә тутулмуш 25000 нәфәрлик консерт залынын кечән һәфтә президенти өзү тәрәфиндән ачылышы олду. Елә ҝүн олмаз ки, ахшам телевизијаларда јарышма һаггында хәбәр ҝетмәсин.
“Еуровисион” өлкәнин идарәчиләри үчүн ҹидди мәшғулијјәт вә нефтлә зәнҝин кичик өлкәнин инкишафыны нүмајиш етдирмәк үчүн шансдыр.
“Еуровисион” бир чох инсанын һәјатыны мәһв едиб
Һүгуг мүдафиәчиләри исә дејир ки, авторитар режимин башында дајанан Илһам Әлијев јарышмадан өлкәдә баш верән һүгуг позунтуларына олан тәнгиддән јајындырмаг үчүн истифадә едир. Онлар Бакыја ҝәләҹәк иҹрачылар вә һејәтләри бу барәдә ачыг данышмаға чағырырлар.
Президент Илһам Әлијевә гаршы чыханларла нә баш вердијини Хәдиҹә Исмајылова јахшы билир. “Азадлыг” радиосунун әмәкдашы Әлијевләр аиләси илә бағлы бир нечә галмагаллы коррупсија факты ашкарлајыб. Һәмчинин бу һәфтә чап едилән арашдырма ҝөстәрир ки, “Еуровисион” аренасынын тикинтисиндә малијјә махинасијалары офшор ширкәтләрлә вә гејри-шәффаф схемлә һәјата кечирилиб. Кечән ај исә о үнванына интим ҝөрүнтүләри олан тәһдид мәктубу алмышды. Кимләрсә иҹазәсиз евинә ҝирмиш вә онун јатаг отағында ҝизли камера гурашдырмышды.
“О, мәни хәбәрдар етди ки, әҝәр мән арашдырмаларымы дајандырмасам, онлар видеону јајаҹаглар. Онлар һесабламышдылар ки, мән утанаҹам вә сусаҹам. Амма сәһв етдиләр” дејиб Хәдиҹә Исмајылова. Шантажа ҝетмәкдәнсә, о буну иҹтимаијјәтә бәјан еләди вә коррупсија арашдырмаларыны давам етдирҹәјинә сөз верди. Видео интернетдә јајылды вә Азәрбајҹан кими мүһафизәкар өлкәдә онун һагда һөкумәт гәзетләриндә “јүнҝүл әхлаглы” адам кими јаздылар.
Хәдиҹә Исмајылова “Еуровисион”дан зәрәр чәкән тәк адам дејил. “Еуровисион” “Ҹрјстал Һалл”ун јахынлығында јашајан бир чох инсанын һәјатыны мәһв едиб. Евиндән мәҹбури чыхарыланларын һесабатыны һазырлајан Зөһраб Исмајыла ҝөрә, јарышманын кечириләҹәји јери тәмзиләмәк үчүн 281 аилә евиндән говулуб. Һөкумәт онлара базар гијмәтиндән дәфәләрлә аз пул өдәјиб: “Онлар бу јарышма үчүн тикилән бинаја 700 милјон доллар сәрф едибләр. Анҹаг евләриндән чыхарылыб күчәјә атылан инсанлара лајигли компенсасијаны өдәмәк үчүн пул тапмырлар”.
“Пресс” јазылмыш, гана буланмыш јашыл ҝөдәкҹә...
Сакинләрин зорла евиндән чыхарылмасы тәкҹә “Еуровисион”ла бағлы дејил, сон 3 илдә Бакыда 4000 ев дағыдылыб. Нефтдән ҝәлән бөјүк ҝәлирләр һесабына јен тикинтиләр үчүн јерләр бошалдылыб. Мүкафат алмыш журналист Идрак Аббасов Бакы јахынлығында јерләшән Сулутәпә гәсәбәсиндәки сөкүнтүләри гејдә алмаға чалышмышды. Кечән ај о, сөкүлән евләри гејдә аларкән, нефт ширкәтинин тәһлүкәсизлик хидмәтинин әмәкдашлары тәрәфиндән вәһшиҹәсинә дөјүлмүшдү. О, инди хәстәханадан чыхыб, амма сындырылмыш габырғасындан ајдындыр ки, о раһат ҝәзә билмир, ҝүнләрини валидејнләринин евиндә диванда узанараг кечирир. Бундан башга дөјүлдүкдән сонра онун бир ҝөзү ҝөрмә габилијјәтини итириб. Стулун башына кечирилмиш, үзәриндә “Пресс” јазылмыш, гана буланмыш јашыл ҝөдәкҹә һүҹума мәруз галдығы ҝүн онун әјниндә иди: “Онлар евләрин нефт ширкәтинин әразисиндә ганунсуз тикилдијини иддиа едәрәк, инсанлара компенсасија вермәкдән имтина едирләр.
Ичиндә инсанларын олдуғу евләрә булдозерләрлә һүҹум едирдиләр. Инсанлар гышгырырдылар, мән исә буну чәкирдим" - Идрак Аббасов белә дејир. Шаһидләрин сөзүнә ҝөрә, мүһафизәчиләр она һүҹум чәкдиләр вә һафизәсини итирәнәдәк дөјдүләр: “Ајдындыр ки, онларын мәгсәди мәни өлдүрмәк иди”. Даһа әввәлләр Идрак Аббасовун атасына һүҹум чәкибләр, онун евини вә машыныны дашлајыблар, 6 јашлы оғлу намәлум шәраитдә дөјүлүб. Буҝүнәҹән һеч кәс бу һүҹумлара ҝөрә иттиһам олунмајыб.
Биринҹи “ледини”н даим телевизијада тәблиғ олунмасы ҝүлүнҹ ҝөрүнүр
Рәсул Ҹәфәров “Демократија үчүн оху” кампанијасынын тәшкилатчысыдыр. О дејир: “Һөкумәт Азәрбајҹандакы инсанларын хөшбәхт олдуғуну ҝөстәрмәк үчүн Авропада бөјүк пуллар хәрҹләјир. Јарышмаја һансы өлкәдән ҝәлмәләринә бахмајараг, һәр кәсә месажымыз ачыгдыр. Хаһиш едирик мәнфиликләрә ҝөз јуммајасыныз. Чалышын сијаси мәһбусларын аиләләри, мүхалифәт үзвләри вә евләриндән зорла чыхарылан инсанларла ҝөрүшәсиниз”.
Ҹәнаб Ҹәфәров бәзи иштиракчыларын дәстәк олмаға сөз вердикләрини билдирир. О, дүшүнүр ки, бу һакимијјәт үчүн “сәһнә сүрпризи” олаҹаг.
“Еуровисон” тәшкилатчысы исә јарышманын сијасәтлә әлагәли олдуғуну сајмыр. Сијаси фәаллар исә иддиа едир ки, һакимијјәт өзү Әлијевин ханымы Меһрибан Әлијеваны “Еуровисион”а һазырлыг комитәсинин сәдри етмәклә јарышманы сијасиләшдириб. О, һаким партијадан Милли Мәҹлисин үзвү вә өлкәнин ән гүдрәтли адамларындан биридир. “Бизи јарышманы сијасиләшдирмәкдә иттиһам едирләр, анҹаг биринҹи лединин даим телевизијада тәблиғ олунмасы ҝүлүнҹ ҝөрүнүр” - Ҹәфәров белә дејир. Һакимијјәт вә “Еуровисион”у бағлајан тәк һалга Меһрибан Әлијева дејил. Ҝәнҹ поп улдуз, президентин күрәкәни јарышманын ачылыш мәрасиминдә чыхыш едәҹәк.
Чохсајлы арашдырмалар Азәрбајҹанын јүксәк сәлаһијјәтли мәмурларыны коррупсија фактларында иттиһам едир. Онлардан бири дә Әлијевин 11 јашлы оғлуна Дубајда 30 милјон фунта алынан вилладыр. Президент Администрасијасынын мәмурлары бу иттиһамлары шәрһ етмәкдән чәкиндиләр. Бакынын идарәчи синфи үчүн евләринин дағыдылмасы илә бағлы һеч бир тәһлүкә јохдур. Идрак Аббасов дејир ки, һакимијјәтин хариҹдәки мүлкијјәтини итирмәк горхусу инсанларла нормал давранышын катализатору ола биләр: “Әҝәр Гәрб тәрәфиндән һаким клана реал тәзјигләр оларса, онлар горхарлар. Әҝәр Авропа банкларында сахладыглары милјонлара вә виллалар итирмәк тәһлүкәси оларса, онлар бир даһа дүшүнәрләр”.
“Јарышманын кечирилдији сәһнәдә чыхыш едән иштиракчыларын һәр һансы бириндән бунун садә бир конкурс дејил, Авропа үчүн дәјәрләр топлусу олдуғуну ешитмәк әла оларды” - дејә Хәдиҹә Исмајылова билдирир.
Диггәт: Хәбәрдән истифадә етдикдә мәнбәјә истинад лазымды
