Әһли Бејт -АБНА- хәбәр аҝентлији- Ҝәнҹә һадисәләри илә бағлы гәзетимизә мүсаһибәсиндә баш прокурор Ихтијар Ширинов бир сыра мараглы фактлар ачыглајыб. И.Ширинов билдириб ки, Ҝәнҹә һадисәләри Русија тәрәфиндән планлашдырылыбмыш вә Һ.Әлијев дә бундан истифадә едиб вә бу, Азәрбајҹаны фәалакәтә апарыб. И.Шириновун мүсаһибәсиндә ачыгладығы ҹидди мәгамлардан бири сабиг мүдафиә назири Рәһим Газыјевин Ҝәнҹәдәки рус дивизијасынын рәһбәри Шербакла телефон данышығына даирдир:
“Һадисәләри Русија тәшкил етмишди. Сурәт Һүсејнов Русијанын адамы иди. Ағсаггаллы исә Ҝәнҹәдәки дивизијанын рәһбәри Шербак иди. Һәтта биздә Шербакын Рәһим Газыјевлә телефон данышыглары вар иди. Шербак демишди ки, мәнә дәстәк верин, һакимијјәти девирим. Биз буну билирдик вә тәдбир ҝөрүрдүк. Лакин хәјанәт баш верди. Мүдафиә Назирлији өз ишини ҝөрмәди. Һәмчинин, јухарыда гејд етдијим кими, бәзи сијаси гүввәләр вәзијјәти драматикләшдирди”.
Мәсәлә илә бағлы Раһим Газыјевин дә мөвгејини өјрәндик. Онун Шербакла бу мәзмунлу телефон данышығынын олуб-олмадығыны сордуг. И.Шириновун иттиһамларынын әсассыз олдуғуну дејән Р.Газыјев вурғулады ки, кечмиш баш прокурор өз бурахдығы сәһвләр барәдә данышса, јахшы олар: “Ихтијар Ширинов бир шиллә вурулаҹағы тәһлүкәси олан заман јатанда јухусунда ҝөрмәдији вәзифәни она верән Әбүлфәз Елчибәј барәсиндә һәбс-гәтимкан гәрарыны имзалајыб. Бу гәрарын әсли мәндә вар. Икинҹи тәрәфдән, Ихтијар Ширинов онун шәрәф вә ләјагәтини алчалтдығым үчүн мәни мәһкәмәјә вермишди. Мәһкәмәдә онун иддиасы ләғв олунду. Һаким билдирди ки, Ихтијар Ширинов просессуал ганунлара ујғун олараг әризә јаза билмәјиб. Тәсәввүр един, әдлијјә ҝенералы шикајәт әризәсини дүзҝүн јаза билмәјиб”.
Шербакла телефон данышығы барәдә сөјләниләнләрә ҝәлинҹә, Р.Газыјев билдирди ки, 1993-ҹү ил февралын 17-дә Милли Мәҹлисдә дөвләт башчысынын иштиракы илә гапалы топланты кечирилиб. Һәмин топлантыда милли тәһлүкәсизлик назиринин мүавини Сүлһәддин Әкбәр галхараг назирликдә Р.Газыјевин руслара ишләдији вә тәхрибат һазырладығы барәдә мәлумат олдуғуну деди: “Һәмин топлантыда мән билдирдим ки, Шербакла февралын 9-да 93-ҹү илдә Ағдарәдә вәзијјәт ағырлашан заман данышмышам. Мән она зәнҝ едәрәк дедим ки, Шербак, мәнә силаһ-сурсат ҹәһәтдән көмәк елә, вәзијјәти дүзәлдәк. Шербак исә мәнә деди ки, ҹәнаб назир, сән бурда торпағын үчүн вурушурсан, амма сизинкиләр сәни мәһв еләмәк истәјир. Мән исә дедим ки, Шербак, сән вәзијјәти дүзәлтмәк үчүн көмәк елә, өзүмүзкүләрлә мән өзүм мәшғул оларам. Әҝәр бурда вәтәнә хәјанәт вә ја бу иттиһамлары сәсләндирәнләрин әлиндә башга сәнәдләр варса, үзә чыхартсынлар. Инди Ихтијар Ширинов ләјагәтдән, хәјанәтдән данышыр. Мәндән сонра бунлар бир квадратметр торпаг алајдылар, о заман мәним башымы гәссаб көтүјүнә гојуб кәсәјдиләр. Үмумијјәтлә, һәтта доғма гардашым вәтәнә хәјанәт едибсә, ону ҝизләтсәм, алчаг адамам”.
Р.Газыјев ону да билдирди ки, Шербакын хәбәрдарлығына сәрт ҹаваб вермәсинин дә сәбәби олуб. Чүнки һәмин телефон данышығындан бир ҝүн әввәл Р.Газыјев Ағдәрәдә оларкән онун отурдуғу гәрарҝаһдан 50 метр аралыда 3 мәрми дүшүб. Арашдырма заманы мәлум олуб ки, мәрминин гәлпәси 152 миллиметрлик топа мәхсус олуб. Р.Газыјевин сөзләринә ҝөрә, һәмин дөврдә ермәниләрин 152 миллиметрлик топу олмајыб. Бу суи-гәсди кимин тәшкил едә биләҹәји суалына Р.Газыјевин ҹавабы белә олду: “Бу бир суи-гәсд фактыдыр. Мәнә чохлу суи-гәсд олуб. Бүтүн бунлары 27 ијул 1993-ҹү илдә мәнә гранатамјотла атәш ачан, Шушада мәни өлдүрмәк истәјән, амма буна наил ола билмәдији һалда Рәһим Газыјевин өзүнү вурдуғуну елан едәнләр едиб. Бундан башга, Ҝәнҹәдә вертолјота минмәк истәјәндә вертолјот ҝөзләнилмәдән јериндә алышмышды. Бүтүн бу суи-гәсдләрин үстү ачылмајыб. Аллаһдан һөкм ҝәләндә өләҹәм. Һејдәр Әлијев мәнә өлүм һөкмү верәрәк өлүм корпусуна салды. Он ики иллик һәбс ҹәзасы чәкдим. Өлмәдим. Өлүм Аллаһдан ҝәләндә өләҹәм. Һәлә јашајырам вә һеч кәсдән чәкинмирәм”.
О заман милли тәһлүкәсизлик назиринин мүавини олан Сүлһәддин Әкбәрә мүраҹиәт едәрәк назирлијин әлиндән кечән телефон данышығынын мәзмунуна ајдынлыг ҝәтирмәк истәдик. Һәмин дөврлә бағлы ҹидди арашдырманын апарылмасынын тәрәфдары олан С.Әкбәр вурғулады ки, бу мәсәләләри јалныз ачыгламалара әсасән арашдырмаг олмаз. Амма бунунла белә С.Әкбәр гануна мүвафиг олараг һәмин дөврдә телефон данышыгларынын динләнилдијини тәсдигләди: “Шербакла Рәһим Газыјевин телефон данышығы олуб вә о да гејдә алыныб. Амма данышығын мәзмуну вә инҹәликләри барәдә мәлумат верә билмәрәм”.
О заман баш назир вәзифәсиндә чалышан Пәнаһ Һүсејн дә белә бир данышығын олдуғуну бизимлә сөһбәтдә етираф етсә дә тәфәррүатлара вармады: “Һәмин телефон данышыглары илә бағлы Милли Мәҹлисин гапалы топлантысы кечирилиб. Һәмин мүзакирәләр барәдә Рәһим Газыјев һәбсдән чыхандан сонра мүсаһибәләриндә данышыб. Һәмин телефон данышыгларынын мәзмуну барәдә мәлуматым олса да, бу барәдә шәрһ вермәк истәмирәм”.
Диггәт: Хәбәрдән истифадә етдикдә мәнбәјә истинад лазымдыр
