Әһли Бејт -АБНА- хәбәр аҝентлијинин вердији хәбәрә әсасән Салјан рајонунда ҝәрҝинлик артыр. Рајондакы мәнбәләрин гәзетимизә вердији мәлумата ҝөрә, иҹра башчысы Таһир Кәримовун ганунсуз әмәлләри артыг Салјан ҹамаатынын сәбр касасыны дашырмаг үзрәдир.
Мәлумата ҝөрә, Таһир Кәримлинин апардығы торпаг “ислаһатлары”, саһибкарларын фәалијјәтинә манеәләр јаратмасы, јерли кадрлары өзүнә јахын шәхсләрлә әвәзләмәси вә нәһајәт тәшкил етдији “ачыг микрофон”да “мән салјанлыларын атасыјам” фикрини сәсләндирмәси ҹамааты бәрк һиддәтләндириб. “Чох бөјүк еһтималла јахын ҝүнләрдә Салјан сакинләри аксијалара башлајаҹаг”, - дејә рајондакы мәнбәләр билдириб.
Мәлуматларда о да вурғуланыр ки, Илһам Әлијевин Салјана сәфәри дә әһали тәрәфиндән наразылыгла гаршыланыб: “Өлкә башчысы рајона демәк олар ки, ҝизли ҝәлиб ҝетди. Әһали илә ҝөрүшмәди, онларын дәрд-сәрини динләмәди, проблемләрлә марагланмады. Бу да ҹидди наразылыға сәбәб олуб”.
Билдирилир ки, Таһир Кәримовун ганунсузлуглары бәләдијјәләрин дә ҹанынын боғаза јығыб. “Иҹра башчысы бәләдијјәләри мәҹбур едир ки, ноһур балығы јетишдирәнләрдән һагг алсынлар. Һазырда ноһур балығынын јетишдирилмәси үчүн 1200 һектар әрази вар. Иҹра башчысы һәр һектар үчүн 200 манат, суварма үчүн исә 150 манат пул тәләб едир. Таһир Кәримов билдириб ки, һәр ај бу пул јығылмалыдыр. Јығылмајаҹаты тәгдирдә ноһур балығы јетишдирилән ”дамбалар" дағыдылаҹаг. Бәләдијјәләр билир ки, бу пул бүдҹәјә көчүрүлмәјәҹәк. Сабаһ һәр һансы проблем јарананда исә мәсулијјәт онларын үзәриндә галаҹаг. Она ҝөрә дә наразылыг едирләр".
Даһа бир мәлумат исә Таһир Кәримовла Салјанын әввәлки иҹра башчысы Әлиаға Һүсејнов арасындакы зиддијјәтләрин сәбәбләри илә бағлыдыр. Мәлуматлара ҝөрә, Әлиаға Һүсејнов һәлә иҹра башчысы олмамышдан әввәл гудасы Зија Мәммәдов она Дүнја Банкынын малијјә јардымы илә инша едилән Әләт-Астара јолунун хәритәсини тәгдим едиб. Назир Әлиаға Һүсејнова мәсләһәт ҝөрүб ки, лајиһәјә дүшән торпаг саһәләрини алсын. Чүнки бу милјонларла манат компенсасија демәкдир. Әлиаға Һүсејнов да гудасынын мәсләһәтинә гулаг асараг һәмин әразиләри уҹуз гијмәт сакинләрдән алыб. Артыг лајиһәнин иҹрасына башланылыб.
Јени иҹра башчысы Таһир Кәримов мүшаһидә апарараг ҝөрүб ки, лајиһәјә дүшән торпаг саһәләринин әһәмијјәтли һиссәси Әлиаға Һүсејнов вә онун јахын адамларына мәхсусдур. Вә мәсәләнин нә јердә олдуғуну дәрһал анлајыб. Бундан сонра Әлиаға Һүсејновла конфликтләр башлајыб. Таһир Кәримов һесаб едир ки, Әлиаға Һүсејновун “компенсасија әмәлијјатындан” она да пај дүшмәлидир.
Диггәт: Хәбәрдән истифадә етдикдә мәнбәјә истинад лазымдыр
