Әһли Бејт -АБНА- хәбәр аҝентлијинин вердији хәбәрә әсасән губалылар кечмиш иҹра башчысы Рауф Һәбибовун Гәләдуздакы вилласынын һасары сөкмәк үчүн дахили гошунлара саат 11-ә гәдәр вахт вермишдиләр. Һасар сөкүлмәсә, вилланы јандыраҹаглары илә һәдәләмишдиләр.
2 март ҝүнү саат 10:30-да һәмин јерә ҝәлдик. Әразидә полис машыны дајаныб вә ҝәлән һәр машыны сахлајыр. Бизи ҝәтирән такси сүрүҹүсү хәбәр верир ки, ҝеҹә саатларында да полисләр иш башында олублар. О, евинә ҝетмәк үчүн сәнәдләрини ҝөстәрмәли олуб. Полис биз ҝәлдијимиз машыны да сахладыб, һара ҝетдијимизи сорушур. Сүрүҹү јахынлыгдакы кәндләрдән биринин адыны чәкир, полис иҹазә верир. Кечмиш иҹра башчысы Рауф Һәбибовун дүнәнә гәдәр јашадығы виллаја јахынлашырыг. Вилланын шүшәләри сындырылыб, һасарлары исә јаваш-јаваш сөкүлүр. Вилланы чәкдијимизи ҝөрән полис бизә јахынлашараг чәкилишә иҹазә верилмәдијини дејир. Онун дедијинә ҝөрә бу әразидә чәкилиш апармамағы милләт вәкили Ваһид Әһмәдов тапшырыб.
Иҹра башчысысын вилласыны тикән уста нәләр деди?
Гәләдуз кәндинин сакинләри илә сөһбәтләширик. Кечмиш Иҹра башчысы әһалинин мал-гарасыны сувармаг үчүн апардығы јеҝанә јолу бағлајыб. “Өрүш саһәсинин јолуну кәсиб. Сују да онун кими... Ики-үч километрлик јола су ҝедиб чыхмыр. Бирҹә ишыгдан проблемимиз јохдур. Иҹра башчысы Гудјалчајын ичиндә ајагјолу тикиб. Һансы отағына ҝирисән һамамы, туалети вар. О нијә чајын үстүндә туалет дүзәлдир? Онун евиндә мән ишләмишәм, билирәм”.
Иҹра башчысынын вилласында фәһлә ишләјән сакин дејир ки, Рауф Һәбибов онларын мәваҹибләрин 3 ајдан бир вериб. “Өзү дә үч ајдан сонра бир ајын пулун верирди. Галан ајларын пулун јенә дә сахлајырды. Һарада пуллу ишләр вар иди, талышлара өтүрүрдү”.
Сакин дағын әтәјиндә ҝедән тикинти ишләрини ҝөстәриб, Губаја су хәтти чәкдикләрини чатдырыр. Бу иш дә түркләрә тапшырылыб.
Полис иҹра башчысынын вилласыны јандыраны ахтарыр
Губанын мәркәзиндә һәбсләрин башланылдығы хәбәрини алырыг. Полис идарәсинин гаршысына ҝәләндә бурада шикајәтчи илә полисин мүбаһисәсинә шаһидлик едирик. Вәтәндаш оғлунун полис идарәсиндә олдуғуну, полис исә онлара сәһв мәлумат верилдијини тәкид едир. Валидејн шикајәтини бизә данышыр. “Заһидов Интигам әмим нәвәсидир. Дүнән тутмушдулар, һәлә дә азад етмәјибләр. (гардашы сөһбәтә гошулур) Дүнән ҝүнорта икидә гардашымы ҝөрдүм, ондан сонра она зәнҝ чатмады. Дүнән ушаг бура ҝәтирилиб, ондан сонра мәлумат јохдур. Дүнән ахшамдан бурадајыг, бизә бир кәлмә демирләр. Депутат Ваһид Әһмәдов дејир, ушаг бурададыр, полисләр дејир, јохдур. Инди бизим депутатымыз јалан дејир? Зија мүәллимлә (Нәглијјат назири Зија Мәммәдов) ҝөрүшмүшүк. Дејиб, “полисә ҝедин, әризә јазын. Оғлан Губа рајонунун дахили ишләр шөбәсиндәдир. Мүәјјән ишләр арашдырылыб, бурахылаҹаг”. Биз дә ушағын итмәси һаггында әризә ҝәтирмишик. Полисләр дејир, бурада јохдур, гәбул еләмирләр”. Бир мүддәт сонра полисләр гәбул едирләр ки, Интигам Заһидов идарәдәдир, амма тезликлә бурахылаҹаг.
Полис идарәсиндән Азәр адлы шәхс чыхыр. О да митингдә иштиракына ҝөрә сахланылыб. Бизә јахынлашараг мәлумат верир ки, сәһәр 10-дан идарәјә чағырылыб. Үч саат сорғу-суал едилиб. Ичәридә ондан кечмиш иҹра башчысынын евини јандырыб, јандырмадығы вә митингин тәшкилатчылары һаггында нә билдији сорушулуб. “Суал вердиләр ки, еви сән јандырмысан? Дедим, јох. Тәшкилатчыларын ким олдуғуну билирсән? Дедим, јох. Үч саат бу суаллары тәкрар-тәкрар вердиләр”. О, полис идарәсиндә башга митингчиләрә раст ҝәлмәдијини дејир.
Митингә ҝәлмәјә јол пулу тапа билмәјәнләр…
Полис идарәсинин әтрафында ишдән чыхарылан хадимә дә дајанмышды. Сима Ҹәфәрова бу идарәдә 10 ил ишләјиб. Әсассыз јерә ишдән чыхарылдығыны вә ону полис идарәсиндә һеч кимин гәбул етмәдијини дејир. “Отагда зибил галыб, гапы бағлы олуб дејә ача билмәмишәм. Она ҝөрә ишдән чыхарыблар. Президент Апаратына шикајәт етмишәм. Бу идарәдә дә мәни ешидән јохдур. Нечә саатдыр бура ҝөзләјирәм, һеч ким гәбул еләмир. 120 манат мааш алырдым, инди долана билмирәм”.
Чај евиндә вә күчәдә сакинләр арасында һәр кәс тутуланларын сајын фәргли рәгәмләрлә дејир. Бу мәлуматларын доғру вә ја јанлыш олдуғу һагда һеч бир рәсми гурум ачыглама вермир. Губанын Мәдәнијјәт Евинин гаршысында ҝөдәкҹәләриндә Баш Шәһәр Баш Прокурорлуғу јазылмыш ишчиләрә јахынлашырыг. Онлар әразини камераларла чәкирләр. Машынларын дөвләт нөмрә нишанларыны вә әһалини камералара гејд едирләр. Онлара јахынлашыб, ҝәлиш сәбәбләрини сорушуруг. Губаја митинг мәсәләсинә ҝөрә ҝәлмәдикләрини иддиа едирләр. “Башга ишә ҝөрә бурадајыг. Хаһиш едирик мане олмајын”.
Губанын мәркәзиндә вә кәндләриндә оларкән әһалинин чох касыб јашадығынын шаһиди олуруг. 1 март митингиндә иштирак етмәјә јол пулу тапмајанлар, елә митингдә иштиракына ҝөрә күчәдә ҝеҹәләјән ҝәнҹләр дә олуб. Амма 2 март ҝүнү рајонун күчәләриндә ҝәнҹләри ҝөрмәдик. Онлар евләринә чәкилиб, һәр ан полис мәнтәгәсинә чағырылаҹагларыны ҝөзләјирләр.
Севинҹ ВАГИФГЫЗЫ
Диггәт: Хәбәрдән истифадә етдикдә мәнбәјә истинад лазымдыр
