Әһли Бејт -АБНА- хәбәр аҝентлијинин вердији хәбәрә әсасән Нју-Јоркда исламчы екстремистләрин тәгиби уҹбатындан садә мүсәлманлар әзијјәт чәкмәкдәдир. Шәһәр мери Мајкл Блумберг һәлә дә мүсәлман иҹмаларынын мәхфи шәкилдә изләнилмәси сијасәтини дәстәкләјир. Белә ки, радиоја вердији һәфтәлик мүсаһибәдә Блумберг потенсиал тәһлүкәнин мүәјјәнләшмәси мәгсәдилә полисин ҝизли мониторингләри давам етдирәҹәјини вурғулајыб.
“Нју-Јорк полисинин һәјата кечирдикләри ганунидир, мәгсәдәујғундур вә конститусијаја да зидд дејил. Онлара Нју-Јорк һүдудларындан кәнарда белә истинтаг ишләри апармаг сәлаһијјәти верилиб. Онлар һәр һансы бир ганунсуз фәалијјәти вә белә фәалијјәтләрә истәнилән зәмини ашкар етмәк үчүн интернети сәһифәләјә вә телевизијаја баха биләр. Биз ајры-ајры фәрдләри дини бахыш вә ирги мәнсубијјәтләринә ҝөрә һәдәфә алмырыг”, дејә Мајкл Блумберг билдириб.
Бунунла белә, һүгугшүнаслар вә мүсәлман иҹмалары арасында сон һәфтә әрзиндә бу кими әмәлијјатларын гануни олуб-олмамасы әтрафында гызғын мүбаһисәләр башлајыб.
“Бу, конститусијаја зиддир, бу, Америка әнәнәләринә зиддир. Әҝәр буна зәмин олса, һеч шүбһәсиз арашдырманын апарылмасынын тәрәфдарыјам. Өлкәнин тәһлүкәсизлији биринҹи ҝәлир. Анҹаг бунун үчүн вәтәндаш азадлыгларыны тәһлүкәјә атмаг дүзҝүн дејил”, дејә Ислам Мәркәзиндән Мәһәммәд Әл Филали билдириб.
Бир чохлары мәхфи мүшаһидәләрин вә тәгибләрин систематик олдуғундан вә мүсәлманлара мәхсус бизнесләрин, мәсҹидләрин вә онларда топланан инсанлар һаггында мүвафиг гејдләрин апарылдығындан ҝилејлидир.
“Өзүмү неҹә һисс едирәм? Әлбәттә ки, һүгуглары позулмуш бири кими. Мәним шәхси һәјатыма мүдахилә етмәјә кеч кимин ихтијары јохдур. Һалбуки онлар белә дә едирләр. Мән белә һаллара сон гојмаг истәјирәм, бу кими әмәлләрдә әли оланлары тапараг, мәсулијјәтә ҹәлб етмәк истәјирәм", дејә мүсәлман вәтәндаш билдириб.
Диггәт: Хәбәрдән истифадә етдикдә мәнбәјә истинад лазымдыр
