Өлмәдик, абсурдун бу гәдәрини дә ешитдик. Стажлы һүгуг мүдафиәчиси Новелла Ҹәфәроғлунун дүнәнки “Бизим јол”а мүсаһибәсиндә дедикләрини нәзәрдә тутурам. Ситат: “Һакимијјәти Азәрбајҹанын ичиндә тәнгид еләмәк лазымдыр, бејнәлхалг тәшкилатларда јох”.
Мән әминәм ки, бу мәнтигин, даһа доғрусу, мәнтигсизлијин дүнјада аналогу јохдур. Белә ҝөрүнүр ки, һакимијјәтин “аналогсузлуг сијасәти” артыг стажлы һүгуг мүдафиәчисини дә ҹәзб етмәјә башлајыб. Хејирли-уғурлу олсун, нә дејирик.
Амма һәр һалда Новелла Ҹәфәроғлу ајдынлашдырмалыдыр ҝөрәк, о бу ачыгламасы илә нә демәк истәјир? Үмумијјәтлә, “Һакимијјәти Азәрбајҹанын ичиндә тәнгид еләмәк лазымдыр, бејнәлхалг тәшкилатларда јох” нә демәкдир? Бәс бејнәлхалг тәшкилатларда нә етмәк лазымдыр? Һакимијјәти тәрифләмәкми? Режимин әл-үзүнү јумагмы? Үмумијјәтлә, бир инсан нә гәдәр онурсуз вә онурғасыз олмалыдыр ки, өлкәнин ичиндә һакимијјәти тәнгид еләсин, амма мәсәлән, Авропа Шурасына ҝедәндә 180 дәрәҹә дөнсүн, тәнгиддән ваз кечсин?
Биз “Президент јахшыдыр, әтрафы пис” нағылыны чохдан ешитмишдик, ҝөрүнүр, бу да тәзә нағылдыр: 2Һакимијјәт Азәрбајҹанда писдир, амма бејнәлхалг тәшкилатларда јахшы".
Әслиндә мән баша дүшүрәм, стажлы һүгуг мүдафиәчисинин бу мәнтигсизлијинин архасында нә јатыр. Бу, Азәрбајҹансајағы урпатриотизмин јени нөвүдүр. Вә јалныз Новелла ханымын тимсалында тәҹәлла етмир, бир хејли бу ҹүр дүшүнән һүгуг мүдафиәчиси, зијалы-мијалы вар. Ҝуја биз өлкәнин проблемләрини елә өлкәнин ичиндә мүзакирә етмәлијик, амма өлкәдән кәнара чыхан кими “Азәрбајҹанын үмуммилли мараглары наминә” игтидар-мүхалифәт сөһбәтини бир кәнара гојмалыјыг, мәмләкәтин ејибләрини өрт-басдыр етмәлијик.
Мән инди бурадан белә вәтәншүвәнлик һаггында беш-үч бабат ҹүмлә јазардым, амма гәзетин азјашлыларын да әлинә дүшә биләҹәји еһтималыны нәзәрә алырам.
Демәли, бу урпатриотларын мәнтигинә ҝөрә, өлкәдәки бу нәһәнҝ коррупсија пирамидасы, һүгугсузлуг, әдаләтсизлик далғасы Азәрбајҹаны дүнјада биабыр еләмир, амма буну тәнгид етмәк антиАзәрбајҹан фәалијјәтидир. Сечкиләри сахталашдырмаг, сифаришли мәһкәмә һөкмләри чыхармаг, тәнгидчи сәсләри сусдурмаг, Республикачылығы дәфн етмәјә, јериндә монархија гурмаға чалышмаг бизи дүнјаја ҝүлдүрмүр, амма бунлары дилә ҝәтирмәк Азәрбајҹана гаршы олмагдыр. Мәнтигинизи севсинләр сизин, нә дејим башга.
Она галса, Ылһам Әлијев дә хариҹи сәфәрләрә ҝетмәсин, чүнки һәрдән орада да она көнтөј суаллар верирләр, биабыр олуруг. Бәлкә Авропа Мәһкәмәсинә дә шикајәт јеринә “Јаша, президентим, јаша” жанрында мәдһијјәләр јазыб ҝөндәрәк? Бәлкә Азәрбајҹанын сәрһәдләрини јерли-дибли дүнјаја бағлајаг, өлкәдән гыраға шикајәт нәдир, һеч гуш да учмасын, беләҹә, бу бир овуҹ адам бизи раһатҹа миниб-чапсын, милләтин сәрвәтләрини дәдә малы кими јағмаласын, дүнјада да һеч кимин бундан хәбәри олмасын, беләҹә, дост-дүшмән јанында биабыр олмајаг. Буну истәјирсинизсә, ачыг-ачыг дејин, ҹамаат да ишини билсин.
Бәлкә үмумијјәтлә, Азәрбајҹаны һамыдан ҝизләдәк? Өлкәнин үстүнә чадыр чәкәк, ону гар-гамышла, кол-косла өртәк, һеч ким һеч нә ҝөрмәсин. Һеч ким һеч нә билмәсин. Һә, нә дејирсиниз?
Мәнә ән тәәҹҹүблү ҝәлән бир дә одур ки, Новелла Ҹәфәроғлу башда олмагла, өзүнү һүгугун мүдафиәчиләри сајан бир чохлары нијә бејнәлхалг тәшкилатларда һакимијјәтин тәнгидини Азәрбајҹанын тәнгиди кими гаврајырлар. Бу һакимијјәтин Азәрбајҹанла, Азәрбајҹанын дәрдләри, гајғылары, проблемләри илә нә әлагәси вар? Үмумијјәтлә, антиАзәрбајҹан руһлу бир һакимијјәтлә Азәрбајҹаны ејниләшдирмәкдә сизләрин мәгсәди, марағы нәдир, һөрмәтли Новелла ханым? Онда белә чыхмырмы ки, мән һансыса бејнәлхалг тәшкилатда Азәрбајҹаны севдијими демәмәлијәм, дилә ҝәтирмәмәлијәм, чүнки сизин мәнтиглә бу, мәним бу һакимијјәти дә севмәјим анламына ҝәлир.
Ајыбдыр, ајыб! Киминсә артыг һәјатда башга тәмәнналары, башга умаҹаглары варса, буну вәтәнпәрвәрлијин-задын архасында ҝизләтмәсин. Дүрүст олсун, дилинин алтындакы пахлаваны чыхарсын. Өзләри дә раһатласын, биз дә.
Онсуз да бу өлкәнин јахын тарихи нечәләринин вәтәни севә-севә ахырда ҝедиб сахта депутат мандатыны, “Шөһрәт” орденини севмәси илә долудур. Мәсәлән, Чинҝиз Гәнизадә. Амма артыг көһнәлиб о.
Адам һәрдән тәзәләри үчүн дарыхмаға башлајыр.
Елнур Астанбәјли
Диггәт: Хәбәрдән истифадә етдикдә мәнбәјә истинад лазымдыр
