Десәм ки, јаман тәрсә дүшүб өлкәмиз, бунун өзү дә тәрсинә баша дүшүләҹәк. Нијә ки? Ондан өтрү ки, биздә һәр шеј, һәр зад тәрсинә ҹәрәјан едир. Мејарларымыз да тәрсинә, баш-ајаг өлчүлүр. Нә киши билинир, нә дә арвад. Арвад кими ҝејинән әҝәр ҹәмијјәтимиздә киши кими јашајандан даһа һөрмәтлидирсә, даһа нә ҝөзләмәк олар бу сәлтәнәтдән. Оғурлуг, рүшвәтхорлуг һаггы дивара сыхыб. Виҹданла јашамаг истәјән инсанлар әфәл, мағмын һесаб едилир. Һансы ушаг десә ки, “мән бөјүјәндә мүәллим олаҹағам” она ҝеригалмыш, дүнјаҝөрүшү олмајан ушаг кими бахаҹаглар. Вә дүшәҹәкләр атасынын үстүнә ки, “өзүн бир ҝүн ҝөрмәдин, һеч олмаса гој балан адам кими јашасын.” Һеч ҹамааты да гынамаг олмур. Мүәллим кими әлә бахмагданса, мүғәнни кими һөрмәтли олмаг даһа мәгсәдә ујғундур. Әҝәр мүәллим олмаг үчүн илләрлә баш долдурмаг лазымдырса, һеч мүғәнни олмаг үчүн илләр лазым дејил. Ән асан јолдур. Сәс дә лазым дејил. Сојун, ол мүғәнни. Хариҹдә мүғәннилик сәслә өлчүлүрсә, биздә ҝөрүнмәјән јерләрин нүмајиши илә бу транплини ашырсан. Јетәр ки, сојунуб ҝөрүнмәјән јерләрини реклам едәсән.
Бу тәрс дөвранымыз бәзи дырнагарасы кишиләримиздән дә јан кечмәјиб. Онлар да пәпәш јери тапдылар. Арвад палтары ҝејиниб “киши” кими өјүнәнләр бу ҝүн даһа чох тәблиғ олунур. Бу ҝүн киши кими сөз демиш Мүбариз Ибраһимовдан чох арвад палтарында шоу ҝөстәрән киши артистләримиз мәктәб шаҝирдләринә даһа чох сырыныр. Чүнки ән ҝүҹлү тәблиғат васитәси сајылан телеефир демәк олар ки, бундан башга һеч нә ҝөстәрмир. Дүздүр, киши палтарында о гәдәр киши олмајанлар вар ки. Амма ән азындан онлар да киши кими јашамағын һәсрәтиндәдирләр. Бәс бу арвад палтарына мејл едән “кишиләрә” нә ҝәлиб ки? Доғруданмы артыг өлкәмиздә КИШИ адында гәлибин өлчүләри итиб?!
Ән аҹынаҹаглысы исә будур ки, киши кими јашајанларын да бир чоху бу ҝүн бу һадисәләрә сојугганлы јанашыр. Санки бу өлкәдә јашамырлар. Бу ҝүн әрә ҝедән “кишиләр” шәриәтлә ики гадын алан кишиләрдән даһа һүгуглу сајылыр. Әрә ҝедән кишиләри һүгуг мүдафиәчиләри даһа чох мүдафиә едирләр. Амма киши кими ики аилә сахлајан кишиләр санки ҹинајәт төрәтмиш ән гаты ҹинајәткарлар кими ҝизли һәјат сүрүрләр. Чүнки ики арвадлылыға мүгәддәс Гуран иҹазә верир, “кишиләрин” әрә ҝетмәсинә исә Авропа. Авропа да ки, нәји бәјәнирсә, “зијалыларымыз” ону бәјәнмәлидирләр. Фәрги јохдур, истәр пејғәмбәри тәһгир ет (нәузу биллаһ), истәр милли адәт-әнәнәләрини. Тәки јени бир шеј де. Бу ҝүн Азәрбајҹанымда дини, пејғәмбәри классик шаирләримизи гәһрәманларымызы тәһгир ет (нәузу биллаһ), олаҹагсан “улдуз”. Һәлә үздәнираг бәзи зијалыларымыз да сәнә ад гојаҹаглар – ФӘРГЛИ ДҮШҮНҸӘ САҺИБИ.
Бәли, дәјәрләримиз дәјишиб, мејарларымыз итиб, гијмәтверәнләримизлә гијмәтсиз “гијмәтверәнләрин”
јери сәһв дүшүб. Бәли, чох гәрибә бир дөврә тәсадүф етди өмрүмүз. Аллаһ өлкәмизин кишиләрини накишиләрин кишиләнмәсиндән горусун. Амин!
Вүсал Һәтәмов
Диггәт: Хәбәрдән истифадә етдикдә мәнбәјә истинад лазымдыр
