Әһли Бејт -АБНА- хәбәр аҝентлијинин вердији хәбәрә әсасән Иран Ислам Республикасы космоса «Навид» («Хош хәбәр») пејкини бурахыб.
Иранын дөвләт каналы пејкин бурахылышынын өлкә президенти Маһмуд Әһмәдинежадын фәрманы илә һәјата кечирилдијини билдириб.
Ракет–дашыјыҹынын типи һаггында мәлумат верилмәјиб.
Орбитдә 250 илә 370 км арасында јерләшәҹәк апарат мүхтәлиф амаллар, о ҹүмләдән елми мәгсәдләр – һава һаггында мәлуматлар, тәбии фәлакәтләрдән хәбәрдарлыг, Јерин үст тәбәгәсинин фотоҝөрүнтүләрини чәкмәк, һәмчинин пејк әлагәләри үчүн истифадә едиләҹәк.
Теһран Техноложи Университетинин мүтәхәссисләри пејкин 50 кг олдуғуну билдириб.
Иран Космик Аҝентлијинин рәһбәри Һәмид Фазели учушун проблемсиз һәјата кечдијини дејиб.
Хатырладаг ки, өтән илин ијун ајында Ислам Республикасы космоса «Рассад-1» («Мүшаһидә») пејкини орбитә бурахылышы барәдә елан етмишди.
Үмумијјәтлә, Иранын космик програмы 2008-ҹи илин февралындан башлајыб. О заман «Кавошҝар-1» ракетинин сынаг учушу һәјата кечирилмишди. Ракет-дашыјыҹынын вәзифәси Иранын биринҹи мили сүни пејки «Омид»ин (Үмид) орбитә чыхарылмасы вә елми тәдгигатларын топланылмасы иди.
Һәмин илин нојабр ајында Теһран, елми апаратлы блоку олан икинҹи ракети - «Кавошҝар-2»ни (Тәһгигатчы-2) орбитә бурахды.
Бурахылышдан 40 дәгигә сонра аваданлыг уғурла Јерә гајыдыр. КИВ-дә јајылан мәлумата ҝөрә, онун васитәсилә атмосфер тәзјигини вә мүхтәлиф һүндүрлүкдә күләјин сүрәтини өлчмәк мүмкүн олмушду.
2009-ҹу илин февралында икипилләли «Сафир-2» (Сәфир-2) ракет-дашыјыҹысы Иранын биринҹи мили пејки олан «Омид»и 250 км һүндүрлүкдә Јерәтрафы орбитә бурахыр.
2010-ҹу илин февралында Теһран өз истеһсалы олан «Кавошҝар-3» ракет-дашыјыҹысыны ичәрисиндә ҹанлы организмләр олан капсула илә космоса ҝөндәрир. Капсулда олан сичан, тысбаға вә сохулҹанларын елми тәдгигатлар үчүн истиафадә олунаҹағы билдирилмишди.
Бурахылыш тәдбириндә Иранын президенти вә өлкәнин һәрби рәһбәрлији иштирак етмишди. Теһран бу лјаиһә үзәриндә 2 илдән чох иди ки, ишләјирди.
Әли Һүсејнли
Диггәт: Хәбәрдән истифадә етдикдә мәнбәјә истинад лазымдыр
