Әһли Бејт -АБНА- хәбәр аҝентлијинин вердији хәбәрә әсасән “Human Rights Watch” бејнәлхалг тәшкилаты дүнјада инсан һагларынын вәзијјәти илә бағлы һесабат јајыб. Һесабатда дејилир ки, 2011-ҹи илдә Азәрбајҹанда инсан һагларынын вәзијјәти писләшиб, һакимијјәт бүтүн сәрбәст топлашмаг азадлығыны кобуд шәкилдә позуб.
Бакыда мүхалифәтин митинг кечирмәсинә иҹазә верилмир, һакимијјәти тәнгид едәнләрә гаршы сијаси мотивли иттиһамлар ирәли сүрүлүр.
Һесабатда Евләрдән Мәҹбури Көчүрүлмә вә Ганунсуз Сөкүнтүләр һаггында дејилир ки, 2009-ҹу илдән Бакынын «ҝөзәлләшдирилмәси» ады алтында јүзләрлә сакин евиндән мәҹбури чыхарылыб. Онлара гаршы бәзән физики ҝүҹдән дә истифадә олунуб.
Мәҹбури көчүрүлмәјә һүгуг мүдафиәчиси Лејла Јунус да мәруз галыб.
Һесабатын Дин Азадлығы бөлмәсиндә билдирилир ки, 2010-ҹу илин ијунунда ганунвериҹилијә дәјишиклик едилиб. Бу дәјишикликләрә ҝөрә, иҹазәсиз дини фәалијјәтин гаршысыны алмаг үчүн ҹәримәләр галдырылыб. Дини груплардан топланты кечирмәк үчүн һөкумәтдән иҹазә алмаг тәләб олунур.
2010-ҹу илин декабр ајындан орта вә али мәктәбләрә һиҹабла ҝетмәк гадаған олунуб. Һиҹаб гадағасына етираз едәнләрдән 5 нәфәри полисә мүгавимәт ҝөстәрмәкдә иттиһам олунараг 2 ил јарым азадлыгдан мәһрум едилиб.
2011-ҹи илин јанварында гејдә алынмамыш Ислам Партијасынын сәдри Мөвсүм Сәмәдов һәбс олунуб. О, президент Илһам Әлијеви тәнгид едәндән сонра һәбс едилиб. 12 ил азадлыгдан мәһрум едилиб.
Һесабатын Һүгуг Мүдафиәчиләри бөлмәсиндә дејилир ки, јерли һүгуг мүдафиә тәшкилатынын рәһбәри Видади Исҝәндәров һәбс олунуб. О, парламент сечкиләринә мүдахиләдә иттиһам олунараг 3 ил азадлыгдан мәһрум едилиб. Видади Исҝәндәров апрелдә иҹазәсиз аксијада иштирак етдији үчүн ики дәфә гыса мүддәтли һәбс олунуб. Вәкил Халид Бағыров Вәкиллиләр Коллеҝијасынын үзвлүјүндән чыхарылыб. Вәкил Елчин Намазов исә һәм вәкилликдән чыхарылыб, һәм дә онун һаггында ҹинајәт иши ачылыб.
Март Азәрбајҹан Инсан Һүгуглары Евинин фәалијјәти дајандырылыб. Һәмин ај Әдлијјә Назирлији Милли Демократија Институнун фәалијјәтини дајандырыб.
Һесабатда о да билдирилир ки, Авропа Бирлији, АТӘТ вә АБШ-ын Бакыдакы сәфирлији ҝәнҹ фәалларын һәбси, мүлки һүгугларын позулмасы илә бағлы нараһатлыгларыны билдирибләр. Авропа Шурасынын инсан һаглары үзрә комиссары Тһомас Һаммарберҝ ифадә, бирләшмә вә сәрбәст топлашма азадлыгларыны тәмин етмәдији үчүн Азәрбајҹан һөкумәтини тәнгид едиб.
Диггәт: Хәбәрдән истифадә етдикдә мәнбәјә истинад лазымдыр
