Ҹәнаб Президент! Мән 1970-ҹи илдә Бакыда доғулмушам. Инди бәзиләри дејир ки, тәмизлик дә, диндарлыг да совет дөврү илә ҝетди. Бу адамлары баша дүшмәк олар. Әсил һәгигәтдә исә һәмин дөврдә дини гадағаларын архасында идеолоҝија, ганун дајанырды. Коммунист Партијасынын танынмыш адамлары ҝизлиндә ибадәт едир, еһсан пајлајыр, мүгәддәс јерләрин фотоларындан албом дүзәлдирдиләр. Чүнки дин фитри истәкдир, ону боғмаг олмаз. Тәәҹҹүблүдүр ки, буҝүнкү назирләрин, мәмурларын фитрәти неҹә дәјишиб?
Совет режими деврилиб, ҝуја мүстәгил олмушуг. Совет вахты ганунлар гадаға гојурду, мәмурлар ҝизли хејир-дуа верирди, ини исә ганунлар иҹазә верир, мәмурлар ҝизли гадаға гојур.
Мәним ики гызым – бири 9-ҹу, о бири 10-ҹу синифдә охумалыдыр. Она ҝөрә охумалыдыр дејирәм ки, һиҹаб гадағасына ҝөрә мәктәбә бурахылмырлар. Она ҝөрә һәмин мәктәбин адыны чәкмирәм ки, өзүм һәмин мәктәбдә мүәллимәјәм вә директорун сон хәбәрдарлығы бу олуб ки, бир дә һиҹаб ады тутсан әризәни јаз. Гырх јаш камиллик јашыдыр дејирләр. Ачығы мәним өзүмү гызларым һиҹаба һәвәсләндириб. Инди чантамда һәбс олуб јајлыг. Мәктәбә дахил олмамыш ачыб гојурам чантама. Гызларым исә тәслим олмур. Сән мәҹбурсан дејирләр, бизсә мәҹбур дејилик. Иман тәһсилдән габағадыр, нә тәһсил верирләр ки, ондан өтрү Аллаһын әмрини јеринә јетирмәјәк – дејирләр.
Ҹәнаб Президент! Әждәрбәј мәсҹидиндә чыхышыныз мәни һејрәтә ҝәтирди. Сиз дејирсиниз: “Бәзи һалларда Ислам дининә гаршы әдаләтсиз һүҹумлар, исламофобија мејилләри баш верир, бәзи күтләви информасија васитәләриндә Ислам дининә гаршы бөһтан кампанијалары апарылыр. “Әлбәттә, биз бүтүн бу хошаҝәлмәз һаллара дәрһал реаксија вермәлијик вә веририк, сүбут едирик ки, Ислам дини сүлһ динидир, гардашлыг динидир, хејирхаһлыг динидир, мәрһәмәт динидир. Бизим дини бајрамларымыз мәрһәмәт идејаларыны тәҹәссүм етдирир. Бизим дини әнәнәләримиз ондан ибарәтдир ки, касыблара әл узадылмалыдыр, көмәк ҝөстәрилмәлидир. Бу, үмумбәшәри дәјәрләрдир. Бу үмумбәшәри дәјәрләрин һамысы Ислам дининдә тәмсил едилир”. Доғруданмы, бу сөзләри 22 диндарын һиҹабдан долајы шәрләнәрәк һәбсә алынмасына хејир-дуа верән шәхс дејир? Русијанын “Россија” телеканалынын “Вести в субботу” програмында һиҹаб гадағасыны инкар едирсиниз: “Биз һеч бир јердә гадаға тәтбиг етмирик. Биздә гадаға јохдур. Һәр кәс истәдији кими инкишаф етмәк һүгугуна маликдир. Вә бу истәнилән адамын һүгугудур”.
Мәни Сизә “ҹәнаб президент” дејә мүраҹиәтимә ҝөрә гынасалар һаглары вар. Аллаһ-таала бујурур:
-Онларын үрәјиндә мәрәз (нифаг вә һәсәд мәрәзи) вар. Аллаһ онларын (шәкк, кин вә нифаг) мәрәзини даһа да артырар. Јалан дедикләри үчүн онлар шиддәтли бир әзаба дүчар олаҹаглар!
-(Исанын Аллаһын гулу вә пејғәмбәри олмасы барәдә) сәнә ҝөндәрилән елмдән (мәлуматдан) сонра буна (Исанын әһвалатына) даир сәнинлә мүбаһисә едәнләрә де: “Ҝәлин биз дә оғланларымызы, сиз дә оғланларынызы; биз дә гадынларымызы, сиз дә гадынларынызы; биз дә өзүмүзү, сиз дә өзүнүзү (бура) чағыраг! Сонра (Аллаһа) дуа едиб јаланчылара Аллаһын ләнәт етмәсини диләјәк!
-Бундан сонра Аллаһа гаршы јалан ујдуран шәхсләр (јалныз өзләринә) зүлм едәнләрдир!..
Сиз неҹә јалан данышырсыныз? Сиз 22 ҝүнаһсыз диндары һәбсә атыб “гадаға тәтбиг етмирик” дејирсинизсә Сизин назирләр, иҹра башчылары, башга вәзифәлиләриниз нә етмәлидир?
Мән бу ҝүн Кәрбәла һавасында јашајырам. Мән бу ҝүн јајлығымы чантамда ҝәздирирәм. Дејирләр ки, Језидин әмри илә Имам Һүсејн вә јахынлары гәтлә јетирилдикдән сонра онларын аиләләри әсир ҝөтүрүлдү. Әсир гадынларын, о ҹүмләдән ханым Зејнәбин (с.ә) һиҹабы, либаслары параланмышды. Әһли-бејтдән оланлара сәдәгә алмаг һарамдыр. Пејғәмбәр өвлады сәдәгә гәбул етмәз. Амма ханым Зејнәб вә онунла олан гадынлар Шам әһлинин вердији һиҹабы сәдәгә олса белә алырдылар ки, Аллаһын әмрини јеринә јетирсинләр.
Һиҹаб мәһбусу Һаҹы Талеһ һаглы олараг дејир ки, диндарлар һөкумәтдән јох, һөкумәт диндарлардан әфв, үзр истәмәлидир. Амма ханым Зејнәби јада салыб Сизә мүраҹиәт едирәм: Гајтарын бу халгын һиҹабыны!
Сәфурә ханым (ад шәртидир)
Диггәт: Хәбәрдән истифадә етдикдә мәнбәјә истинад лазымдыр
