Әһли Бејт -АБНА- хәбәр аҝентлијинин вердији хәбәрә әсасән: Саркози, Франса парламентиндә гәбул едилән ермәнипәрәст ганунун гәбул едилмәсинә реаксија вермәјән Азәрбајҹан президентинә ад ҝүнү тәбрики ҝөндәрди
"CNNтүрк" телеканалы билдирир ки, иҹтимаијјәтдә "сојгырымы инкар гануну" олараг танынан вә 1915-ҹи ил һадисәләријлә әлагәдар ермәни иддиаларынын рәдд едилмәсини ҹинајәт сајан ганун тәклифи, Франса парламентиндә мүзакирәјә чыхарылан заман Саркозијә зәнҝ едән Түркијә президенти Абдуллаһ Ҝүлүн телефонлары ҹавабсыз галмышды.
Телеканлын јајдығы хәбәрдә билдирилир ки, президент Абдуллаһ Ҝүлүн телефонларына ҹаваб вермәјән Никола Саркози, дүнән Азәрбајҹан президенти Илһам Әлијевә мәктуб ҝөндәрәрәк ону 50 јашы мүнасибәти илә тәбрик едиб.
Хәбәрдә һәмчинин гејд едилир ки, Саркози, Франса парламентиндә гәбул едилән ермәнипәрәст ганунун гәбул едилмәсинә реаксија вермәјән Азәрбајҹан президентинә ад ҝүнү тәбрики ҝөндәрир.
Гејд едәк ки, Саркозинин ҝөндәрдији тәбрик мәктубунда дејилир:
"Ҹәнаб Президент, әзиз Илһам. Мән 50 иллик јубилејиниз мүнасибәтилә Сизә шәхси сәадәт арзуларымы чатдырырам. Бу арзулары, ејни заманда, Сизин һәјат јолдашыныза вә мәним октјабрын 7-дә Бакыја рәсми сәфәрим заманы гонагпәрвәрлијиндән вә ишҝүзарлығындан мәмнун галдығым Азәрбајҹан халгына да аид едирәм. Сизин вә ханым Әлијеванын мәни гаршыламағыныздан ән ҝөзәл хатирәләрим галыб. Бизим арамызда олан шәхси мүнасибәтләр Азәрбајҹан вә Франса арасында гурмаг истәдијимиз хүсуси әлагәләр үчүн чох гијмәтли амилдир. Биз реҝионал стабиллик, Авропанын енержи саһәсиндә ҝәләҹәји, ҹәмијјәтдә динләрин тутдуғу јер вә әлбәттә ки, сүлһ јолу илә һәлл едилмәси һәр ики тәрәф үчүн чох әһәмијјәтли олан вә Франсанын да тамамилә бу просесә гатылдығы Дағлыг Гарабағ мүнагишәси барәдә фикир мүбадиләси апардыг. Биз бүтүн бу мөвзулар үзрә үмуми разылыг әлдә етдик вә мән истәрдим ки, бу мөвзулар бизим өлкәләр арасында стратежи әмәкдашлыг һаггында разылашма үчүн мүзакирәләрин башланғыҹы олсун вә бу просес бизим дипломатлар тәрәфиндән давам етдирилсин. Азәрбајҹанын БМТ-нин Тәһлүкәсизлик Шурасында нөвбәти ики ил әрзиндә јер алмасы факты чохшахәли сијасәтин бүтүн мөвзулары үзрә бизим арамызда әлагәләрин чохсаһәли вә интенсив олмасы имканы јаратмалыдыр. Сизи инандырырам ки, Франса там сәмими олараг һәр дәфә мүнасиб билдијиниз заман Сизинлә өз тәҹрүбәсини пајлашмаг үчүн әлиндән ҝәләни едәҹәкдир.
Бакыда тикиләҹәк франсыз лисејинин илк тәмәл дашыны гојмагла, биз рәмзи олараг Франса-Азәрбајҹан икитәрәфли мүнасибәтләрини мөһкәм бүнөврә үзәриндә гурдуг вә буна ҝөрә Сизә тәшәккүр едирәм."
Диггәт: Хәбәрдән истифадә етдикдә мәнбәјә истинад лазымдыр
