Сәбрли, мөһкәм вә мүбариз ол мәним әзиз мүсәлман халгым! Илләрлә арзулајырдын ки, мәнфур коммунист режими нә вахт дағылар вә музејләрә ҝедәр? Биз дә раһат вә мүсәтәгиллик шәраитиндә өз динимизи әгидәмизи, Исламымызы вә мүгәддәс Гуранымызы әмнијјәтлә өјрәниб мүсәлманчылығымызы там шәкилдә горумагла хошбәх һәјат сүрәҹәјик. Белә бир аталар мәсәли вар дејәрләр “Сән сајдығыны сај, ҝөр фәләк нә сајыр?” Сән демә болшевикләрин һәлә бизим милләтә јазығы ҝәлирмиш амма, өзүмүзүнкиләр ағзыны ачанын ағзындан ҝүлләләмәјә белә һазыр имишләр.
Тәшккүрләр, Аллаһын рәһмәт вә бәрәкәти сизә олсун еј әзиз мүсәлман халгым! Доғурдан да хырда һәтта, бәләјдәки көрпә ушагдан тутмуш ағсаггал вә ағбирчәкләрә гәдәр, башы өрпәкли ана баҹылар әзиз Ислам Пејғәмбәримизин (с) баласы Имам Һүсејнин (ә) әза мәҹлисләриндә јахшы иштирак етдиниз, ҝөз јашларынызы төкдүнүз вә Аллаһ-Тааланын бол-бол разылығыны әлә ҝәтирә билдиниз.
Амма, неҹә ки, өз ҝөзләримлә мүшаһидә етдим кими, бу он ҝүнлүк мүсәлман халгымызын әза мәрасиминдә һеч бир телевизија каналы вә радио програмларында мүсәлман халгын дәрдинә вә әзасына шәрик олуб, онлара башсағлығы верән бир верилиш ҝөрмәдик. Сүбһ ачыландан консерт вә шолар башлады та ҝеҹә каналларындакы “ән тәрбијәви мәнәвијјатсызлыглара гәдәр”. Һәлә бу әзалы ҝүнләрдә хариҹдән өлкәмизә дәвәт олунмуш ҹаз мусиги ансанбылларыны демирәм! Бу арада Имам Һүсејн (ә) ағанын башыны кәсмәкдән өтрү әлләринә гылынҹ алыб Кәрбәланын ганлы мејданына топлашан Куфә Әһли јадыма дүшдү. Сәбәб исә Имамын (ә) әдаләтсиз һакимә сәс вермәмәси иди. Һамы билирди вә ән иманлы шәхсијјәтләр тарихдә дәгиг хәбәр вермишдиләр ки, бу мәлун Језид шәрабхор, мејмун ојнадан, әхлагсыз, халгын ганыны ичмәјә һәр ан һазыр олан вә һакимијјәтдә галмасына ҝөрә һәр бир ҹинајәтә әл ата биләҹәк бир ҹанлыдыр. Амма, бүтүн бунлара бахмајараг, Куфә Әһли пак, ҝүнаһсыз, Аллаһсевәр, әдаләтли, шүҹаәтли, гејрәтли Имам Һүсејнин (ә) јанында јох, Онунла вурушмагдан өтрү үзбәүз мејданда дајандылар. Бунун сәбәбини бир азҹа өјрәнмәкдән өтрү Језид кими шәхсијјәтсизләри мүдафә едәнләрин кимләрдән ибарәт олмасы даһа мараглыдыр. Тарих сәһифәләриндә бу һагда белә ачыглама верилир. Језид кимиләринә кимләр нөкәрлик едиб, Пејғәмбәримизин (с) әзиз баласынын башыны белә кәсмәсинә разы олублар?
Биринҹи: Јер үзүнүн ән јалтаг, шәрәфсиз, вәзифә ҝүдән вә өз шәхсијјәтинә ҝөрә һәр шеји һәтта, Аллаһа олан заһири иманыны да әлдән вермәјә һазыр олан алимләр, шаирләр вә индики дилдә десәк, һәгигәти демәјә ҹүрәт етмәјән Шүрејһ кими газиләр вә имансыз зијалылар;
Икинҹи: Леш јемәјә белә һазыр олан шәхсијјәтсиз инсанлар, һәгигәти билә-билә гәбул етмәјиб гарныны фикирләшән әгидәсиз инсансифәтләр; шејтанпәрәстәләр, ирадәсиз вә әгидәси бошлар;
Үчүнҹү: Өз ҹаныны һәр шејдән әзиз тутан горхаглар, биринин вурулмасыны, дөјүлмәсини вә өлдүрүлмәсини ҝөрдүкдә горхусундан аз гала ҹаны чыхан әгидәсизләр; Куфә һакими ибни Зијад Куфәнин белә горхагларыны Кәрбәла сәһрасына ҝөндәрмәкдән өтрү сәһрада гулдурлуг едән бир-ики нәфәри тутуб ҹамаатын ҝөзү өнүнүдә бојнуну вурдурур;
Дөрдүнҹү: Әмирәлмөминин Әли (ә) кими бир әдаләтли рәһбәрин әдаләтинә дөзә билмәјиб, зәманәсиндә Она гаршы чыхан, диндән чыхмыш хәвариҹләр;
Бешинҹи: Зәманәсинин информсија васитәләринин тәблиғи алтына дүшүб, алданмышлар, фасигләр, гумарбазлар вә шәрабхорлар; белә тәблиғатлардан бири дә о заман Ислам Пејғәмбәринин (с) әзиз баласы Имам Һүсејн (ә) Ислам дининдән чыхмасынын јајылмасы иди;
Бүтүн бунларын мүгабилиндә, Имам Һүсејнин (ә) башчылығы илә Аллаһа хатир өз азадлығыны, динини, әгидәсини, ҹәмијјәтдә әдаләт, шәрәфини, намусуну вә мүстәгиллијини горумагдан өтрү мөһкәм дајанмыш шәрәфли вә кәрамәтли Аллаһ бәндәләри дајанмышдыр.
Нәһајәт, сон јүзилликдән бу ҝүнә кими бизим мүгәддәс Вәтәнимизин башына ҝәлмиш мүсибәтләр вә илаһи имтаһанлары хатырлајырам. Сон илләрдә Вәтән, Мүстәгиллик, Ислам, Мүгәдддәс Гуран, Өрпәк, Намус, Гејрәт вә Шәрәф уғрунда бу ҝүнә кими истәр чөлдә мүбаризә апаран вә истәрсә дә өз ширин һәјатларыны әсирликдә кечирмәјә һазыр олан алим вә инанҹлы вә шүҹаәтли ҝәнҹләримизи хатырлајырам вә сонда бу суалы өз-өзүмә верирәм: Илаһи! Ҝөрәсән мән кимин дәстәсиндәјәм?
Бир руһани кими ону билирәм ки Аллаһ-Таала мүгәддәс Гуранымызда пејғәмбәрләрдән сонра Ислам үммәтинин ислаһ олунуб вә Һаггы батилдән ајырыб инсанлара танытдырмасына иманлы вә Аллаһдан горхан алимләрә тапшырыб. Бујурур:
“Аллаһдан Өз бәндәләри ичәрисиндә анҹаг алимләр горхар. (Онлар елм саһиби олдуглары үчүн Аллаһын вәһданијјәтини, һејбәт вә әзәмәтини даһа јахшы баша дүшүр вә Ондан даһа чох горхурлар). Һәгигәтән, Аллаһ јенилмәз гүввәт саһибидир, (мөминләри) бағышлајандыр!” (Фатир сурәси 28)
Вә сонда Ислам Пејғәмбәринин (с) алимләр һаггында бүтүн әсрдә гызыл һәрфләрлә јазыласы олан бир һәдиси јадыма дүшдү:
قال رسول الله صلی الله علیه واله وسلم :
اذا ظهرت البدع فی امتی فلیظهر العالم علمه فمن لم یفعل فعلیه لعنته الله (اصول کافی جلد 1صفحه 54)
“Һәр вахт үммәтимин арасында бидәт баш галдырды (јәни, һаггы батилдән ајырмаг чәтинләшди) алим (вә ја руһани, зијалы, елм әһли) өз елми вә иманы илә (һеч нәдән горхмадан) һәгигәти бәјан етмәлидир. Әҝәр буну етмәсә Аллаһын ләнәтинә ҝәлмиш олар!” (Үсул Кафи, ҹ.4; сәһ.54)
Јенә дә доја билмәдим бу һәдисдән башга бир һәдис дә јадыма дүшдү ки, Әмирәлмөминин Әлидән (әлејһиссалам) нәгл олунур, Һәзрәт бујрур:
قال امیرالمومنین علی ابن ابیطالب صلوات الله علیهما :
اذا ظهرت البدع فعلی العالم ان یظهر علمه فان لم یفعل سلب منه نور الایمان. (وسائل الشیعه جلد16 صفحه 271 )
“Һәр вахт үммәтин арасында бидәт баш галдырды (јәни, һаггы батилдән ајырмаг чәтинләшди) алим (вә ја руһани, зијалы, елм әһли) өз елми вә иманы илә (һеч нәдән горхмадан) һәгигәти бәјан етмәлидир. Әҝәр буну етмәсә иман нуру ондан ҝөтүрүләр!” (Вәсаил-Шиә; ҹ.16;сәһ.271)
Аллаһ-Тааладан сон нәфәсә кими Онун иман нурунда олмағымызы арзулајырам!
Әл-Мустафа (с) адына бејнәлхалг
Ислам академијаснын докторанты
Фаиг Вәлизадә
Диггәт: Хәбәрдән истифадә етдикдә мәнбәјә истинад лазымдыр
