Азәрбајҹан Ислам Партијасы (АИП) өзүнүн мәрд, мүбариз ардыҹыллары илә бу ҝүн дә Азәрбајҹан халгынын, дөвләтчилијимизин, әрази бүтөвлүјүмүзүн дүшмәнләрилә мүбаризәни давам етдирир. Тәәссүфләр олсун ки, реал, сәмими вә сивил ҝөрүнән бу мүбаризәјә бәзи рәсми дөвләт органлары һәр вәҹһлә мане олмаға, бу мүбаризәнин истигамәтини мәгсәдли шәкилдә дөндәрмәклә ҹәмијјәтин сағлам, конструктив гүввәләрини ләкәләмәјә, радикаллыға ҹәлб етмәклә дағыдыҹы адландырмаг фикринә наил олмаға чалышырлар.
Бакы Шәһәр Иҹра Һакимијјәтинин вәтәндашларын сәрбәст топлашмаг азадлығы һаггында өлкә Конститусијасынын вә ејни адлы ганунун вердији һаглары мәһдудлашдырмасы, бу барәдә Азәрбајҹанын да үзв олдуғу инсан һагларына даир бејнәлхалг конвенсијаларын мүһүм шәртләрини кобуд шәкилдә позмасы бир даһа сүбут едир ки, рәсми даирәләрдә өлкәмизин талејүклү мәсәләләринин һәллиндә вәтәндашларын мөвгеји вә ирадәси илә пајлашмаг, һесаблашмаг фикри-дүшүнҹәси јохдур. Белә ки, АИП-ин “Гарабаға азадлыг”, “ишғалчы режимләрә өлүм”, “рүшвәт вә коррупсијаја сон”, “ҝүнаһсыз мәһбуслара азадлыг”, “ганунларын алилијинә тәминат”, “Конститусијаја һөрмәт” шуарлары илә тәшкил етдији динҹ аксијанын кечирилмәси барәдә Бакы Шәһәр Меријасына ганунаујғун шәртләр дахилиндә үнванладығы етдији алтынҹы мүраҹиәтә дә “јох”-ны ҹавабы алмасы садаланан негатив һалларын арадан галдырылмасы, һәтта позулмуш әрази бүтөвлүјүмүзүн халгын ирадәсилә бәрпасынын бејнәлхалг тәшкилатлардан тәләб едилмәси өлкәнин бәзи мәмурларынын марағында олмадығыны ҝөстәрир. Даһа чох тәәссүф доғуран һал исә БШИҺ-нин вәтәндашларын сәрбәст топлашмаг азадлыгларыны позмасына ҝөрә АИП-ин Бакы Шәһәр 1 сајлы Инзибати-Игтисади Мәһкәмәси гаршысында галдырдығы иддиа әризәсинин рәдд едилмәси вә исламчыларын һүгугларынын мәһкәмә һакимијјәти чәрчивәсиндә һәлл олунмамасыдыр.
АИП бир даһа бәјан едир ки, бүтүн бунлар ејни мәркәздән сенариләшдирилмиш тәхрибатдыр вә инсанлары радикаллыға, гаршыдурмаја ҹәлб етмәк, өлкәни исә хаоса чевирмәк нијјәтинә хидмәт едир. Биз бу тәхрибатлара ҝетмәјә тәрәфдарларымызы Аллаһ-Тәаланын һарам ајлардан бујурдуғу мүгәддәс Мәһәррәм ајында даһа чох сәбирли вә тәмкинли олмаға чағырыр, фитнә-фәсадларын төрәтдикләри ојунлара ајыг нәзәрләрлә гијмәт вермәји төвсијә едирик. Ганунчулуғу, инсан һагларыны тәләб етмәкдә сивил мүбаризә јолуну бундан сонра да давам етдирәҹәјик.
Диггәт: Хәбәрдән истифадә етдикдә мәнбәјә истинад лазымдыр
