АБШ Дөвләт Департаменти, АШПА вә бејнәлхалг тәшкилатлар вахташыры чыхыш етдикләри мүхтәлиф һесабатларда Азәрбајҹанын инсан һүгуг вә азадлыглары илә бағлы ҹидди проблемләр јашамасыны ифадә едир, Әлијев һакимијјәтинә бәшәри дәјәрләрә сајғы илә јанашманы төвсијјә едир. Бәзән, конкрет олараг виждан вә сијаси мәһбусларын азадлыға бурахылмасы тәләби илә дә чыхыш едир.
Әксәр һалларда да Әлијев һакимијјәтинин мәмурлары вә мәддаһлары хариҹи дөвләтләрин вә бејнәлхалг тәшкилатларын һесабатларыны вә тәләбләрини Азәрбајҹанын дахили ишләринә гаришмасы кими гијмәтләндирир. Бүтүн конферанс вә мөтәбәр бејнәлхалг топлантыларда даима бу фикир дә тәкрар олараг сәсләнир ки, инсан һүгуг вә азадлыглары һеч бир дөвләтин дахили иши сајыла билмәз.
Буна бахмајараг Азәрбајҹан һакимијјәти өз билдијини едир. Истәдијини шәрләјәрәк һәбс едиб мин бир ишҝәнҹәләрә мәруз гојмагла узун мүддәтә зинданларда өмрүнү чүрүдүр. Һәбс олунан шәхс журналист, секулјар сијасәтчи олдугда јерли һүгуг мүдафиәчиләри вә КИВ мәсәләни иҹтимаиләшдирир, һүгуг мүдафиәчиләри өз һесабатларында мәһкум олунмушларын адларыны гејд едиб, бејнәлхалг тәшкилатлара вә Авропа тәсисатларына ҝөндәрир.
Онлар да бир чох һалларда өз нөвбәсиндә мүмкүн реаксијалары верирләр. Бәзән дә Әлијев һакимијјәтинә конкрет шәхсләрин азад олунмасы илә бағлы етдикләри мүраҹиәтләр нәтиҹәсиз галмыр. Амма һәбс олунан шәхс һаҹы Мөвсүм кими мүсәлман мөмин, диндар оларса бах о заман вај онун һалына. Ҝәлин елә һаҹы Мөвсүмүн тимсалында реал вәзијјәтә бахаг. Биринҹиси онун да һәбси диҝәрләри кими шәрләнәрәк һәјата кечирилир, амма чох ағыр иттиһамларла. Һәбс олундугдан сонра һүгуг мүдафиәчиләри онунла бағлы бәјанат јајмаға тәләсмир.
Заман кечдикҹә дә сахланылан мөминин һүгуги вәзијјәти даһа да ағырлашыр. Мәтбуат органларындан чох аз сајда бу һәбси ишыгландырыр өзү дә арха планда. Бир нечә һәфтә бәзән бир ај кечдикдән сонра ахтара ахтара, ҝәзә ҝәзә бу мөминин әтрафы ҝәлиб һансыса бир һүгуг мүдафиәчисинә чыхыр. Бу да кифајјәт гәдәр ҝеҹ олур. Сонра да башлајырлар узун узады мәһкәмә просесләри.
Мәһкәмә просесләри исә там бир һүгуг позунтусунун агонијасыны ҹанландырыр. Мәһкәмәнин гәрарындан сонра һәмин мөминин ады сијаси мәһбус гисминдә дүшүр јерли мүдафиәчиләрин гејдләринә. Амма секулјар сијаси мәһбусла мөмин сијаси мәһбус арасында даһа ҹидди фәрг ондадыр ки, нә мәһкәмә, нә зинданда нә дә аренада секулјар мејданда тәк галмыр. Она АБШ, Авропа дөвләтләри вә бејнәлхалг тәшкилатлар гаһмар чыхыр. Диндар мәһбуслар исә һаҹы Мөвсүм кими бу мејданларда тәк галыр. Мүсәлман олдуғундан секулјар иҹмалар вә гәрб онун мүдафиәсинә һәвәс ҝөстәрмир.
Бу заман мараглы мәнзәрә јараныр. Вахтилә имам Һүсејн Кәрбәлада мүбаризә мејданында ҹәми 72 нәфәрлә галдығы кими бу ҝүн дә Онун давамчылары мејданларда тәк галыб. Суал јараныр : 14 әсрдән сонрадамы Һүсејн давамчыларынын сајы ики рәгәмлидир ? Ахы статистикаја, мәрасимләрә, тәдбирләрә, ҹәрјанлара баханда шиә мүсәлманларынын сајы анҹаг Азәрбајҹанда милјонларла өлчүлүр. Нәјә ҝөрә һаҹы Мөвсүм кими диндарлар шәрләнәрәк һәбс олунуб мин бир ишҝәнҹәјә мәруз галдығы һалда онларын мүдафиәси олмамалыдыр ?
Һаҹы Мөвсүм исә һиҹабы мүдафиә етдији үчүн зиндандадыр. Бах садә, мәзлум, мәктәбә ҝетмәкдән мәһрум олан һиҹаблы гыз атасы, Илһам Әлијевин зүлмү алтында галыб фәрјад едән мөмин бунлары дилинә ҝәтирмәјә горхур амма гәлбиндә уҹа сәслә, бағырараг дејир. Вә дејир Аллаһа шикајәт едир.
Диггәт: Хәбәрдән истифадә етдикдә мәнбәјә истинад лазымдыр
